Onidajọ 13

13 ¹Àwọn ọmọ Israẹli sì tún ṣe búburú lójú Baba wa, nítorí náà ó fi wọ́n lé àwọn Filistini lọ́wọ́ fún ogójì ọdún.

²Ọkùnrin kan wà tí orúkọ rẹ̀ ń jẹ́ Manoa, láti Sora nínú ìdílé àwọn ọmọ Dani; aya rẹ̀ yàgàn, kò sì bímọ.

³Ìránṣẹ́ Baba wa sì farahàn fún obìnrin náà, ó sì wí fún un pé, “Ìwọ yàgàn, ìwọ kò sì bímọ, ṣùgbọ́n ìwọ yóò lóyún, ìwọ yóò sì bí ọmọkùnrin kan. ⁴Nítorí náà, ṣọ́ra kí o má ṣe mu wáìnì tàbí ọtí líle, má sì ṣe jẹ ohunkóhun tí kò mọ́, ⁵nítorí ìwọ yóò lóyún, ìwọ yóò sì bí ọmọkùnrin kan. Abẹ kì yóò kan orí rẹ̀, nítorí ọmọkùnrin náà yóò jẹ́ Nasiri Baba wa láti inú ìyá rẹ̀ wá, òun yóò sì bẹ̀rẹ̀ sí í gba Israẹli là kúrò lọ́wọ́ àwọn Filistini.”

⁶Obìnrin náà sì lọ sọ fún ọkọ rẹ̀ pé, “Ènìyàn Ọlọ́run kan tọ̀ mí wá; ìrí rẹ̀ dàbí ìrí ìránṣẹ́ Baba wa, ó sì ba ni lẹ́rù gidigidi. Èmi kò bi í léèrè ibi tí ó ti wá, òun kò sì sọ orúkọ rẹ̀ fún mi.” ⁷Ṣùgbọ́n ó wí fún mi pé, “Ìwọ yóò lóyún, ìwọ yóò sì bí ọmọkùnrin kan. Nísinsìnyí má mu wáìnì tàbí ọtí líle, má sì jẹ ohunkóhun tí kò mọ́, nítorí ọmọkùnrin náà yóò jẹ́ Nasiri Baba wa láti inú ìyá rẹ̀ wá títí di ọjọ́ ikú rẹ̀.”

⁸Nígbà náà ni Manoa bẹ Baba wa pé, “Jọ̀wọ́, Baba mi Olódùmarè, jẹ́ kí ènìyàn Ọlọ́run tí ẹ rán sí wa tún tọ̀ wá wá, kí ó sì kọ́ wa ní ohun tí a ó ṣe fún ọmọkùnrin tí a ó bí.”

⁹Baba wa sì gbọ́ ohùn Manoa; ìránṣẹ́ Baba wa sì tún tọ̀ obìnrin náà wá bí ó ti jókòó ní pápá, ṣùgbọ́n Manoa ọkọ rẹ̀ kò sí lọ́dọ̀ rẹ̀. ¹⁰Obìnrin náà sì sáré kánkán, ó sì sọ fún ọkọ rẹ̀ pé, “Wò ó, ọkùnrin tí ó tọ̀ mí wá ní ọjọ́ náà ti farahàn fún mi!”

¹¹Manoa sì dìde, ó tẹ̀lé aya rẹ̀, ó sì tọ̀ ọkùnrin náà wá. Ó béèrè pé, “Ẹ̀yin ni ọkùnrin tí ó bá obìnrin náà sọ̀rọ̀ bí?” Ó sì wí pé, “Èmi ni.”

¹²Manoa wí pé, “Nígbà tí ọ̀rọ̀ yín bá ṣẹ, kí ni yóò máa darí ìgbé ayé àti iṣẹ́ ọmọkùnrin náà?”

¹³Ìránṣẹ́ Baba wa wí fún Manoa pé, “Kí obìnrin náà ṣọ́ra fún gbogbo ohun tí mo sọ fún un. ¹⁴Kí ó má jẹ ohunkóhun tí ó jáde láti inú àjàrà, kí ó má mu wáìnì tàbí ọtí líle, kí ó má sì jẹ ohunkóhun tí kò mọ́. Kí ó pa gbogbo ohun tí mo pa láṣẹ fún un mọ́.”

¹⁵Manoa wí fún ìránṣẹ́ Baba wa pé, “Jọ̀wọ́ ẹ jẹ́ kí a dá yín dúró, a ó sì pèsè ọmọ ewúrẹ́ kan sílẹ̀ fún yín.”

¹⁶Ìránṣẹ́ Baba wa wí fún Manoa pé, “Bí ìwọ tilẹ̀ dá mi dúró, èmi kì yóò jẹ oúnjẹ rẹ; ṣùgbọ́n bí ìwọ bá pèsè ẹbọ sísun, rú u sí Baba wa.” (Manoa kò mọ̀ pé ìránṣẹ́ Baba wa ni àlejò náà.).

¹⁷Manoa béèrè lọ́wọ́ ìránṣẹ́ Baba wa pé, “Kí ni orúkọ yín, kí a lè bọlá fún yín nígbà tí ọ̀rọ̀ yín bá ṣẹ?”

¹⁸Ìránṣẹ́ Baba wa wí fún un pé, “Èéṣe tí ìwọ fi ń béèrè orúkọ mi? Ó kọjá òye.”

¹⁹Nítorí náà Manoa mú ọmọ ewúrẹ́ náà àti ẹbọ ọkà, ó sì fi wọ́n rú ẹbọ lórí àpáta náà sí Baba wa, ẹni tí ń ṣe ìyanu, bí Manoa àti aya rẹ̀ ti ń wò ó. ²⁰Bí ọwọ́ iná pẹpẹ náà ti ń gòkè lọ sí ọ̀run, ìránṣẹ́ Baba wa gòkè nínú ọwọ́ iná pẹpẹ náà. Manoa àti aya rẹ̀ rí i, wọ́n sì dojúbolẹ̀ dorí kodò. ²¹Ìránṣẹ́ Baba wa kò farahàn mọ́ fún Manoa àti aya rẹ̀. Nígbà náà ni Manoa mọ̀ pé ìránṣẹ́ Baba wa ni. ²²“Àwa yóò kú dájúdájú,” ni Manoa wí fún aya rẹ̀, “nítorí àwa ti rí Baba wa!”

²³Aya rẹ̀ wí fún un pé, “Bí Baba wa bá ní láti pa wá, òun kì bá tí gba ẹbọ sísun àti ẹbọ ọkà lọ́wọ́ wa, òun kì bá tí fi gbogbo nǹkan wọ̀nyí hàn wá, bẹ́ẹ̀ ni òun kì bá tí jẹ́ kí a gbọ́ nǹkan yìí nísinsìnyí.” ²⁴Obìnrin náà sì bí ọmọkùnrin kan, ó sì sọ orúkọ rẹ̀ ní Samsoni. Ọmọkùnrin náà dàgbà, Baba wa sì bùkún un. ²⁵Ẹ̀mí Baba wa sì bẹ̀rẹ̀ sí í ru u sókè ní Mahane-dani, láàrín Sora àti Eṣtaoli.