Wungva̱-Wungvā 13

13 ¹Israelwui mibingna latluida ithumwui Avāwui miktāli makaphā ot sāhaowa; chiwui vang ana athumli zingkum hangmati Philistinenaobingwui pāngli horsangmihaowa.

²Zorahwui Dan shangwui Manoah kaho mi akha leisai; apreiva̱ nao kashumva̱na, nao maleimana.

³Ithumwui Avāwui kazingrao china sha̱nao chili rāchitheida ali hānga, "Na nao kashumva̱na, nao maleila, kha na nao vaida mayarnao akha pharāra. ⁴Ara na ningngasharlu; drakhāra̱ nilala khamaripa ot mamanglu, kala makathar ot akhanida mashailu, ⁵kaja na nao vaida mayarnao akha pharāra. Awui kuili kuisighai maparpaimara, kaja nao china naopamwui eina ithumwui Avāwui Nazirite akha ngasāra, kala ana Israelli Philistinenaobingwui pāng eina ngatangkhui haophokra."

⁶Sha̱nao china vālaga agaharali unghānga, "Varewui mi akha ili rāhaowa; awui zakmai chi ithumwui Avāwui kazingraowui zakmai thai, mataimeida khangachee khangachāna. A kachiwui eina kharākhala kaji ina mangahānmana, kala ana awui ming ili mahāngmana." ⁷Kha ana ili hānga, "Na nao vaida mayarnao akha pharāra. Ara drakhāra̱ nilala khamaripa ot mamanglu, kala makathar ot akhanida mashailu, kaja nao china naopamwui eina awui kathi zimiksho eina tangda ithumwui Avāwui Nazirite akha ngasāra."

⁸Chieina Manoahna ithumwui Avāli ngakaoda hānga, "Ina kapona, iwui Avā, nana chihovā kahai Varewui mi chi ithumli latluida rāranu, kala pharāra kaji nao chiwui vang ithumna khi sarakhala kaji ithumli tamchitheiranu."

⁹Ithumwui Avāna Manoahwui akhon shāhaowa; ithumwui Avāwui kazingrao china luili pamda khalei sha̱nao chili latluida rāhaowa, kha agahara Manoah china ali ngasoda maleimana. ¹⁰Sha̱nao china thākta yongunglaga agaharali unghānga, "Yanglu, aruihon ili rākahai mipā chi ili rāchitheihaira!"

¹¹Manoahna ngakarthuida apreiva̱li shurda mipā chili rāhaowa. Ana ngahānna, "Na sha̱nao chili kahāng mi chila?" "Ina" da hānga.

¹²Manoahna hānga, "Nawui kahāng saikora mashungserakha, nao chiwui mirin kala otsakli khina khayairakhala?"

¹³Ithumwui Avāwui kazingrao china Manoahli hānga, "Ina ali hāngkahai saikora chi ana ningngasharanu. ¹⁴Ana drakhārongwui eina samkaphang akhanida mashaipaimana, drakhāra̱ nilala khamaripa ot mamangpaimana, kala makathar ot akhanida mashaipaimana. Ina ali ningmi kahai saikora chi ana mayonphalungra."

¹⁵Manoahna ithumwui Avāwui kazingraoli hānga, "Ina kapona, ithumna nali ngaraisāra, kala ithumna nawui vang yaonao akha ngarānra."

¹⁶Ithumwui Avāwui kazingrao china Manoahli hānga, "Nana ili ngaraisāakhala, ina nawui kashakazā mashaimara; kha nana rikkatā kachigat ngarānakha, ithumwui Avāli chi chigatlu." (Manoahna ali ithumwui Avāwui kazingrao ngasāna kaji matheimana.).

¹⁷Manoahna ithumwui Avāwui kazingraoli ngahānna, "Nawui kahāng mashungserakha ithumna nali khayāshi khavai, nawui ming khikhala?"

¹⁸Ithumwui Avāwui kazingrao china ali hānga, "Khiwui vang eina nana iwui ming ngahānkhala? Chi theishingkakhuiwui kānda lei."

¹⁹Chiwui vang Manoahna yaonao akha kala tharāzātchigat khuilaga, matakhak kahai ot sakhame ithumwui Avāli ngalungtungli chigata; Manoah eina apreiva̱na yangpama. ²⁰Hanphutwui meiwon kazingramshong shoklakha, ithumwui Avāwui kazingrao china hanphutwui meiwonli shoka. Manoah eina apreiva̱na theilaga ngaleili mai mashunzanga. ²¹Ithumwui Avāwui kazingrao china Manoah eina apreiva̱li masamphangluithuwa. Chieina a ithumwui Avāwui kazingraona kaji Manoahna theihaowa. ²²Manoahna apreiva̱li hānga, "Ini thiphalunghaora, kaja inina ithumwui Avāli theihaira!"

²³Apreiva̱na ali hānga, "Ithumwui Avāna inili sāthat khavai phaakha, ithumwui pāng eina rikkatā kachigat kala tharāzātchigat makhuisangpaimana, inili hi saikora machitheipaimara, kala ara hi inili manganāngasakpaimara." ²⁴Preiva̱ china mayarnao akha pharai, kala aming Samson hoi. Naoshinao chi rarkai, kala ithumwui Avāna ali somi. ²⁵Kala ithumwui Avāwui Manglāna Zorah eina Eshta-olwui ngachaili khalei Mahaneh-danli ali thuimathuk ngasakphokhaowa.