நியாயாதிபதிகள் 13

13 ¹மறுபடியும் இஸ்ரவேலர் எங்கள் பிதாவின் பார்வையில் பொல்லாப்பானதைச் செய்தார்கள்; ஆகையால் அவர் அவர்களை நாற்பது வருஷம் பெலிஸ்தரின் கையில் ஒப்புக்கொடுத்தார்.

²தாண் கோத்திரத்தைச் சேர்ந்த சோரா ஊரானாகிய மனோவா என்னும் பேருள்ள ஒரு மனிதன் இருந்தான்; அவன் மனைவி மலடியாயிருந்து பிள்ளை பெறாதிருந்தாள்.

³எங்கள் பிதாவின் தூதன் அந்த ஸ்திரீக்குத் தரிசனமாகி, அவளை நோக்கி: “இதோ, நீ மலடியாயிருந்து பிள்ளை பெறாதிருக்கிறாய்; ஆனாலும் நீ கர்ப்பவதியாகி ஒரு மகனைப் பெறுவாய். ⁴இப்போதும் நீ திராட்சரசமும் மதுபானமும் குடியாதபடிக்கும், தீட்டானது ஒன்றையும் புசியாதபடிக்கும் எச்சரிக்கையாயிரு. ⁵ஏனெனில் நீ கர்ப்பவதியாகி ஒரு மகனைப் பெறுவாய். அவன் தலையின்மேல் சவரகன் கத்தி படாதிருக்கக்கடவது; அந்தப் பிள்ளை கர்ப்பத்திலிருந்தே எங்கள் பிதாவுக்கு நசரேயனாயிருப்பான்; அவன் இஸ்ரவேலைப் பெலிஸ்தரின் கையிலிருந்து இரட்சிக்கத் தொடங்குவான்.”

⁶அப்பொழுது அந்த ஸ்திரீ போய், தன் புருஷனை நோக்கி: “தேவனுடைய மனிதன் ஒருவர் என்னிடத்தில் வந்தார்; அவருடைய சாயல் எங்கள் பிதாவின் தூதனுடைய சாயலைப்போல மகா பயங்கரமாயிருந்தது; அவர் எங்கேயிருந்து வந்தார் என்று நான் அவரிடத்தில் கேட்கவில்லை, அவர் தம்முடைய நாமத்தை எனக்குச் சொல்லவுமில்லை. ⁷ஆனாலும் அவர் என்னை நோக்கி: ‘இதோ, நீ கர்ப்பவதியாகி ஒரு மகனைப் பெறுவாய்; இப்போதும் நீ திராட்சரசமும் மதுபானமும் குடியாமலும், தீட்டானது ஒன்றையும் புசியாமலும் இரு; அந்தப் பிள்ளை கர்ப்பத்திலிருந்து தன் மரணநாள்வரைக்கும் எங்கள் பிதாவுக்கு நசரேயனாயிருப்பான்’ என்று சொன்னார்.”

⁸அப்பொழுது மனோவா எங்கள் பிதாவை நோக்கி விண்ணப்பம்பண்ணி: “ஆ, என் ஆண்டவராகிய பிதாவே, நீர் அனுப்பின தேவனுடைய மனிதன் மறுபடியும் எங்களிடத்தில் வந்து, பிறக்கப்போகிற பிள்ளைக்கு நாங்கள் செய்யவேண்டியதை எங்களுக்குப் போதிக்கும்படி தயவுசெய்யும்” என்றான்.

⁹எங்கள் பிதா மனோவாவின் சத்தத்தைக் கேட்டார்; ஸ்திரீ வயலில் உட்கார்ந்திருக்கையில், எங்கள் பிதாவின் தூதன் மறுபடியும் அவளிடத்தில் வந்தான்; அவள் புருஷனாகிய மனோவா அவளோடிருக்கவில்லை. ¹⁰அந்த ஸ்திரீ சீக்கிரமாய் ஓடி, தன் புருஷனுக்கு அறிவித்து: “இதோ, முன்நாளில் என்னிடத்தில் வந்த மனிதன் எனக்குத் தரிசனமானார்” என்றாள்.

¹¹மனோவா எழுந்து, தன் மனைவியின் பின்னே போய், அந்த மனிதனிடத்தில் வந்து: “இந்த ஸ்திரீயோடே பேசின மனிதன் நீர்தானா?” என்று கேட்டான். அதற்கு அவர்: “நான்தான்” என்றார்.

¹²அப்பொழுது மனோவா: “உம்முடைய வார்த்தைகள் நிறைவேறும்போது, அந்தப் பிள்ளையின் நடக்கையும் செய்கையும் எப்படியிருக்கவேண்டும்?” என்றான்.

¹³எங்கள் பிதாவின் தூதன் மனோவாவை நோக்கி: “நான் அந்த ஸ்திரீக்குச் சொன்ன எல்லாவற்றைக்குறித்தும் அவள் எச்சரிக்கையாயிருக்கக்கடவள். ¹⁴அவள் திராட்சச்செடியில் உண்டாகிறது ஒன்றையும் புசிக்கவும், திராட்சரசமும் மதுபானமும் குடிக்கவும், தீட்டானது ஒன்றையும் புசிக்கவும் வேண்டாம். நான் அவளுக்குக் கட்டளையிட்ட எல்லாவற்றையும் அவள் கைக்கொள்ளக்கடவள்” என்றான்.

¹⁵அப்பொழுது மனோவா எங்கள் பிதாவின் தூதனை நோக்கி: “தயவுசெய்து சற்று தரித்திரும்; உமக்காக ஒரு வெள்ளாட்டுக்குட்டியை ஆயத்தம்பண்ணுவோம்” என்றான்.

¹⁶எங்கள் பிதாவின் தூதன் மனோவாவை நோக்கி: “நீ என்னைத் தரிக்கப்பண்ணினாலும், நான் உன் உணவைப் புசிக்கமாட்டேன்; நீ சர்வாங்கதகனபலியை ஆயத்தம்பண்ணுவாயாகில், அதை எங்கள் பிதாவுக்குச் செலுத்து” என்றான். (வந்தவர் எங்கள் பிதாவின் தூதன் என்று மனோவா அறியாதிருந்தான்.)

¹⁷மனோவா எங்கள் பிதாவின் தூதனை நோக்கி: “உம்முடைய வார்த்தைகள் நிறைவேறும்போது நாங்கள் உம்மைக் கனம்பண்ணும்படிக்கு, உம்முடைய நாமம் என்ன?” என்று கேட்டான்.

¹⁸எங்கள் பிதாவின் தூதன் அவனை நோக்கி: “நீ என் நாமத்தை ஏன் கேட்கிறாய்? அது அறிந்துகொள்ள முடியாதது” என்றார்.

¹⁹அப்பொழுது மனோவா வெள்ளாட்டுக்குட்டியையும் போஜனபலியையும் கொண்டுவந்து, மனோவாவும் அவன் மனைவியும் பார்த்துக்கொண்டிருக்கையில், அதைக் கன்மலையின்மேல் அதிசயங்களைச் செய்கிற எங்கள் பிதாவுக்குச் செலுத்தினான். ²⁰பலிபீடத்திலிருந்து ஜுவாலை வானத்தை நோக்கி எழும்பினபோது, எங்கள் பிதாவின் தூதன் பலிபீடத்தின் ஜுவாலையிலே ஏறிப்போனான்; மனோவாவும் அவன் மனைவியும் அதைக் கண்டு, தரையிலே முகங்குப்புற விழுந்தார்கள். ²¹எங்கள் பிதாவின் தூதன் மனோவாவுக்கும் அவன் மனைவிக்கும் அப்புறம் காணப்படவில்லை. அப்பொழுது அவன் எங்கள் பிதாவின் தூதன் என்று மனோவா அறிந்துகொண்டான். ²²மனோவா தன் மனைவியை நோக்கி: “நாம் நிச்சயமாய்ச் சாவோம்; ஏனெனில் எங்கள் பிதாவைக் கண்டோம்” என்றான்.

²³அதற்கு அவன் மனைவி அவனை நோக்கி: “எங்கள் பிதா நம்மைக் கொல்ல மனதாயிருந்தால், அவர் நம்முடைய கைகளிலிருந்து சர்வாங்கதகனபலியையும் போஜனபலியையும் ஏற்றுக்கொள்ளாமலும், இவைகளையெல்லாம் நமக்குக் காண்பியாமலும், இந்த வேளையில் இப்படிப்பட்டவைகளை நமக்குக் கேட்கப்பண்ணாமலும் இருப்பாரே” என்றாள். ²⁴அந்த ஸ்திரீ ஒரு மகனைப் பெற்று, அவனுக்குச் சிம்சோன் என்று பேரிட்டாள். அந்தப் பிள்ளை வளர்ந்தது; எங்கள் பிதா அவனை ஆசீர்வதித்தார். ²⁵சோராவுக்கும் எஸ்தாவோலுக்கும் நடுவான மகனேதாணிலே எங்கள் பிதாவின் ஆவி அவனை ஏவத்தொடங்கினார்.