Bouei Bousu Shou Che Thekuda
Israel po saonyi Filistiabü ik to khümbo kukei. Seneibü Bou hangangbüei angkongbü yaksa che to nyusem ka phet shanga janletkubü bousu shou che la thekukei, hoba Manoa phejinei toukei. Loubou kho nyen aei hatlamoklabü; haoei lemshang wanlonga angkei. Samson bukkukei hoba nyensang hapkei.
13 1Israelbü shousi shuongei nyibou seneibü Bou thedanga ai amai kho kümbei, kheijinei haoei haoen po saonyi Filistiabü ik to khümbo kukei.
2Dan chempenbü Zorabü müt che kikei, haoeibü nyen Manoa; haoeibü yak kho angkongbü kikei hoba saoei shousi akitei.
3Seneibü Bou hangangbüei yaksa jungto longkei hoba sao to laukei, “No angkongbü hoba shousi aki, lausikei nyi künlabü hoba bousu shou che buklabü. 4Tou, daman chühashi, nyi ih ayingsi jaaklabü ai ayungjan, hoba asaopobü aikei ashaujan; 5aishanga nyi künlabü hoba bousu shou che buklabü. Khujinei haoeibü khua ajinkulabü, aishanga nashoubou nyusem ka seneibü Bou shanga Nazarit kilabü, hoba haoei Israel Filistiabü ik ka khümenla khanglabü.”
6Yaksa hauan haoeibü lao to lenkei, “Kü jungto Mühghaü müt che loukei; haoeibü chühla kho seneibü Bou hangangbü chühla tegü, aei hatlamoklabü kikei. Ngei hao lanei longbü aphe; haoeibü nyen kho haoei kü la alen.” 7Lausikei haoei kü to laukei, “Nyi künlabü hoba bousu shou che buklabü. Tou ih ayingsi jaaklabü ai ayungjan, hoba asaopobü aikei ashaujan, aishanga nashoubou nyusem ka haoei hailabü chalou sühko seneibü Bou shanga Nazarit kilabü.”
8Kheijinei Manoaei seneibü Bou to sukeijakei, “O kü Abou, sanoudambo, nyi hautibü Mühghaü müt kho künei jungto nyibou louashi, hoba buklabü nashoubou shanga senei ai kümlaje kho senei la lenashi.”
9Seneibü Bouei Manoaeibü ngüh ditkei; seneibü Bou hangangbüei seka setan kibü yaksa jungto nyibou loukei, lausikei saoeibü lao Manoa sao yoa akitei. 10Yaksa tongde laangjung hauan haoeibü lao to lenkei, “Chühashi, jihsiphaia kü jungto loubü müt kho kü jungto longkei!”
11Manoa meimeian haoeibü yak phai seman müt kho jungto loukei. Haoei phekei, “Yaksa to laubü müt kho no sai?” Haoei laukei, “Ngo ki.”
12Manoaei laukei, “Kaibü ngüh haüthükko loulaje, nashoubou ailai lang kilaje, hoba haoeibü kümsilei ai kilabü?”
13Seneibü Bou hangangbüei Manoa to laukei, “Ngei sao la lenbü pendou to saoei daman chühjan. 14Saoei semlüh maanga aikei ashaujan, ih ayingsi jaaklabü ai ayungjan, hoba asaopobü aikei ashaujan. Ngei sao la sakkubü pendou saoei jungeijan.”
15Manoaei seneibü Bou hangangbü to laukei, “Sanoudambo, nyi künei yoa longche khüpashi, hoba künei no shanga lonshou che lamlealabü.”
16Seneibü Bou hangangbüei Manoa to laukei, “No ngo longche khüpsikei, kaibü shausiyung kho ngei ashaulabü; lausikei juokbü lembü nyi lamlealonga, kho seneibü Bou shanga lemashi.” (Manoaei kho seneibü Bou hangangbü kikei dogo ange.)
17Manoaei seneibü Bou hangangbü to phekei, “Kaibü nyen ai ki? Kaibü ngüh haüthükko loulaje, künei no soumo hatlabü.”
18Bou hangangbüei hao to laukei, “Nyi ngeibü nyen aila pheda? Kho ditenan to kei kaangbou.”
19Hibü Manoaei lonshou hoba shausiyung lembü sungkei, hoba Manoa si hao yakei chühko kijinei, kho laang thüka seikümseilei kümbou Bou to lembei. 20Ladang lemshang wanlong khuthük to angjinei, Bou hangangbü lemshang wanlonga angkei. Manoa si hao yakei hapbei, hoba haosi the khüman kaoa khüpetkei. 21Bou hangangbü Manoa si hao yak jungto nyibou alongkei. Kheijinei Manoaei hao Bou hangangbü dogo ngekei. 22“Sen tükde hailabü,” Manoaei hao yak to laukei, “aishanga senei Bou hapa!”
23Hao yakei hao to lenkei, “Bouei sen haitila damenbü kialonga, haoei seneibü ik ka juokbü lembü hoba shausiyung lembü asungletkei, hoba sen to ho pendou atang khittikei, ayingsi touje ho sen to ditla akükei.” 24Saoei bousushou che bukkei, hoba saoei hao nyen Samson nyenkukei. Hobaje nashou kho chingkei, hoba Bouei hao haükukei. 25Hobaje seneibü Bou Soushouei hao to Mahane Dana, Zora si Eshtaol kanglanga shian khangkei.
