Samson Yakla Lebüa Seneibü Boueibü Ik
Samsonei haoeibü haobou si haonyu thonbü ba yoan Filistiabü yaksa che yak lela thungeikei, seneibü Bouei Israel leiyeibü shuong khulimbo küman che lambü kho akümen. Haoei molosaonyu che ik yoan phenthetkei, haibü mang ka honei shaukei, hoba kho ka ngühsong wanyokei. Haoeibü yakeibü nyeksiei jongaibü thonkei, hoba kho shanga müt 30 haikei.
14 1Samsonei Timna to yanan, hoba khünei Filistiabü yaksa shousi yoka medeinyu che hapbei. 2Haoei angan haobou si haonyu to lenkei, “Ngei Timnaa Filistiabü yaksa che hapkei; tou sao kü shanga yakla leibakushi.”
3Haobou si haonyuei hao to laukei, “Kaibü phang yoka ayingsi ngeibü mütli pendou yoka yaksa che aki lo, nyi akipbü Filistiabü ka yak lela haubü?” Lausikei Samsonei haobou to laukei, “Sao kü shanga yakla leibakushi; sao kü nyeka maibü ki.”
4Haobou si haonyuei ho kho seneibü Bou ka longda dogo angekei; aishanga Haoei Filistiabü khulimbo wapyola küman che lambei. Khübü chaloua Filistiabüei Israel thüka songdakkei.
5Samson haobou si haonyu yoa Timna to yankei. Timnabü semlühlaaka, molosaonyu shoushou cheei hao to ngühkuko longkei. 6Seneibü Bou Soushouei hao thükto loukei, hoba haoei molosaonyu to jembü ikei lulu lonshou che tegü phenthetkei; lausikei haoei jembü kümbü kho haobou yingsikei haonyu to alen. 7Kheijinei haoei yanan yaksa to ngühsong wanyokei, hoba sao Samson nyeka maibü kikei.
8Latetche, sao yakla lela longeian, haoei molosaonyu haibü mang chühla sepeikei. Hoba chühashi, haibü mang insiaubu naoei tan che hoba naodei kikei. 9Haoei naodei kho jembü ika phaua, paiko shaukei. Haobou si haonyu jungto louan, haoei haoen la tuisho kukei, hoba haoenei shaukei. Lausikei haoei molosaonyu haibü mang ka phaubü kho haoen to alen. 10Haobou yaksa jungto yankei, hoba Samsonei khünei younak shuongei kümbü tegü lem okkei. 11Mütshuongei hao hapjinei, haoenei thangbou 30 hao yoa kila leian loukei.
12Samsonei haoen to laukei, “Ngei kan to songlenbü ngüh che phekho. Lem chalou nyet maang to kho jongaialonga, ngei kan la inyaibü nei 30 hoba neisimei 30 kulabü. 13Lausikei kanei ajongaialonga, ngo la inyaibü nei 30 hoba neisimei 30 kujan.” Haoenei laukei, “Kaibü songlenbü ngüh lenshi; künei kho ditkho.”
14Haoei laukei, “Shaubou ka shaubü denche longkei; hau yaangbü ka laibü denche longkei.” Chalou semnyet sühko haoenei songlenbü ngüh jongaila mangan apbei.
15Chalou leiboubüa haoenei Samson yak to laukei, “Kaibü lao to kün la songlenbü ngüh tangtila suletashi, ayingsi künei no hoba kaibü boueibü chempen wanei juokettilabü. Nyi künto sola shanga hanei ngakei lo?”
16Samson yakei hao junga haapbei: “Nyi ngo to ong mangsenda, ngo to asanouda. Nyi ngeibü mütshuong la songlenbü ngüh kukei, lausikei kho jongaibü ngo la alen.” Haoei laukei, “Ngei kübou yingsikei künyu to alen, kheijinei aila ka to lenlabü?”
17Haoeneibü lem chalou nyet sünga sao hao junga haapbei, hoba nyetbounyeta haoei sao to lenkei, aishanga saoei hao sukeijakei. Kheijinei saoei songlenbü ngüh jembü mütshuong to lenkei. 18Nyetbounyeta, chanyu anep shongko, sangnyubü shuongei hao to laukei, “Naodei tokei ai lai teibou? Molosaonyu toje ai hau kibou?” Samsonei jongaikei, “Kanei kü masu saoen yoa sek amoulonga, kanei kü ngühphatbü ladangkei tehapkhoulabü.”
19Hobaje seneibü Bou Soushouei hao thükto loukei. Hao Ashkelon to yankei, hoba khünei müt khujin haitikei, hoba haoeneibü peisilei sungkei, hoba ngühphatbü hapbü shuong la haoeneibü neisimei kukei. Aeibou maangpokko hao haobou chem to angkei. 20Hobaje Samsoneibü yak kho haoeibü maangjambou ong kibü thangbou la kuan apbei.
