Samson laga shadi te Pitri laga hath
Samson pora tai laga ma-baba laga mana kora pichete bhi ekjon Philistine maiki mange, amar Pitri pora Israel uporte raj kora khan laga biruddh te ekta mauka bonai ase, etu najani kene. Tai khali hath pora ekta sher ke mari, tai laga lash pora mou khai, aru etu laga ekta pahili bonai. Tai laga maiki laga sukulu pora uttor ulai jai, aru etu nimite tirish jon manuh mori jai.
14 1Samson Timnah te namise, aru ta te ekjon jawan chukri, Philistine khan laga chukri ekjon ke dekhise. 2Tai uporte jai kene tar baba aru ama ke koise, “Moi Timnah te ekjon Philistine mahila ke dekhise; etiya tai ke moi laga maiki hobole moi karne loi anibi.”
3Tar baba aru ama koise, “Tumi laga ghor manuh khan nahole moi laga sob manuh majote maiki ekjon nai, kele tumi sunnot nakora Philistine khan pora maiki lobo lage?” Kintu Samson tar baba ke koise, “Tai ke moi karne loi anibi; tai moi laga suku te thik ase.”
4Tar baba aru ama eitu amar Pitri pora ahhise koi kene jana nai, jun Philistine khan bhirodh te kaam koribole ekta karan bisari thakise, kilemane hei homoi te Philistine khan pora Israel ke raj korise.
5Samson tar baba aru ama logote Timnah te namise. Timnah laga angur kheti te, ekta jawan singho tar usorte gorji kene ahhise. 6Amar Pitri laga Atma takot pora tar uporte ahhise, aru tai nijor khali hath pora singho ke ekta jawan chagoli nisina phatai dise, kintu tai ki korise eitu tar baba nahole ama ke kuba nai. 7Tetiya tai namise aru hei mahila logote kotha korise, aru tai Samson laga suku te thik thakise.
8Pichete, tai ke shadi koribole wapas ahhi kene, singho laga mora gaw ke sabole tai alag phale ghurise. Aru ta laga bhitorte mou makhi laga jhaak ekta, aru mou thakise. 9Tai mou ke tar hath te uthaise aru berai berai khaise. Tar baba aru ama logote punchi kene, taikhan ke olop dise, aru taikhan khaise. Kintu tai singho laga mora gaw pora eitu uthaise koi kene taikhan ke kuba nai. 10Tar baba hei mahila logote namise, aru Samson ta te ekta bhoj korise, jawan manuh khan kora nisina. 11Jitia manuh khan tai ke dekhise, taikhan tai logote thakibole tisjon sathi ke anise.
12Samson taikhan ke koise, “Moi tumikhan ke ekta dhundha dibo. Sat din bhoj laga bhitorte eitu khuli dibi titia moi tumikhan ke tista mihin kapor aru tisjora kapor dibo.” 13“Kintu jodi tumikhan jawab dibo napare, tene hole moi ke tista mihin kapor aru tisjora kapor dibi.” Taikhan koise, “Tumi laga dhundha kobi; amikhan ke huni bole dibi.”
14Tai koise, “Khuwa jon pora khabole saman ulaise; takot thaka pora mitha saman ulaise.” Tin din tak taikhan hei dhundha khuli dibo para nai.
15Charo din te taikhan Samson laga maiki ke koise, “Tumi laga mota ke phuslai kene amikhan karne hei dhundha laga ortho bujhai dibole kobi, nahole amikhan tumi aru tumi laga baba laga ghor manuh ke jolai kene morai dibo. Amikhan ke lut koribole tumi amikhan ke yate matise na?”
16Samson laga maiki tar uporte kandise, “Tumi khali moi ke ghin kore; tumi moi ke morom nakore. Tumi moi laga manuh khan ke ekta dhundha dise kintu moi ke eitu laga jawab kuba nai.” Tai koise, “Moi laga baba nahole ama ke bhi kuba nai, tine hole tumi ke kele kobo?”
17Tai taikhan laga bhoj laga sat din tar uporte kandise, aru sato din te Samson tai ke koise, kilemane maiki tu pora zor korise. Tetiya tai hei dhundha tar manuh khan ke koise. 18Sato din te, suryo nabuda age te, sahar laga manuh khan tai ke koise, “Mou pora bhi ki mitha ase? Singho pora bhi ki takot ase?” Samson jawab dise, “Jodi tumikhan moi laga gai goru logote kheti nakorise koile, tumikhan kitia bhi moi laga dhundha khuli dibo para nai thakibo.”
19Tetiya amar Pitri laga Atma takot pora tar uporte ahhise. Tai Ashkelon te namise, taikhan laga tisjon manuh ke morise, taikhan laga saman loise, aru hei dhundha khuli diya khan ke taikhan laga kapor dise. Khong te jolte jolte, tai tar baba laga ghor te uporte jaise. 20Samson laga maiki ke tar sathi ke dise, jun tar shadi te mukhyo sathi hoi thakise.