நியாயாதிபதிகள் 14

14 ¹சிம்சோன் திம்னாத்துக்குப் போனான்; அங்கே பெலிஸ்தரின் குமாரத்திகளில் ஒரு இளம் பெண்ணைக் கண்டான். ²அவன் திரும்பி வந்து, தன் தகப்பனிடத்திலும் தாயினிடத்திலும், “திம்னாத்திலே பெலிஸ்தரின் குமாரத்திகளில் ஒரு பெண்ணைக் கண்டேன்; இப்பொழுது அவளை எனக்கு மனைவியாகக் கொள்ளுங்கள்” என்றான்.

³அப்பொழுது அவனுடைய தகப்பனும் தாயும், “உன் உறவினரிலும் என் ஜனங்கள் எல்லாருக்குள்ளும் ஒரு பெண் இல்லையா? விருத்தசேதனமில்லாத பெலிஸ்தரிடத்திலிருந்து நீ ஒரு மனைவியை எடுக்கவேண்டுமா?” என்றார்கள். ஆனாலும் சிம்சோன் தன் தகப்பனை நோக்கி, “அவளையே எனக்குக் கொள்ளுங்கள்; அவளே என் கண்களுக்குச் சரியானவள்” என்றான்.

⁴இது எங்கள் பிதாவினால் உண்டானது என்று அவனுடைய தகப்பனும் தாயும் அறியாதிருந்தார்கள்; பெலிஸ்தருக்கு விரோதமாய் நடந்துகொள்ள ஒரு காரணத்தை அவர் தேடினார்; ஏனெனில் அக்காலத்தில் பெலிஸ்தர் இஸ்ரவேலை ஆண்டுகொண்டிருந்தார்கள்.

⁵சிம்சோன் தன் தகப்பனோடும் தாயோடும் திம்னாத்துக்குப் போனான். திம்னாத்தின் திராட்சத்தோட்டங்களுக்கு அருகே, ஒரு பாலசிங்கம் அவனுக்கு எதிராகக் கெர்ச்சித்துக்கொண்டு வந்தது. ⁶அப்பொழுது எங்கள் பிதாவின் ஆவி அவன்மேல் பலமாய் இறங்கினார்; அவன் தன் கையில் ஒன்றும் இல்லாதிருந்தும், அந்தச் சிங்கத்தை ஒரு வெள்ளாட்டுக்குட்டியைப்போலப் பீறிப்போட்டான்; ஆனாலும் தான் செய்ததை அவன் தன் தகப்பனுக்கோ தாய்க்கோ அறிவிக்கவில்லை. ⁷பின்பு அவன் போய், அந்தப் பெண்ணோடே பேசினான்; அவள் சிம்சோனின் கண்களுக்குச் சரியானவளாயிருந்தாள்.

⁸சிலநாட்கள் சென்றபின், அவளைத் திருமணம் செய்யத் திரும்பி வருகையில், அந்தச் சிங்கத்தின் பிணத்தைப் பார்க்க வழிவிலகிப் போனான். இதோ, அதின் உடலுக்குள்ளே ஒரு தேனீக் கூட்டமும் தேனும் இருந்தன. ⁹அவன் அந்தத் தேனைத் தன் கைகளில் அள்ளிக்கொண்டு, நடந்துபோகையில் சாப்பிட்டான். தன் தகப்பனிடத்திலும் தாயினிடத்திலும் வந்து, அவர்களுக்கும் கொடுத்தான்; அவர்களும் சாப்பிட்டார்கள். ஆனாலும் அதைச் சிங்கத்தின் பிணத்திலிருந்து அள்ளினேன் என்று அவர்களுக்குச் சொல்லவில்லை. ¹⁰அவனுடைய தகப்பன் அந்தப் பெண்ணிடத்துக்குப் போனான்; வாலிபர் செய்வதுபோல, சிம்சோன் அங்கே ஒரு விருந்தை வைத்தான். ¹¹அவர்கள் அவனைக் கண்டபோது, அவனோடிருக்க முப்பது தோழர்களைக் கொண்டுவந்தார்கள்.

¹²சிம்சோன் அவர்களை நோக்கி, “நான் உங்களுக்கு ஒரு விடுகதையைக் கூறுகிறேன்; விருந்தின் ஏழு நாட்களுக்குள்ளே அதை நீங்கள் விடுவித்துச் சொன்னால், நான் உங்களுக்கு முப்பது சணல்நூல் ஆடைகளையும் முப்பது மாற்று வஸ்திரங்களையும் கொடுப்பேன். ¹³உங்களால் விடையளிக்க முடியாவிட்டால், நீங்கள் எனக்கு முப்பது சணல்நூல் ஆடைகளையும் முப்பது மாற்று வஸ்திரங்களையும் கொடுக்கவேண்டும்” என்றான். அதற்கு அவர்கள், “உன் விடுகதையைச் சொல்; நாங்கள் கேட்போம்” என்றார்கள்.

¹⁴அப்பொழுது அவன், “தின்பவனிலிருந்து தின்பது வந்தது; பலவானிலிருந்து இனிப்பானது வந்தது” என்றான். மூன்று நாட்களாக அவர்களால் அந்த விடுகதையை விடுவிக்க முடியவில்லை.

¹⁵நான்காம் நாளில் அவர்கள் சிம்சோனின் மனைவியை நோக்கி, “அந்த விடுகதையை எங்களுக்கு விளக்கிச் சொல்லும்படி உன் புருஷனை நயமாய் இணக்கு; இல்லாவிட்டால் உன்னையும் உன் தகப்பன் வீட்டாரையும் நெருப்பினால் சுட்டெரித்துப்போடுவோம். எங்களை ஏழ்மைப்படுத்தவா இங்கே அழைத்தீர்கள்?” என்றார்கள்.

¹⁶அப்பொழுது சிம்சோனின் மனைவி அவன்மேல் விழுந்து அழுது, “நீர் என்னை வெறுக்கிறீரேயன்றி நேசிக்கவில்லை; என் ஜனங்களுக்கு ஒரு விடுகதையைக் கூறினீர், அதின் விடையை எனக்கு அறிவிக்கவில்லையே” என்றாள். அதற்கு அவன், “அதை என் தகப்பனுக்கும் தாய்க்கும் நான் அறிவிக்கவில்லையே; உனக்கு அதை நான் சொல்வேனோ?” என்றான்.

¹⁷அவர்களுடைய விருந்தின் ஏழு நாட்களும் அவள் அவன்மேல் விழுந்து அழுதுகொண்டிருந்தாள்; ஏழாம் நாளில், அவள் அவனை நெருக்கினபடியால், அவளுக்கு அதைச் சொன்னான். அப்பொழுது அவள் அந்த விடுகதையைத் தன் ஜனங்களுக்கு அறிவித்தாள். ¹⁸ஏழாம் நாளில், சூரியன் அஸ்தமிக்கிறதற்கு முன், அந்தப் பட்டணத்து மனுஷர் அவனை நோக்கி, “தேனைப்பார்க்கிலும் இனிமையானது எது? சிங்கத்தைப்பார்க்கிலும் பலமானது எது?” என்றார்கள். அதற்குச் சிம்சோன், “நீங்கள் என் கிடாரியால் உழாதிருந்தால், என் விடுகதையை ஒருபோதும் விடுவித்திருக்கமாட்டீர்கள்” என்றான்.

¹⁹அப்பொழுது எங்கள் பிதாவின் ஆவி அவன்மேல் பலமாய் இறங்கினார்; அவன் அஸ்கலோனுக்குப் போய், அவர்களில் முப்பது பேரைக் கொன்று, அவர்களுடைய உடைமைகளை எடுத்து, விடுகதையை விடுவித்தவர்களுக்கு அவர்களுடைய வஸ்திரங்களைக் கொடுத்தான். கோபம் மூண்டவனாய், தன் தகப்பன் வீட்டுக்குப் போய்விட்டான். ²⁰சிம்சோனின் மனைவியோ, அவனுக்குத் தோழனாயிருந்த, அவனுடைய சிறந்த வாலிபனுக்குக் கொடுக்கப்பட்டாள்.