Waamuzi 14

14 ¹Samsoni akashuka mpaka Timna, akamwona huko mwanamke kijana, mmoja wa binti za Wafilisti. ²Akapanda na kuwaambia baba yake na mama yake, "Nimemwona mwanamke Mfilisti huko Timna; sasa nipatieni yeye awe mke wangu."

³Baba yake na mama yake wakamwambia, "Je, hakuna mwanamke miongoni mwa jamaa zako au katika watu wangu wote, hata ulazimike kutwaa mke kutoka kwa Wafilisti wasiotahiriwa?" Lakini Samsoni akamwambia baba yake, "Nipatie huyo; ndiye anayenipendeza machoni pangu."

⁴Baba yake na mama yake hawakujua kwamba jambo hili lilitoka kwa Baba yetu, aliyekuwa akitafuta sababu ya kuwashambulia Wafilisti, kwa maana wakati ule Wafilisti waliitawala Israeli.

⁵Basi Samsoni akashuka mpaka Timna pamoja na baba yake na mama yake. Walipofika kwenye mashamba ya mizabibu ya Timna, tazama, mwana-simba akamjia akinguruma. ⁶Roho wa Baba yetu akamjilia kwa nguvu, naye akampasua yule simba vipande viwili kwa mikono yake mitupu kama vile aichanavyo mwana-mbuzi, lakini hakuwaambia baba yake wala mama yake alichokifanya. ⁷Kisha akashuka, akazungumza na yule mwanamke, naye alimpendeza Samsoni machoni pake.

⁸Baadaye, aliporudi ili kumwoa, akageuka kando ili kuutazama mzoga wa yule simba. Na tazama, ndani yake mlikuwa na kundi la nyuki, na asali. ⁹Akaikwangua ile asali mikononi mwake, akala huku akitembea. Alipowafikia baba yake na mama yake, akawapa nao wakala. Lakini hakuwaambia kwamba alikuwa ameikwangua asali kutoka mzoga wa simba. ¹⁰Basi baba yake akashuka kwa yule mwanamke, naye Samsoni akafanya karamu huko, kama walivyokuwa wakifanya vijana. ¹¹Watu walipomwona, wakaleta wenzake thelathini ili wawe pamoja naye.

¹²Samsoni akawaambia, "Ngoja niwategee kitendawili. Kama mtakiteguo ndani ya siku saba za karamu, nami nitawapa mavazi thelathini ya kitani na mavazi thelathini ya kubadilisha. ¹³Lakini kama hamtaweza kunijibu, ndipo ninyi mnipe mavazi thelathini ya kitani na mavazi thelathini ya kubadilisha." Wakamwambia, "Tega kitendawili chako; na tukisikie."

¹⁴Akawaambia, "Katika mlaji kilitoka kitu cha kuliwa; katika mwenye nguvu kilitoka kitu kitamu." Kwa muda wa siku tatu wakashindwa kukitegua kile kitendawili.

¹⁵Siku ya nne wakamwambia mke wa Samsoni, "Mbembeleze mumeo atueleze maana ya kile kitendawili, la sivyo tutakuteketeza wewe na nyumba ya baba yako kwa moto. Je, mmetualika hapa ili kutunyang'anya mali zetu?"

¹⁶Mke wa Samsoni akamlilia, akisema: "Wewe wanichukia tu; hunipendi. Umewategea watu wangu kitendawili, lakini hujaniambia mimi maana yake." Akamwambia, "Tazama, sijawaambia baba yangu wala mama yangu, nikuambie wewe?"

¹⁷Akamlilia siku zile saba za karamu yao, na siku ya saba akamwambia, kwa sababu alimshinikiza sana. Kisha akawaambia watu wake kile kitendawili. ¹⁸Siku ya saba, kabla jua halijazama, watu wa mji wakamwambia, "Kitu gani kilicho kitamu kuliko asali? Kitu gani kilicho na nguvu kuliko simba?" Samsoni akawajibu, "Kama hamkulima kwa ndama wangu wa ng'ombe, msingekitegua kamwe kitendawili changu."

¹⁹Ndipo Roho wa Baba yetu akamjilia kwa nguvu. Akashuka mpaka Ashkeloni, akawaua watu thelathini miongoni mwao, akatwaa mateka yao, akawapa mavazi yao wale walioutegua kitendawili. Naye akiwaka hasira, akapanda kwenda nyumbani kwa baba yake. ²⁰Naye mke wa Samsoni akapewa kwa mwenzake, yule aliyekuwa mstari wa mbele katika arusi yake.