Onidajọ 14

14 ¹Samsoni sọ̀kalẹ̀ lọ sí Timna, ó sì rí ọ̀dọ́bìnrin kan níbẹ̀, ọ̀kan nínú àwọn ọmọbìnrin àwọn Filistini. ²Ó gòkè lọ, ó sì sọ fún baba àti ìyá rẹ̀ pé, “Mo rí obìnrin Filistini kan ní Timna; ẹ wá fẹ́ ẹ fún mi ní aya nísinsìnyí.”

³Baba àti ìyá rẹ̀ wí pé, “Ṣé kò sí obìnrin kankan nínú àwọn ìbátan rẹ, tàbí nínú gbogbo àwọn ènìyàn mi, tí ìwọ fi ní láti fẹ́ aya láti ọ̀dọ̀ àwọn Filistini aláìkọlà?” Ṣùgbọ́n Samsoni sọ fún baba rẹ̀ pé, “Ẹ fẹ́ ẹ fún mi; ó tọ́ ní ojú mi.”

⁴Baba àti ìyá rẹ̀ kò mọ̀ pé lọ́dọ̀ Baba wa ni èyí ti wá, ẹni tí ó ń wá ọ̀nà láti dojú ìjà kọ àwọn Filistini, nítorí nígbà náà àwọn Filistini ni ń ṣàkóso Israẹli.

⁵Samsoni sọ̀kalẹ̀ lọ sí Timna pẹ̀lú baba àti ìyá rẹ̀. Ní ọgbà àjàrà Timna, ọmọ kìnnìún kan ké ramúramù bọ̀ wá bá a. ⁶Ẹ̀mí Baba wa sì bà lé e, ó sì fi ọwọ́ lásán fa kìnnìún náà ya pẹ́rẹpẹ̀rẹ bí ọmọ ewúrẹ́, ṣùgbọ́n kò sọ ohun tí ó ṣe fún baba tàbí ìyá rẹ̀. ⁷Nígbà náà ni ó sọ̀kalẹ̀ lọ, ó sì bá obìnrin náà sọ̀rọ̀, obìnrin náà sì tọ́ ní ojú Samsoni.

⁸Lẹ́yìn náà, nígbà tí ó padà bọ̀ wá fẹ́ ẹ, ó yà sí ọ̀nà láti wo òkú kìnnìún náà. Sì wò ó, agbo oyin àti oyin wà nínú rẹ̀. ⁹Ó bu oyin náà sí ọwọ́ rẹ̀, ó sì ń jẹ ẹ́ bí ó ti ń rìn lọ. Nígbà tí ó dé ọ̀dọ̀ baba àti ìyá rẹ̀, ó fún wọn níbẹ̀, wọ́n sì jẹ ẹ́. Ṣùgbọ́n kò sọ fún wọn pé òkú kìnnìún ni òun ti bu oyin náà. ¹⁰Baba rẹ̀ sọ̀kalẹ̀ lọ sí ọ̀dọ̀ obìnrin náà, Samsoni sì ṣe àsè níbẹ̀, gẹ́gẹ́ bí àwọn ọ̀dọ́kùnrin ti máa ń ṣe. ¹¹Nígbà tí àwọn ènìyàn náà rí i, wọ́n mú ọgbọ̀n ọ̀rẹ́ wá láti wà pẹ̀lú rẹ̀.

¹²Samsoni sọ fún wọn pé, “Ẹ jẹ́ kí n pa àlọ́ kan fún yín. Bí ẹ bá yanjú rẹ̀ láàrín ọjọ́ àsè méje náà, èmi yóò fún yín ní ọgbọ̀n aṣọ ọ̀gbọ̀ àti ọgbọ̀n ìpààrọ̀ aṣọ. ¹³Ṣùgbọ́n bí ẹ kò bá lè dáhùn, ẹ ó fún mi ní ọgbọ̀n aṣọ ọ̀gbọ̀ àti ọgbọ̀n ìpààrọ̀ aṣọ.” Wọ́n sì wí pé, “Pa àlọ́ rẹ; jẹ́ kí a gbọ́ ọ.”

¹⁴Ó sì wí pé, “Láti inú ajẹun ni oúnjẹ ti jáde; láti inú alágbára ni ohun dídùn ti jáde.” Fún ọjọ́ mẹ́ta wọn kò lè yanjú àlọ́ náà.

¹⁵Ní ọjọ́ kẹrin, wọ́n sọ fún aya Samsoni pé, “Tan ọkọ rẹ kí ó lè ṣàlàyé àlọ́ náà fún wa, bí bẹ́ẹ̀ kọ́ àwa yóò sun ìwọ àti agbo ilé baba rẹ pa. Ṣé o pè wá wá síbí láti gba ohun ìní wa ni?”

¹⁶Aya Samsoni sì sunkún lé e lórí pé, “Kìkì kórìíra ni ìwọ kórìíra mi; ìwọ kò fẹ́ràn mi. Ìwọ pa àlọ́ fún àwọn ènìyàn mi, ṣùgbọ́n ìwọ kò sọ ìdáhùn rẹ̀ fún mi.” Ó sì wí pé, “Èmi kò tíì sọ ọ́ fún baba tàbí ìyá mi, èéṣe tí èmi ó fi sọ ọ́ fún ọ?”

¹⁷Ó sì sunkún lé e lórí ní ọjọ́ méje àsè wọn, ní ọjọ́ keje ni ó sì sọ ọ́ fún un, nítorí tí ó rọ̀ ọ́ gidigidi. Nígbà náà ni ó sọ àlọ́ náà fún àwọn ènìyàn rẹ̀. ¹⁸Ní ọjọ́ keje, kí oòrùn tó wọ̀, àwọn ọkùnrin ìlú náà sọ fún un pé, “Kí ni ó dùn ju oyin lọ? Kí ni ó lágbára ju kìnnìún lọ?” Samsoni dáhùn pé, “Bí ẹ kò bá fi abo ọmọ màlúù mi tulẹ̀, ẹ kì bá tí yanjú àlọ́ mi láéláé.”

¹⁹Nígbà náà ni Ẹ̀mí Baba wa bà lé e. Ó sọ̀kalẹ̀ lọ sí Aṣkeloni, ó pa ọgbọ̀n nínú àwọn ọkùnrin wọn, ó kó ẹrù wọn, ó sì fi aṣọ wọn fún àwọn tí ó yanjú àlọ́ náà. Pẹ̀lú ìbínú gbígbóná, ó gòkè lọ sí ilé baba rẹ̀. ²⁰A sì fi aya Samsoni fún ọ̀rẹ́ rẹ̀, ẹni tí ó ti ṣe ọ̀rẹ́ àtàtà rẹ̀.