ଶାମ୍‌ଶୋନ୍‌ଙ୍କ ବିବାହରେ ପିତାଙ୍କ ହସ୍ତ

ପିତାମାତାଙ୍କ ଆପତ୍ତି ସତ୍ତ୍ୱେ ଶାମ୍ଶୋନ ଜଣେ ପଲେଷ୍ଟୀୟ ପତ୍ନୀ ଦାବି କରନ୍ତି, ଜାଣିନଥାନ୍ତି ଯେ ଆମ ପିତା ଇସ୍ରାଏଲର ଶାସକମାନଙ୍କ ବିରୁଦ୍ଧରେ ଏକ ସୁଯୋଗ ସୃଷ୍ଟି କରୁଛନ୍ତି। ସେ ଖାଲି ହାତରେ ଏକ ସିଂହକୁ ମାରନ୍ତି, ତାହାର ଶବରୁ ମହୁ ଖାଆନ୍ତି, ଏବଂ ତାହାକୁ ନେଇ ଏକ ପ୍ରହେଳିକା ତିଆରି କରନ୍ତି। ତାଙ୍କ ପତ୍ନୀର ଲୁହ ଉତ୍ତରଟି ବାହାର କରିନିଏ, ଏବଂ ସେଥିପାଇଁ ତିରିଶ ଜଣ ମରନ୍ତି।

ଅଧ୍ୟାୟ 14।

ଶାମ୍‌ଶୋନ୍‌ ତିମ୍ନାକୁ ଓହ୍ଲାଇ ଯାଇ ସେଠାରେ ପଲେଷ୍ଟୀୟମାନଙ୍କ କନ୍ୟାମାନଙ୍କ ମଧ୍ୟରୁ ଜଣେ ଯୁବତୀକୁ ଦେଖିଲେ। ଆଉ ସେ ଉପରକୁ ଯାଇ ଆପଣା ପିତା ଓ ମାତାଙ୍କୁ କହିଲେ, “ମୁଁ ତିମ୍ନାରେ ଜଣେ ପଲେଷ୍ଟୀୟ ସ୍ତ୍ରୀକୁ ଦେଖିଲି; ଏବେ ତାହାକୁ ମୋʼ ନିମନ୍ତେ ବିବାହ କରାଇ ଆଣ।”

ତେଣୁ ତାହାଙ୍କ ପିତା ଓ ମାତା କହିଲେ, “ତୁମ୍ଭ ଜ୍ଞାତିମାନଙ୍କ ମଧ୍ୟରେ ଅବା ମୋʼ ସମସ୍ତ ଲୋକଙ୍କ ମଧ୍ୟରେ କʼଣ କୌଣସି ସ୍ତ୍ରୀ ନାହିଁ ଯେ, ତୁମ୍ଭକୁ ଅସୁନ୍ନତ ପଲେଷ୍ଟୀୟମାନଙ୍କଠାରୁ ଭାର୍ଯ୍ୟା ଆଣିବାକୁ ହେବ?” ମାତ୍ର ଶାମ୍‌ଶୋନ୍‌ ଆପଣା ପିତାଙ୍କୁ କହିଲେ, “ତାହାକୁ ମୋʼ ନିମନ୍ତେ ଆଣ; ସେ ମୋʼ ଦୃଷ୍ଟିରେ ଉତ୍ତମ ଅଟେ।”

ମାତ୍ର ଏହା ଯେ ଆମ୍ଭମାନଙ୍କ ପିତାଙ୍କଠାରୁ ଆସିଅଛି, ଏକଥା ତାହାଙ୍କ ପିତା ଓ ମାତା ଜାଣିଲେ ନାହିଁ, କାରଣ ସେ ପଲେଷ୍ଟୀୟମାନଙ୍କ ବିରୁଦ୍ଧରେ କାର୍ଯ୍ୟ କରିବା ନିମନ୍ତେ ସୂତ୍ର ଖୋଜୁଥିଲେ; ଯେଣୁ ସେସମୟରେ ପଲେଷ୍ଟୀୟମାନେ ଇସ୍ରାଏଲ ଉପରେ ରାଜତ୍ଵ କରୁଥିଲେ।

ଅନନ୍ତର ଶାମ୍‌ଶୋନ୍‌ ଆପଣା ପିତା ଓ ମାତାଙ୍କ ସହିତ ତିମ୍ନାକୁ ଓହ୍ଲାଇ ଗଲେ। ତିମ୍ନାର ଦ୍ରାକ୍ଷାକ୍ଷେତ୍ର ନିକଟରେ ଏକ ଯୁବା ସିଂହ ଗର୍ଜ୍ଜନ କରୁ କରୁ ତାହାଙ୍କ ବିରୁଦ୍ଧରେ ଆସିଲା। ସେତେବେଳେ ଆମ୍ଭମାନଙ୍କ ପିତାଙ୍କ ଆତ୍ମା ତାହାଙ୍କ ଉପରେ ବଳବାନ ଭାବେ ଆସିଲେ, ଆଉ ସେ ଛେଳିଛୁଆକୁ ଯେପରି ଚିରିପକାଏ, ସେହିପରି ଆପଣା ଖାଲି ହସ୍ତରେ ସିଂହକୁ ଚିରିପକାଇଲେ; ମାତ୍ର ସେ ଯାହା କରିଥିଲେ, ତାହା ଆପଣା ପିତା କିମ୍ବା ମାତା କାହାକୁ କହିଲେ ନାହିଁ। ତହିଁ ଉତ୍ତାରେ ସେ ଓହ୍ଲାଇ ଯାଇ ସେହି ସ୍ତ୍ରୀ ସଙ୍ଗେ କଥାବାର୍ତ୍ତା କଲେ; ଆଉ ସେ ଶାମ୍‌ଶୋନ୍‌ଙ୍କ ଦୃଷ୍ଟିରେ ଉତ୍ତମା ଥିଲା।

ପରେ ତାହାକୁ ବିବାହ କରିବା ନିମନ୍ତେ ଫେରିଯିବା ସମୟରେ ସେ ସେହି ସିଂହର ଶବ ଦେଖିବାକୁ ଏକ ପାଖକୁ ଗଲେ। ଆଉ ଦେଖ, ତହିଁ ଭିତରେ ଏକ ମହୁମାଛିର ଝାଙ୍କ ଓ ମଧୁ ଥିଲା। ତହିଁରେ ସେ ସେହି ମଧୁ ଆପଣା ହସ୍ତରେ କାଢ଼ି ନେଇ ଚାଲୁ ଚାଲୁ ଖାଇଲେ। ପୁଣି ଆପଣା ପିତା ଓ ମାତାଙ୍କ ନିକଟରେ ଉପସ୍ଥିତ ହୋଇ ସେମାନଙ୍କୁ କିଛି ଦେଲେ, ତହିଁରେ ସେମାନେ ଖାଇଲେ; ମାତ୍ର ଏହି ମଧୁ ଯେ ସେ ସିଂହର ଶବରୁ କାଢ଼ି ଆଣିଥିଲେ, ତାହା ସେମାନଙ୍କୁ କହିଲେ ନାହିଁ। ଅନନ୍ତର ତାହାଙ୍କ ପିତା ସେହି ସ୍ତ୍ରୀ ନିକଟକୁ ଓହ୍ଲାଇ ଗଲେ, ଆଉ ଯୁବକମାନଙ୍କ ରୀତି ଅନୁସାରେ ଶାମ୍‌ଶୋନ୍‌ ସେଠାରେ ଏକ ଭୋଜ କଲେ। ପୁଣି ଲୋକମାନେ ତାହାଙ୍କୁ ଦେଖନ୍ତେ, ତାହାଙ୍କ ସଙ୍ଗରେ ରହିବା ପାଇଁ ତିରିଶ ଜଣ ସଙ୍ଗୀଙ୍କୁ ଆଣିଲେ।

ତେବେ ଶାମ୍‌ଶୋନ୍‌ ସେମାନଙ୍କୁ କହିଲେ, “ମୁଁ ତୁମ୍ଭମାନଙ୍କୁ ଏକ ପ୍ରହେଳିକା କହେ। ଯଦି ତୁମ୍ଭେମାନେ ସାତ ଭୋଜ ଦିନ ମଧ୍ୟରେ ଏହାର ଅର୍ଥ କହିପାର, ତେବେ ମୁଁ ତୁମ୍ଭମାନଙ୍କୁ ତିରିଶ ଖଣ୍ଡ ସରୁ ବସ୍ତ୍ର ଓ ତିରିଶ ସାଜ ପୋଷାକ ଦେବି। ମାତ୍ର ଯଦି ତୁମ୍ଭେମାନେ ଉତ୍ତର ଦେଇ ନ ପାର, ତେବେ ତୁମ୍ଭେମାନେ ମୋତେ ତିରିଶ ଖଣ୍ଡ ସରୁ ବସ୍ତ୍ର ଓ ତିରିଶ ସାଜ ପୋଷାକ ଦେବ।” ତହିଁରେ ସେମାନେ କହିଲେ, “ତୁମ୍ଭ ପ୍ରହେଳିକା କୁହ; ଆମ୍ଭେମାନେ ତାହା ଶୁଣୁ।”

ତେଣୁ ସେ କହିଲେ, “ଭୋଜନକାରୀ ମଧ୍ୟରୁ ଖାଦ୍ୟ ବାହାରିଲା; ବଳବାନ ମଧ୍ୟରୁ ମିଷ୍ଟ ଦ୍ରବ୍ୟ ବାହାରିଲା।” ତହିଁରେ ସେମାନେ ତିନି ଦିନ ପର୍ଯ୍ୟନ୍ତ ସେହି ପ୍ରହେଳିକାର ଅର୍ଥ କହିପାରିଲେ ନାହିଁ।

ଅନନ୍ତର ଚତୁର୍ଥ ଦିନରେ ସେମାନେ ଶାମ୍‌ଶୋନ୍‌ଙ୍କ ଭାର୍ଯ୍ୟାକୁ କହିଲେ, “ତୁମ୍ଭ ସ୍ଵାମୀକୁ ମଣାଇ ଆମ୍ଭମାନଙ୍କ ପାଇଁ ସେହି ପ୍ରହେଳିକାର ଅର୍ଥ କଢ଼ାଅ, ନୋହିଲେ ଆମ୍ଭେମାନେ ତୁମ୍ଭକୁ ଓ ତୁମ୍ଭ ପିତୃଗୃହକୁ ଅଗ୍ନିରେ ଦଗ୍ଧ କରିବୁ। ଆମ୍ଭମାନଙ୍କର ସର୍ବସ୍ଵ ଅପହରଣ କରିବା ନିମନ୍ତେ କʼଣ ତୁମ୍ଭେମାନେ ଆମ୍ଭମାନଙ୍କୁ ଏଠାକୁ ନିମନ୍ତ୍ରଣ କରିଅଛ?”

ତହିଁରେ ଶାମ୍‌ଶୋନ୍‌ଙ୍କ ଭାର୍ଯ୍ୟା ତାହାଙ୍କ ସମ୍ମୁଖରେ ରୋଦନ କରି କହିଲା, “ତୁମ୍ଭେ କେବଳ ମୋତେ ଘୃଣା କରୁଅଛ; ତୁମ୍ଭେ ମୋତେ ପ୍ରେମ କରୁ ନାହଁ। ତୁମ୍ଭେ ମୋʼ ଲୋକମାନଙ୍କୁ ଏକ ପ୍ରହେଳିକା କହିଅଛ, ମାତ୍ର ତାହାର ଅର୍ଥ ମୋତେ କହି ନାହଁ।” ତେବେ ସେ କହିଲେ, “ଦେଖ, ମୁଁ ଆପଣା ପିତା କିମ୍ବା ମାତାଙ୍କୁ ତାହା କହି ନାହିଁ, ତେବେ ତୁମ୍ଭକୁ କାହିଁକି କହିବି?”

ଆଉ ସେ ସେମାନଙ୍କ ଭୋଜର ସାତ ଦିନ ତାହାଙ୍କ ସମ୍ମୁଖରେ ରୋଦନ କଲା; ପୁଣି ସପ୍ତମ ଦିନରେ ସେ ତାହାକୁ ତାହାର ଅର୍ଥ କହିଲେ, କାରଣ ସେ ତାହାଙ୍କୁ ବଡ଼ ବ୍ୟସ୍ତ କରିଥିଲା। ତହିଁ ଉତ୍ତାରେ ସେ ଆପଣା ଲୋକମାନଙ୍କୁ ସେହି ପ୍ରହେଳିକାର ଅର୍ଥ କହିଲା। ପୁଣି ସପ୍ତମ ଦିନରେ ସୂର୍ଯ୍ୟାସ୍ତ ପୂର୍ବରୁ ନଗରର ଲୋକମାନେ ତାହାଙ୍କୁ କହିଲେ, “ମଧୁଠାରୁ ଅଧିକ ମିଷ୍ଟ କʼଣ? ସିଂହଠାରୁ ଅଧିକ ବଳବାନ କʼଣ?” ତହିଁରେ ଶାମ୍‌ଶୋନ୍‌ ଉତ୍ତର ଦେଲେ, “ଯଦି ତୁମ୍ଭେମାନେ ମୋʼ ବାଛୁରୀ ଦ୍ଵାରା ହଳ ନ କରିଥାʼନ୍ତ, ତେବେ ତୁମ୍ଭେମାନେ କେବେହେଲେ ମୋʼ ପ୍ରହେଳିକାର ଅର୍ଥ କହିପାରି ନ ଥାʼନ୍ତ।”

ଅନନ୍ତର ଆମ୍ଭମାନଙ୍କ ପିତାଙ୍କ ଆତ୍ମା ତାହାଙ୍କ ଉପରେ ବଳବାନ ଭାବେ ଆସିଲେ। ତହିଁରେ ସେ ଅସ୍କିଲୋନକୁ ଓହ୍ଲାଇ ଯାଇ ସେମାନଙ୍କ ତିରିଶ ଜଣ ଲୋକଙ୍କୁ ବଧ କଲେ ଓ ସେମାନଙ୍କ ସମ୍ପତ୍ତି ନେଇ, ଯେଉଁମାନେ ପ୍ରହେଳିକାର ଅର୍ଥ କହିଥିଲେ, ସେମାନଙ୍କୁ ସେମାନଙ୍କ ପୋଷାକ ଦେଲେ। ପୁଣି କ୍ରୋଧରେ ପ୍ରଜ୍ଵଳିତ ହୋଇ ସେ ଆପଣା ପିତୃଗୃହକୁ ଉଠିଗଲେ। ମାତ୍ର ଶାମ୍‌ଶୋନ୍‌ଙ୍କ ଭାର୍ଯ୍ୟା ତାହାଙ୍କ ସଙ୍ଗୀ, ଅର୍ଥାତ୍‌ ଯେ ତାହାଙ୍କ ମିତ୍ର ଥିଲା, ତାହାକୁ ଦିଆଗଲା।