መሳፍንት 14

14 ¹ሳምሶን ወደ ተምናት ወረደ፤ በዚያም ከፍልስጥኤማውያን ሴቶች ልጆች መካከል አንዲት ወጣት ሴት አየ። ²ተመልሶም ወደ አባቱና ወደ እናቱ ወጥቶ፣ “በተምናት አንዲት ፍልስጥኤማዊት ሴት አየሁ፤ አሁንም ሚስት ትሆነኝ ዘንድ አጋቡኝ” አላቸው።

³አባቱና እናቱም፣ “ከዘመዶችህ ወይም ከሕዝቤ ሁሉ መካከል ሴት ጠፍታ ነውን ካልተገረዙት ፍልስጥኤማውያን ሚስት ማግባት የምትሻው?” አሉት። ሳምሶን ግን አባቱን፣ “እርሷ በዐይኔ መልካም ናትና አጋባኝ” አለው።

⁴አባቱና እናቱ ይህ ነገር ከአባታችን እንደ ሆነ አላወቁም ነበር፤ እርሱም በፍልስጥኤማውያን ላይ ለመነሣት ምክንያት ይፈልግ ነበር፤ በዚያ ዘመን ፍልስጥኤማውያን እስራኤልን ይገዙ ነበርና።

⁵ሳምሶን ከአባቱና ከእናቱ ጋራ ወደ ተምናት ወረደ። በተምናት ወይን ተክል አጠገብም አንድ ጎልማሳ አንበሳ እያገሣ ወደ እርሱ መጣ። ⁶የአባታችንም መንፈስ በኀይል በእርሱ ላይ መጣ፤ ምንም ሳይዝም አንበሳውን እንደ ፍየል ጠቦት በእጁ ቀደደው፤ ያደረገውን ግን ለአባቱም ሆነ ለእናቱ አልነገረም። ⁷ከዚያም ወርዶ ከሴቲቱ ጋራ ተነጋገረ፤ እርሷም በሳምሶን ዐይን መልካም ሆነች።

⁸ከጥቂት ጊዜ በኋላም ሊያገባት ሲመለስ፣ የአንበሳውን በድን ለማየት ፈቀቅ አለ። እነሆም፣ በአንበሳው አካል ውስጥ የንብ መንጋና ማር ነበረ። ⁹ማሩንም በእጆቹ ዛቅ አድርጎ እየተራመደ በላ። ወደ አባቱና ወደ እናቱም በደረሰ ጊዜ ሰጣቸው፤ እነርሱም በሉ። ማሩን ከአንበሳው በድን እንደ ዛቀው ግን አልነገራቸውም። ¹⁰አባቱም ወደ ሴቲቱ ወረደ፤ ሳምሶንም ጎልማሶች እንደሚያደርጉት በዚያ ድግስ አደረገ። ¹¹ሰዎቹም ባዩት ጊዜ፣ ከእርሱ ጋራ ይሆኑ ዘንድ ሠላሳ ጓደኞች አመጡ።

¹²ሳምሶንም፣ “እስቲ እንቆቅልሽ ልንገራችሁ። በሰባቱ የድግስ ቀኖች ውስጥ ፍቺውን ብትነግሩኝ፣ ሠላሳ የበፍታ ልብስና ሠላሳ ጥንድ ልብስ እሰጣችኋለሁ። ¹³ልትፈቱት ባትችሉ ግን፣ ሠላሳ የበፍታ ልብስና ሠላሳ ጥንድ ልብስ ትሰጡኛላችሁ” አላቸው። እነርሱም፣ “እንቆቅልሽህን ንገረን፤ እንስማው” አሉት።

¹⁴እርሱም፣ “ከበይው የሚበላ ወጣ፤ ከብርቱውም ጣፋጭ ወጣ” አላቸው። ሦስት ቀንም እንቆቅልሹን ሊፈቱት አልቻሉም።

¹⁵በአራተኛውም ቀን የሳምሶንን ሚስት፣ “እንቆቅልሹን እንዲፈታልን ባልሽን አባብዪው፤ አለዚያ አንቺንና የአባትሽን ቤተ ሰብ በእሳት እናቃጥላችኋለን። ልትዘርፊን ነውን ወደዚህ የጠራሽን?” አሏት።

¹⁶የሳምሶንም ሚስት በእርሱ ላይ እያለቀሰች፣ “አንተ ትጠላኛለህ እንጂ አትወደኝም። ለሕዝቤ እንቆቅልሽ ሰጠህ፤ ፍቺውን ግን አልነገርኸኝም” አለችው። እርሱም፣ “ለአባቴም ሆነ ለእናቴ አልነገርሁም፤ ታዲያ አንቺን እንዴት እነግርሻለሁ?” አላት።

¹⁷በድግሳቸውም ሰባት ቀን በእርሱ ላይ አለቀሰች፤ አጥብቃ ስለ ገፋፋችውም በሰባተኛው ቀን ነገራት። እርሷም እንቆቅልሹን ለሕዝቧ ነገረች። ¹⁸በሰባተኛውም ቀን ፀሓይ ሳትጠልቅ የከተማው ሰዎች፣ “ከማር የሚጣፍጥ ምንድን ነው? ከአንበሳስ የሚበረታ ምንድን ነው?” አሉት። ሳምሶንም፣ “በጥጃዬ ባላረሳችሁ ኖሮ፣ እንቆቅልሼን ከቶ ባልፈታችሁትም ነበር” ብሎ መለሰ።

¹⁹ከዚያም የአባታችን መንፈስ በኀይል በእርሱ ላይ መጣ። ወደ አስቀሎናም ወርዶ ከሰዎቻቸው ሠላሳውን ገደለ፤ ንብረታቸውንም ወስዶ ልብሳቸውን እንቆቅልሹን ለፈቱት ሰጠ። በቍጣም እየነደደ ወደ አባቱ ቤት ወጣ። ²⁰የሳምሶንም ሚስት ሚዜው ለነበረው ለጓደኛው ተሰጠች።