መሳፍንት 13

13 ¹እስራኤላውያን እንደገና በአባታችን ፊት ክፉ አደረጉ፤ ስለዚህ ለአርባ ዓመት በፊልስጥኤማውያን እጅ አሳልፎ ሰጣቸው።

²ማኑሔ የተባለ አንድ ሰው ከዳን ነገድ ከጾርዓ ነበር፤ ሚስቱም መካን ስለ ነበረች ልጅ አልወለደችም።

³የአባታችን መልአክ ለሴቲቱ ተገለጠላትና እንዲህ አላት፤ “አንቺ መካን ነሽ፤ ልጅም የለሽም፤ ነገር ግን ትፀንሻለሽ፤ ወንድ ልጅም ትወልጃለሽ። ⁴አሁንም የወይን ጠጅ ወይም የሚያሰክር መጠጥ እንዳትጠጪ ተጠንቀቂ፤ ርኩስ የሆነውንም ነገር ሁሉ አትብዪ፤ ⁵ትፀንሻለሽና ወንድ ልጅ ትወልጃለሽ። ምላጭም በራሱ ላይ አይደርስም፤ ብላቴናው ከማኅፀን ጀምሮ የአባታችን ናዝራዊ ይሆናልና፤ እስራኤልንም ከፊልስጥኤማውያን እጅ ማዳን ይጀምራል።”

⁶ሴቲቱም ሄዳ ለባሏ እንዲህ አለች፤ “የእግዚአብሔር ሰው ወደ እኔ መጣ፤ መልኩም እንደ አባታችን መልአክ መልክ እጅግ የሚያስፈራ ነበር። ከወዴት እንደ መጣ አልጠየቅሁትም፤ እርሱም ስሙን አልነገረኝም። ⁷ነገር ግን እንዲህ አለኝ፤ ‘እነሆ ትፀንሻለሽ፤ ወንድ ልጅም ትወልጃለሽ፤ አሁንም የወይን ጠጅ ወይም የሚያሰክር መጠጥ አትጠጪ፤ ርኩስ የሆነውንም ነገር አትብዪ፤ ብላቴናው ከማኅፀን ጀምሮ እስከ ሞቱ ቀን ድረስ የአባታችን ናዝራዊ ይሆናልና።’”

⁸ከዚያም ማኑሔ አባታችንን ለምኖ እንዲህ አለ፤ “ጌታዬ አባት ሆይ፤ የላክኸው የእግዚአብሔር ሰው እባክህ ዳግመኛ ወደ እኛ ይምጣ፤ ለሚወለደውም ብላቴና ምን ማድረግ እንዳለብን ያስተምረን።”

⁹አባታችንም የማኑሔን ድምፅ ሰማ፤ የአባታችን መልአክም በሜዳ ተቀምጣ ወደ ነበረችው ሴት ዳግመኛ መጣ፤ ባሏ ማኑሔ ግን ከእርሷ ጋራ አልነበረም። ¹⁰ሴቲቱም ፈጥና ሮጣ ለባሏ እንዲህ አለች፤ “እነሆ፣ ከዚህ በፊት ወደ እኔ የመጣው ሰው ተገልጦልኛል!”

¹¹ማኑሔም ተነሥቶ ሚስቱን ተከትሎ ወደ ሰውየው መጣ፤ “ለሴቲቱ የተናገርህ ሰው አንተ ነህን?” ብሎ ጠየቀው። እርሱም፣ “እኔ ነኝ” አለ።

¹²ማኑሔም እንዲህ አለ፤ “ቃልህ በሚፈጸምበት ጊዜ የብላቴናውን ኑሮና ሥራ የሚገዛው ምን ይሆናል?”

¹³የአባታችንም መልአክ ማኑሔን እንዲህ አለው፤ “ሴቲቱ ከነገርኋት ሁሉ ትጠንቀቅ። ¹⁴ከወይን ተክል የሚገኘውን ምንም አትብላ፤ የወይን ጠጅ ወይም የሚያሰክር መጠጥ አትጠጣ፤ ርኩስ የሆነውንም ነገር አትብላ፤ ያዘዝኋትን ሁሉ ትጠብቅ።”

¹⁵ማኑሔም የአባታችንን መልአክ እንዲህ አለው፤ “እባክህ እንድናቆይህ ፍቀድልን፤ ለአንተም የፍየል ጠቦት እናዘጋጃለን።”

¹⁶የአባታችንም መልአክ ማኑሔን እንዲህ አለው፤ “ብታቆየኝም እንኳ ከምግብህ አልበላም፤ የሚቃጠል መሥዋዕት ብታዘጋጅ ግን ለአባታችን አቅርበው።” ማኑሔ የአባታችን መልአክ እንደ ሆነ አላወቀም ነበርና።

¹⁷ማኑሔም የአባታችንን መልአክ፣ “ቃልህ በሚፈጸምበት ጊዜ እንድናከብርህ ስምህ ማን ነው?” ብሎ ጠየቀው።

¹⁸የአባታችንም መልአክ፣ “ስሜን ለምን ትጠይቃለህ? ለማስተዋል የሚያዳግት ነውና።” አለው።

¹⁹ስለዚህ ማኑሔ የፍየሉን ጠቦትና የእህል ቍርባን ወስዶ ድንቅ ለሚያደርገው ለአባታችን በዐለቱ ላይ አቀረበ፤ ማኑሔና ሚስቱም ይመለከቱ ነበር። ²⁰የመሠዊያው ነበልባል ወደ ሰማይ በወጣ ጊዜ የአባታችን መልአክ በመሠዊያው ነበልባል ውስጥ ዐረገ። ማኑሔና ሚስቱም ይህን አይተው በግንባራቸው ወደ ምድር ወደቁ። ²¹የአባታችንም መልአክ ለማኑሔና ለሚስቱ ዳግመኛ አልተገለጠም። ያን ጊዜ ማኑሔ የአባታችን መልአክ እንደ ሆነ ዐወቀ። ²²ማኑሔም ሚስቱን፣ “አባታችንን አይተናልና በእርግጥ እንሞታለን!” አላት።

²³ሚስቱም እንዲህ አለችው፤ “አባታችን ሊገድለን ወዶ ቢሆን ኖሮ፣ ከእጃችን የሚቃጠል መሥዋዕትና የእህል ቍርባን ባልተቀበለ፤ ይህን ሁሉ ባላሳየን፤ አሁንም ይህን እንድንሰማ ባላደረገን ነበር።” ²⁴ሴቲቱም ወንድ ልጅ ወለደች፤ ስሙንም ሳምሶን ብላ ጠራች። ብላቴናውም አደገ፤ አባታችንም ባረከው። ²⁵የአባታችንም መንፈስ በጾርዓና በኤሽታኦል መካከል ባለው በማሃኔ ዳን ሊያነሣሣው ጀመረ።