Judges 13 FHB Father's Heart Bible™

13 ¹Aru Israel manuh khan amar Pitri laga suku te biya kaam korise, etu karne Tar pora tarkhan ke chalis saal tak Philistine khan laga hath te di dise.

²Dan jati laga Zorah sohor pora, Manoah naam laga ekjon manuh thakise, tar laga maiki bonjha thakise aru bacha janam diya nai.

³Amar Pitri laga doot tu maiki ke dikhai dise aru tar ke koise, “Tumi bonjha ase, bacha nai, kintu tumi pet te bacha rakhibo aru ekjon chokra janam dibo. ⁴Etiya hoshiar thakibi, angur ros nahole tez pani nakhabi, aru letera kiba jinis bhi nakhabi, ⁵kilemane tumi pet te bacha rakhibo aru ekjon chokra janam dibo. Tar matha te ustura nalagabo, kilemane chokra tu janam pora amar Pitri laga Nazirite hobo, aru Israel ke Philistine khan laga hath pora bachabole shuru koribo.”

⁶Maiki tu jai kene tar mota ke koise, “Isor laga ekjon manuh moi logot ahhise; tar chehera amar Pitri laga doot laga chehera nisena, bisi bhoi-lagi bhala thakise. Moi tar ke kot pora ahhise koi kene huda nai, aru tar pora moi ke tar naam kowa nai.” ⁷Kintu tar pora moi ke koise, “Tumi pet te bacha rakhibo aru ekjon chokra janam dibo. Etiya angur ros nahole tez pani nakhabi, aru letera kiba jinis bhi nakhabi, kilemane chokra tu janam pora tar mora din tak amar Pitri laga Nazirite hobo.”

⁸Tetiya Manoah pora amar Pitri logot te binti korise, “Moi binti kori ase, moi laga Malik Pitri, Apuni pathai diya Isor laga manuh tu amikhan logot aru ekbar ahhibole dibi aru janam hobole thaka chokra karne ki koribo lage etu amikhan ke sikhai dibi.”

⁹Amar Pitri pora Manoah laga awaj hunise; amar Pitri laga doot tu kheti te bohi thaka maiki logot aru ahhise, kintu tar mota Manoah tai logot thaka nai. ¹⁰Maiki tu joldi polai jai kene tar mota ke koise, “Sabi, aghe din moi logot ahhi thaka manuh tu moi ke aru dikhai dise!”

¹¹Manoah uthi kene, tar maiki laga pichete jai kene, hei manuh logot ahhise. Tai hudise, “Maiki ke kotha kowa manuh tu Apuni ase?” “Moi ase,” tai koise.

¹²Manoah koise, “Apuni laga kotha hosa hoile, chokra laga jivon aru kaam karne ki niyom thakibo?”

¹³Amar Pitri laga doot tu Manoah ke koise, “Moi tai ke kowa sob kotha karne tai hoshiar thakibo lage. ¹⁴Tai angur gash pora kiba jinis nakhabo lage, angur ros nahole tez pani nakhabo lage, aru letera kiba jinis bhi nakhabo lage. Moi tai ke hukum diya sob kotha tai mani kene thakibo lage.”

¹⁵Manoah pora amar Pitri laga doot ke koise, “Amikhan Apuni ke rakhibole dibi, aru amikhan Apuni karne ekta chutu saguli taiyar kori dibo.”

¹⁶Amar Pitri laga doot tu Manoah ke koise, “Tumi moi ke rakhile bhi, moi tumar kha-luwa nakhabo; kintu tumi ekta juli diya bolidan taiyar korile, etu amar Pitri ke dibi.” (Manoah pora etu ahhi thaka manuh amar Pitri laga doot ase koi kene jana nai.).

¹⁷Manoah pora amar Pitri laga doot ke hudise, “Apuni laga naam ki ase, titia Apuni laga kotha hosa hoile amikhan Apuni ke sonman koribo paribo?”

¹⁸Amar Pitri laga doot tu tar ke koise, “Kile moi laga naam hudi ase? Etu bujibo napara ase.”

¹⁹Etu karne Manoah pora chutu saguli aru anaj daan loise, aru aschorjo kaam kora amar Pitri ke pathor uporte etu dise, Manoah aru tar maiki sai thaka homoi te. ²⁰Bedi laga jui-lau sorgo phale uthi thaka homoi te, amar Pitri laga doot tu bedi laga jui-lau te uthi jaise. Manoah aru tar maiki dikhise aru matite mukh niche kori giri porise. ²¹Amar Pitri laga doot tu Manoah aru tar maiki ke aru dikhai diya nai. Tetiya hei doot tu amar Pitri laga doot ase koi kene Manoah jani loise. ²²“Amikhan hosa pora moribo,” Manoah pora tar maiki ke koise, “kilemane amikhan amar Pitri ke dikhi loise!”

²³Tar maiki pora tai ke koise, “Jodi amar Pitri amikhan ke morai dibole mon korise koile, Tai amikhan laga hath pora juli diya bolidan aru anaj daan grohon nakoribo asele, amikhan ke eitu sob nadikhabo asele, aru etiya eitu kotha huni bole bhi nadibo asele.” ²⁴Maiki tu ekjon chokra janam dise aru tar naam Samson rakhise. Chokra tu dangor hoise, aru amar Pitri pora tar ke asirbad dise. ²⁵Aru amar Pitri laga Atma pora Zorah aru Eshtaol majot te, Mahaneh-dan te, tar ke jagai dibole shuru korise.