Hakim-Hakim 13 FHB Father's Heart Bible™

13 ¹Urang Israil deui-deui migawe nu jahat dina soca Rama urang, nu matak ku Mantenna diselehkeun kana leungeun urang Pelisti opat puluh taun lilana.

²Aya hiji lalaki ngaranna Manoah, urang Soreah ti kaom Dan. Pamajikanana gabug, teu boga anak.

³Malaikat Rama urang nembongan ka eta awewe, saurna, “Maneh teh gabug, teu boga anak, tapi bakal ngandung sarta ngalahirkeun anak lalaki. ⁴Ku sabab eta, sing ati-ati, maneh ulah nginum anggur atawa inuman keras, jeung ulah ngadahar naon bae nu haram, ⁵sabab maneh bakal ngandung sarta ngalahirkeun anak lalaki. Sirahna ulah nepi ka kasabit ku piso cukur, sabab budak teh bakal jadi Nasir kagungan Rama urang ti barang dikandung, sarta bakal mimiti nyalametkeun Israil tina leungeun urang Pelisti.”

⁶Eta awewe tuluy nepangan salakina, pokna, “Aya hiji abdi Allah datang ka kuring; rupana kawas rupa malaikat Rama urang, kacida pikagimireunana. Kuring teu nanya ti mana asalna, jeung manehna ge teu ngabejaan ngaranna.” ⁷Tapi ceuk manehna ka kuring, “Maneh bakal ngandung sarta ngalahirkeun anak lalaki. Ayeuna maneh ulah nginum anggur atawa inuman keras, jeung ulah ngadahar nanaon nu haram, ‘sabab budak teh bakal jadi Nasir kagungan Rama urang ti barang dikandung nepi ka poe ajalna.’”

⁸Tuluy Manoah neneda ka Rama urang, “Nun Ama, Gusti abdi, mugi abdi Allah anu ku Ama diutus teh kersa sumping deui ka abdi sadaya, sarta ngawurukan kedah kumaha ngurus budak anu bakal dilahirkeun teh.”

⁹Rama urang ngadangu panyambat Manoah; malaikat Rama urang sumping deui ka eta awewe anu keur diuk di tegalan, tapi Manoah salakina harita teu aya di dinya. ¹⁰Eta awewe gancang lumpat nepangan salakina, pokna, “Tuh, jelema anu datang ka kuring tempo hari teh nembongan deui ka kuring!”

¹¹Manoah cengkat, nuturkeun pamajikanana, tuluy datang ka eta jelema. Manoah nanya, “Naha anjeun teh anu nyarios ka pamajikan kuring tea?” Waler eta jelema, “Enya, Kami.”

¹²Ceuk Manoah, “Upami pangandika anjeun geus laksana, naon anu kedah jadi cecekelan hirup sareng pagawean budak teh?”

¹³Waler malaikat Rama urang ka Manoah, “Pamajikan maneh kudu ngajaga sakabeh anu geus dibejakeun ku Kami ka manehna. ¹⁴Manehna ulah ngadahar naon bae nu asalna ti tangkal anggur, ulah nginum anggur atawa inuman keras, jeung ulah ngadahar nanaon nu haram. Manehna kudu ngalakonan sakabeh anu geus diparentahkeun ku Kami ka manehna.”

¹⁵Ceuk Manoah ka malaikat Rama urang, “Mugi anjeun kersa reureuh heula sakedap, bade disayogikeun anak embe.”

¹⁶Waler malaikat Rama urang ka Manoah, “Sanajan maneh nahan Kami, Kami moal ngadahar kadaharan maneh; tapi lamun maneh nyadiakeun kurban beuleuman, haturkeun ka Rama urang.” (Manoah teu nyahoeun yen eta tamu teh malaikat Rama urang.).

¹⁷Manoah mihatur ka malaikat Rama urang, “Saha jenengan anjeun, supados abdi sadaya iasa ngamulyakeun anjeun upami pangandika anjeun geus laksana?”

¹⁸Waler malaikat Rama urang ka manehna, “Ku naon maneh nanyakeun ngaran Kami? Eta teh teu kahontal ku akal.”

¹⁹Tuluy Manoah nyokot anak embe jeung kurban gandum, terus dihaturkeun di luhureun batu ka Rama urang, Anu midamel perkara-perkara aheng, dibarengan ku Manoah jeung pamajikanana anu narenjo. ²⁰Waktu seuneu tina altar ngelun ka luhur ka langit, malaikat Rama urang unggah dina jero seuneu altar tea. Manoah jeung pamajikanana narenjo, tuluy nyuuh kana taneuh. ²¹Ti harita malaikat Rama urang teu nembongan deui ka Manoah jeung pamajikanana. Manoah kakara nyaho yen eta teh malaikat Rama urang. ²²Ceuk Manoah ka pamajikanana, “Urang tangtu bakal paeh, sabab urang geus narenjo Rama urang!”

²³Ceuk pamajikanana, “Lamun Rama urang rek maehan urang, tangtu Mantenna moal kersa nampi kurban beuleuman jeung kurban gandum tina leungeun urang, moal nembongkeun ieu sakabeh ka urang, jeung moal ngawartoskeun ieu ka urang ayeuna.” ²⁴Eta awewe ngalahirkeun anak lalaki, dingaranan Simson. Budak teh beuki gede, sarta diberkahan ku Rama urang. ²⁵Jeung Roh Rama urang mimiti ngagerakkeun manehna di Mahane-dan, antara Soreah jeung Estaol.