Ndị Ikpe 13 FHB Father's Heart Bible™

13 ¹Ụmụ Izrel mekwara ihe ọjọọ ọzọ nʼanya Nna anyị, nʼihi ya o weere ha nyefee nʼaka ndị Filistia ruo afọ iri anọ.

²O nwere otu nwoke aha ya bụ Manoa, onye si Zora nke ikwu ndị Dan. Nwunye ya bụ nwanyị aga, nke na-amụghị ụmụ.

³Onyeozi Nna anyị pụtara ìhè nye nwanyị ahụ sị ya, “Ị bụ nwanyị aga, onye na-amụghị nwa, ma ị ga-atụrụ ime mụọ nwa nwoke. ⁴Ugbu a, lezie anya ka ị ghara ịṅụ mmanya maọbụ ihe ọṅụṅụ na-aba nʼanya, erikwala ihe ọbụla na-adịghị ọcha, ⁵nʼihi na ị ga-atụrụ ime mụọ nwa nwoke. Agụba agaghị emetụ isi ya aka, nʼihi na nwa ahụ ga-abụ onye Nazirait nke Nna anyị site nʼafọ nne ya, ọ ga-amalitekwa ịzọpụta Izrel site nʼaka ndị Filistia.”

⁶Nwanyị ahụ gara gwa di ya sị, “Otu onye nke Chineke bịakwutere m; ọdịdị ya dị ka ọdịdị onyeozi Nna anyị, dị oke egwu. Ajụghị m ya ebe o si bịa, ọ gwaghịkwa m aha ya.” ⁷Ma ọ sịrị m, “Ị ga-atụrụ ime mụọ nwa nwoke. Ugbu a, aṅụla mmanya maọbụ ihe ọṅụṅụ na-aba nʼanya, erila ihe ọbụla na-adịghị ọcha, nʼihi na nwa ahụ ga-abụ onye Nazirait nke Nna anyị site nʼafọ nne ya ruo ụbọchị ọnwụ ya.”

⁸Mgbe ahụ Manoa rịọrọ Nna anyị arịrịọ sị, “Biko, Nna m, Onyenwe m, mee ka onye nke Chineke ahụ i zitere bịakwute anyị ọzọ, kuziere anyị ihe anyị ga-eme maka nwa ahụ a ga-amụ.”

⁹Nna anyị nụrụ olu Manoa; onyeozi Nna anyị bịakwutere nwanyị ahụ ọzọ mgbe ọ nọdụ ala nʼọhịa, ma Manoa di ya esoghị ya nọ. ¹⁰Nwanyị ahụ jiri ọsọ gbakwuru gwa di ya sị, “Lee, nwoke ahụ bịakwutere m ụbọchị nke ọzọ apụtakwarala m ìhè!”

¹¹Manoa biliri soro nwunye ya bịakwute nwoke ahụ. Ọ jụrụ ya sị, “Ọ bụ gị bụ nwoke ahụ gwara nwanyị ahụ okwu?” Ọ zara sị, “Ọ bụ m.”

¹²Manoa sịrị, “Mgbe okwu gị ga-emezu, gịnị ga-achị ndụ na ọrụ nwa ahụ?”

¹³Onyeozi Nna anyị sịrị Manoa, “Nwanyị ahụ ga-akpachara anya banyere ihe niile m gwara ya. ¹⁴Ọ gaghị eri ihe ọbụla si nʼosisi vaịn, ọ gaghị aṅụ mmanya maọbụ ihe ọṅụṅụ na-aba nʼanya, ọ gaghịkwa eri ihe ọbụla na-adịghị ọcha. Ọ ga-edebe ihe niile m nyere ya nʼiwu.”

¹⁵Manoa sịrị onyeozi Nna anyị, “Biko, ka anyị jigide gị, anyị ga-akwadebekwara gị nwa ewu.”

¹⁶Onyeozi Nna anyị sịrị Manoa, “Ọ bụrụgodị na ị jigide m, agaghị m eri nri gị; ma ọ bụrụ na ị kwadoo aja nsure ọkụ, chụọ ya nye Nna anyị.” (Manoa amaghị na onye ọbịa ahụ bụ onyeozi Nna anyị.).

¹⁷Manoa jụrụ onyeozi Nna anyị sị, “Gịnị bụ aha gị, ka anyị wee sọpụrụ gị mgbe okwu gị ga-emezu?”

¹⁸Onyeozi Nna anyị sịrị ya, “Gịnị mere i ji ajụ aha m? Ọ karịrị nghọta.”

¹⁹Ya mere Manoa weere nwa ewu ahụ na aja mkpụrụ ọka chụọ ya nʼelu nkume nye Nna anyị, Onye na-arụ ọrụ ebube, ebe Manoa na nwunye ya na-ele anya. ²⁰Ka ire ọkụ ebe ịchụ aja na-arịgo nʼeluigwe, onyeozi Nna anyị rịgoro nʼime ire ọkụ ebe ịchụ aja ahụ. Manoa na nwunye ya hụrụ ya daa kpuchie ihu ha nʼala. ²¹Onyeozi Nna anyị egosikwaghị onwe ya ọzọ nye Manoa na nwunye ya. Mgbe ahụ Manoa matara na ọ bụ onyeozi Nna anyị. ²²“Anyị ga-anwụrịrị anwụ,” Manoa gwara nwunye ya, “nʼihi na anyị ahụla Nna anyị!”

²³Nwunye ya gwara ya sị, “A sị na Nna anyị bu nʼobi igbu anyị, ọ garaghị anara aja nsure ọkụ na aja mkpụrụ ọka site nʼaka anyị, maọbụ gosi anyị ihe ndị a niile, maọbụ mee ka anyị nụ ihe dị ka nke a ugbu a.” ²⁴Nwanyị ahụ mụrụ nwa nwoke gụọ ya Samsịn. Nwa ahụ tolitere, Nna anyị gọzikwara ya. ²⁵Mmụọ nke Nna anyị malitere ịkpali ya na Mahane-dan, nke dị nʼetiti Zora na Eshtaol.