Kayomtoi Kwanda Weeriit
Kigoochi piigap Israel eng' eunegap Philistiik kenyiisyek artam. Ki mwachi malaikaiyatap Kwandanyo osotyot ne sonen kole isich weeriit ne kingobooch moet, ak koweekyigei ye kasaa Manoa. Ki ne po kwong'eet miising' kainetap toondet ne kanyoonu; kotogostae eng' liplibenetap maat. Ki kisich Samson ak kaberuret.
Ng'alaali Kwandanyo eng' mustarisyek 3–5, 11, 13–14, 16, 18
13 1Ki yai kogeny piigap Israel ne ya eng' konyegap Kwandanyo, si kogoochi icheek eng' eunegap Philistiik kenyiisyek artam.
2Ki mi chiito age ne kiguure Manoa, ne po Sora ne po ooreetap Danik; ki tinyei osotyot ne sonen ne ma kotinyei lagok.
3Komong'ji malaikaiyatap Kwandanyo kwonyooto, koleenji, “Isonen ak ima tinyei lagok, ago imanachi ak isich weeriit. 4Nguno anyun, riipkei amee divaik anan ye kigimit, ak amat iam kiy age tugul ne ng'wony, 5amu imanachi ak isich weeriit. Ma kicher metinnyi, amu koek weerooto Nasaretindetap Kwandanyo kobooch moet, ak kotoi kosar Israel eng' eunegap Philistiik.”
6Ki wo kwonyooto komwachi manong'otyonnyi, koleenji, “Ki nyoono anee chiitap Kamuktaindet; ki uu itoondanyi itoondap malaikaiyatap Kwandanyo, ne po kwong'eet miising'. Ma atep ineendet ole ki ipuun, ak koma mwaa anee kainennyi.” 7Ago ki leenjo, “Imanachi ak isich weeriit. Nguno amee divaik anan ye kigimit, ak amat iam kiy age tugul ne ng'wony, amu koek weerooto Nasaretindetap Kwandanyo kobooch moet agoi peetuutap meennyi.”
8Ki saa anyun Manoa Kwandanyo, koleenji, “Amin, ee Kiptaiyat Kwandanyo, ingonyoonech kogeny chiitap Kamuktaindet ne ki iyookto inyee, ak koneetech ne keyachini weerooto ne kisich.”
9Ki kas Kwandanyo kutitap Manoa; konyo kogeny malaikaiyatap Kwandanyo kwonyooto ne tebee eng' sait, ago ki ma mi Manoa manong'otyonnyi kobooto ineendet. 10Ki labat kwonyooto kochaakta komwachi manong'otyonnyi, koleenji, “Keero, kagomong'jo anee chiito ne ki nyoono anee peetuut age!”
11Ki ng'eet Manoa, koosup osotyonnyi, ak konyo ole mi chiito. Ki teep koleenji, “Inyee chiito ne ki ng'alaalji kwonyooto?” “Anee,” kole.
12Ki le Manoa, “Ye kosulda ng'aleeguk, nee ne irwookyi saboondap weerooto ak poisyennyi?”
13Ki leenji malaikaiyatap Kwandanyo Manoa, “Ingoriipkei kwonyooto tugul che ki amwachi. 14Amat koam kiy age tugul ne punu sabibuk, amat koe divaik anan ye kigimit, ak amat koam kiy age tugul ne ng'wony. Ingoriip tugul che ki ang'at.”
15Ki leenji Manoa malaikaiyatap Kwandanyo, “Amin, keriip inyee, ak kechobwok mengit.”
16Ki leenji malaikaiyatap Kwandanyo Manoa, “Agot ngot inamo, ma aam amiteng'ung'; ago ngot ichop kagoochinet ne kibeelei, igoitoi Kwandanyo.” (Ma ki nai Manoa kole malaikaiyatap Kwandanyo ineendet.).
17Ki teep Manoa malaikaiyatap Kwandanyo, koleenji, “Nee kaineng'ung', si keiywein ye kosulda ng'aleeguk?”
18Ki leenji malaikaiyatap Kwandanyo, “Amune iteep kainennyu? Amu ko kiy ne siirei kaguiyet.”
19Ki im anyun Manoa mengit ak kagoochinetap peek, ak kogoito eng' rwandet Kwandanyo, ne yaei kwang'utik, kogeeroti Manoa ak osotyonnyi. 20Ye kitogosta liplibenetap maat eng' kaptisisyet kwo kipsengwet, kotogosta malaikaiyatap Kwandanyo eng' liplibenetap maatap kaptisisyet. Ki keer Manoa ak osotyonnyi ak kong'uruuk kot koit togeennywa ng'wony. 21Ma komong'ji kogeny malaikaiyatap Kwandanyo Manoa ak osotyonnyi. Yeityo konai Manoa kole malaikaiyatap Kwandanyo ineendet. 22“Kebegu iman,” koleenji Manoa osotyonnyi, “amu kagegeer Kwandanyo!”
23Ki leenji osotyonnyi, koleenji, “Ngot komachei Kwandanyo kobarech, ko ma kotaach eng' eunekyok kagoochinet ne kibeelei ak ne po peek, ak ma koboorwech tuguuchu tugul, anan koigochech kegas tuguuchu nguno.” 24Ki sich kwonyooto weeriit, ak koguure kainennyi Samson. Ki eet weerooto, ak koberuur Kwandanyo ineendet. 25Ak kotoi Kabuusetap Kwandanyo kong'wekten ineendet eng' Maanedan, kwenutap Sora ak Estaol.