Waamuzi 13

13 ¹Wana wa Israeli wakafanya tena maovu machoni pa Baba yetu, naye akawatia mkononi mwa Wafilisti muda wa miaka arobaini.

²Palikuwa na mtu mmoja jina lake Manoa, wa Sora, wa jamaa ya Wadani, na mkewe alikuwa tasa, hakuzaa watoto.

³Malaika wa Baba yetu akamtokea yule mwanamke, akamwambia, "Tazama, wewe u tasa, huna mtoto, lakini utachukua mimba na kuzaa mwana. ⁴Basi sasa, jihadhari usinywe divai wala kileo, wala usile kitu chochote kilicho najisi, ⁵kwa maana utachukua mimba na kuzaa mwana. Wembe usipite kichwani pake, kwa maana mtoto huyo atakuwa mnadhiri wa Baba yetu tangu tumboni, naye ataanza kuwaokoa Israeli mkononi mwa Wafilisti."

⁶Yule mwanamke akaenda, akamwambia mumewe, "Mtu wa Mungu alinijia; sura yake ilikuwa kama sura ya malaika wa Baba yetu, ya kutisha sana. Sikumwuliza atokako, wala hakuniambia jina lake." ⁷Lakini aliniambia, 'Utachukua mimba na kuzaa mwana. Basi sasa usinywe divai wala kileo, wala usile kitu chochote kilicho najisi, kwa maana mtoto huyo atakuwa mnadhiri wa Baba yetu tangu tumboni hata siku ya kufa kwake.'"

⁸Ndipo Manoa akamsihi Baba yetu, akasema, "Ee Bwana wangu Baba, tafadhali yule mtu wa Mungu uliyemtuma na aje kwetu tena, atufundishe tumfanyie nini mtoto atakayezaliwa."

⁹Baba yetu akaisikia sauti ya Manoa; malaika wa Baba yetu akamjia tena yule mwanamke alipokuwa ameketi shambani, lakini Manoa mumewe hakuwa pamoja naye. ¹⁰Yule mwanamke akakimbia upesi, akamwambia mumewe, "Tazama, yule mtu aliyenijia siku ile amenitokea!"

¹¹Manoa akaondoka, akamfuata mkewe, akamfikia yule mtu. Akamwuliza, "Je, wewe ndiwe yule mtu uliyesema na huyu mwanamke?" Akajibu, "Mimi ndiye."

¹²Manoa akasema, "Basi maneno yako yatakapotimia, ni nini kitakachotawala maisha na kazi ya mtoto huyo?"

¹³Malaika wa Baba yetu akamwambia Manoa, "Yule mwanamke na ajihadhari na yote niliyomwambia. ¹⁴Asile kitu chochote kitokacho katika mzabibu, wala asinywe divai au kileo, wala asile kitu chochote kilicho najisi. Na ashike yote niliyomwamuru."

¹⁵Manoa akamwambia malaika wa Baba yetu, "Tafadhali turuhusu tukuzuie, nasi tutakuandalia mwana-mbuzi."

¹⁶Malaika wa Baba yetu akamwambia Manoa, "Hata ukanizuia, sitakula chakula chako; lakini ukiandaa sadaka ya kuteketezwa, umtolee Baba yetu." (Kwa maana Manoa hakujua ya kuwa yule mgeni ni malaika wa Baba yetu.)

¹⁷Manoa akamwuliza malaika wa Baba yetu, "Jina lako ni nani, ili tukupe heshima maneno yako yatakapotimia?"

¹⁸Malaika wa Baba yetu akamwambia, "Kwa nini kuuliza jina langu? Nalo lapita akili."

¹⁹Basi Manoa akatwaa yule mwana-mbuzi pamoja na sadaka ya unga, akavitoa juu ya mwamba kwa Baba yetu, yeye afanyaye maajabu, huku Manoa na mkewe wakitazama. ²⁰Ikawa, miali ya moto ilipopanda juu kutoka madhabahuni kuelekea mbinguni, malaika wa Baba yetu akapanda katika ule mwali wa madhabahu. Manoa na mkewe wakaona, wakaanguka kifudifudi hata nchi. ²¹Malaika wa Baba yetu hakumtokea tena Manoa na mkewe. Ndipo Manoa akajua ya kuwa alikuwa ni malaika wa Baba yetu. ²²Manoa akamwambia mkewe, "Hakika tutakufa, kwa maana tumemwona Baba yetu!"

²³Lakini mkewe akamwambia, "Kama Baba yetu angependa kutuua, asingalipokea sadaka ya kuteketezwa na sadaka ya unga mikononi mwetu, wala asingalituonyesha haya yote, wala kutusikizisha mambo kama haya sasa." ²⁴Yule mwanamke akazaa mwana, akamwita jina lake Samsoni. Mtoto akakua, naye Baba yetu akambariki. ²⁵Roho wa Baba yetu akaanza kumsukuma huko Mahane-dani, kati ya Sora na Eshtaoli.