ኢድ ኣቦ ኣብ መርዓ ሶምሶን

ሶምሶን ኣንፃር ተቓውሞ ወለዱ ፍልስጥኤማዊት ሰበይቲ ደለየ፥ ኣቦና ኣብ ልዕሊ ገዛእቲ እስራኤል ምኽንያት ይሰርሕ ከም ዘሎ ኸይፈለጠ። ነቲ ኣንበሳ ባዶ ኢዱ ቐተሎ፥ ካብ ገምቡ መዓር በልዐ፥ ሕንቅልሕንቅሊት ከዓ ገበረሉ። ንብዓት ሰበይቱ ነቲ መልሲ ኣውፀኦ፥ ሰላሳ ሰባት ከዓ ብእኡ ሞቱ።

ምዕራፍ 14።

ሶምሶን ናብ ቲምና ወረደ፤ ኣብኡ ድማ ሓንቲ ጓል፥ ካብ ኣዋልድ ፍልስጥኤማውያን ረአየ። ደዪቡ ኸዓ ንኣቦኡን ንኣዲኡን ከምዙይ ኢሉ ነገሮም፦ “ኣብ ቲምና ሓንቲ ፍልስጥኤማዊት ሰበይቲ ረአኹ፤ ሕዚ ድማ ሰበይተይ ክትከውን ኣምፅአለይ” በሎም።

ኣቦኡን ኣዲኡን ድማ “ካብ ዘይግሩዛት ፍልስጥኤማውያን ሰበይቲ ኽትወስድሲ፥ ካብ ኣዝማድካ ወይ ካብ ኵሉ ህዝበይ ሰበይቲ ዲያ ዝሰኣንካ?” በልዎ። ሶምሶን ግና ንኣቦኡ “ንሳ ኣብ ዓይነይ ፅብቕቲ ኮይና ትርኣየኒ ኣላ እሞ፥ ንኣኣ ኣምፅአለይ” በሎ።

ኣቦኡን ኣዲኡን ግና እዙይ ካብ ኣቦና ምዃኑ ኣይፈለጡን። ንሱ ኸዓ ኣብ ልዕሊ ፍልስጥኤማውያን ዝትንስኣሉ ምኽንያት ይደሊ ነበረ፤ በቲ ጊዜ እቲ ፍልስጥኤማውያን ኣብ እስራኤል ይገዝኡ ነበሩ እሞ።

ሶምሶን ምስ ኣቦኡን ኣዲኡን ናብ ቲምና ወረደ። ኣብ ኣታኽልቲ ወይኒ ቲምና ኸዓ ሓደ ሽደን ኣንበሳ እናጓዘመ ኣብ ልዕሊኡ መፀ። መንፈስ ኣቦና ኸዓ ኣብ ልዕሊኡ ወረደ እሞ፥ ነቲ ኣንበሳ ባዶ ኢዱ ኸም ማሕስእ ጤል ቀዳደዶ፤ ነቦኡ ዀነ ንእኖኡ ግና እቲ ዝገበሮ ኣይነገሮምን። ወሪዱ ድማ ምስታ ሰበይቲ ተዛረበ፤ ንሳ ኸዓ ኣብ ዓይኒ ሶምሶን ፅብቕቲ ኮይና ተራእየት።

ድሕሪ ቑሩብ ጊዜ ኸዓ ኽምርዓዋ ተመሊሱ እንተሎ፥ ነቲ ገምቢ እቲ ኣንበሳ ኽርኢ ኣግለሰ። እንሆ ድማ፥ ኣብ ውሽጢ ገምቢ እቲ ኣንበሳ ጉባኤ ንህብን መዓርን ነበረ። ነቲ መዓር ናብ ኢዱ ወሲዱ እናኸደ በልዐ። ናብ ኣቦኡን ኣዲኡን ምስ በፅሐ ድማ ሃቦም እሞ በልዑ። ካብ ገምቢ እቲ ኣንበሳ ኸም ዝወሰዶ ግና ኣይነገሮምን። ኣቦኡ ኸዓ ናብታ ሰበይቲ ወረደ፤ ሶምሶን ድማ ከምቲ መንእሰያት ዝገብርዎ ኣብኡ ድግስ ገበረ። ህዝቢ ምስ ረአይዎ ኸዓ፥ ምስኡ ክኾኑ ሰላሳ ብፆት ኣምፅኡ።

ሶምሶን ድማ ከምዙይ በሎም፦ “ሓንቲ ሕንቅልሕንቅሊት ክሓተኩም፤ በቲ ሸውዓተ መዓልቲ ድግስ እንተ ፈቲሕኩምዋ፥ ሰላሳ ክዳን በፍታን ሰላሳ ዓፅፊ ክዳንን ክህበኩም እየ። እንተ ዘይከኣልኩም ግና፥ ሰላሳ ክዳን በፍታን ሰላሳ ዓፅፊ ክዳንን ክትህቡኒ ኢኹም” በሎም። ንሳቶም ከዓ “ሕንቅልሕንቅሊትካ ንገረና፤ ንስማዓዮ” በልዎ።

ንሱ ድማ “ካብ በላዒ ዝብላዕ ወፀ፤ ካብ ብርቱዕ ከዓ ጥዑም ወፀ” በሎም። ንሰለስተ መዓልቲ ኸዓ ነታ ሕንቅልሕንቅሊት ክፈትሕዋ ኣይከኣሉን።

ኣብ ራብዐይቲ መዓልቲ ኸዓ ንሰበይቲ ሶምሶን “ሰብኣይኪ ነታ ሕንቅልሕንቅሊት ክትገልፀልና ኣባብልዮ፤ እንተ ዘይኮነ ንኣኺን ንቤት ኣቦኽን ብሓዊ ከነንድደክን ኢና። ክትዘርፉና ዲኹም ኣብዙይ ዝዓደምኩምና?” በልዋ።

ሰበይቲ ሶምሶን ድማ ኣብኡ እናበኸየት “ንስኻ ትፀልኣኒ ጥራሕ ኢኻ እምበር፥ ኣይተፍቅረንን ኢኻ። ንህዝበይ ሕንቅልሕንቅሊት ሂብካዮም እንተለኻ፥ ንኣይ ግና ፍቺኣ ኣይነገርካንን” በለቶ። ንሱ ኸዓ “ንኣቦይ ዀነ ንእኖይ ኣይነገርኩን እየ፤ ንኣኺ ደኣ ከመይ ኢለ ኽነግረኪ?” በላ።

በቲ ሸውዓተ መዓልቲ ድግሶም ድማ ኣብኡ ትበኪ ነበረት፤ ኣፅኒዓ ስለ ዝለመነቶ ኸዓ ኣብ ሻውዐይቲ መዓልቲ ነገራ። ንሳ ድማ ነታ ሕንቅልሕንቅሊት ንህዝባ ነገረቶም። ኣብ ሻውዐይቲ መዓልቲ ድማ ፀሓይ እንተይዓረበት፥ ሰባት እታ ኸተማ “ካብ መዓር ዝጥዕም እንታይ ኣሎ? ካብ ኣንበሳ ዝሕይል እንታይ ኣሎ?” በልዎ። ሶምሶን ከዓ “ብዓርሐይ እንተ ዘይሓረስኩም፥ ሕንቅሕንቅሊተይ ኣይምፈታሕኩምዋን ነይርኩም” ኢሉ መለሰሎም።

ሽዑ መንፈስ ኣቦና ኣብ ልዕሊኡ ወረደ። ናብ ኣስቀሎና ወሪዱ ኸዓ ካብኣቶም ሰላሳ ሰብኡት ቀተለ፤ ንብረቶም ወሲዱ ድማ ነቶም ሕንቅልሕንቅሊት ዝፈትሕዋ ክዳውንቶም ሃቦም። ቍጥዓኡ ነዲዱ ድማ ናብ ቤት ኣቦኡ ደየበ። ሰበይቲ ሶምሶን ድማ ነቲ ሚዜኡ ዝነበረ ብፃዩ ተውሃበት።