Jeremiah 23

23 ¹"Iwui seihomphungwui yaobing sāshimānmi chaiyāngmi yaokahomabing kakhanang ngasāranu!' da ithumwui Avāna hānga. ²Chiwui vang, Israelwui ithumwui Avāna iwui mibing homkapam yaokahomabingwui pongli hithāda hānga: 'Nathumna iwui yao ashangva̱ chaiyāngmi kashamshokhaowa, kala athumli maphaningmana. Ara nathumna sākahai makaphāwui vang ina nathumli tandi mira, da ithumwui Avāna hānga. ³Chiwui thili ina athumli kashamhaowa apam kachiva̱wui eina iwui yao ashangva̱wui shākkahai kazipkhuilaga, athumwui seihomphungli khuiungluira, kala athum athei matheida mataisangra. ⁴Ina athumwuitungli yaokahomabing haimira, athumna athumli homra; athumna mangacheeluimara lah malungla maringluimara, khipākha mashimānmara, da ithumwui Avāna hānga. ⁵Yanglu, zimiksho chi rārāli, da ithumwui Avāna hānga, chitharan Davidwui vang, khangaronga Aphang akha ina shokngasakra; ana awunga sāda mungra kala thangmei eina sāra, kala ana ngalei chili mashun kala khamashung khangarong eina bichar sāmira. ⁶Awui atamli Judahli huikhuira, kala Israelna ning tāphup eina somra. Kala ali PROHO Vare Ithumwui Khamashung Khangarong da hora.'

⁷"Chiwui vang, zimiksho chi rārāli, da ithumwui Avāna hānga, chitharan athumna, 'Egypt ngaleiwui eina Israelwui mibingli thānshokkhame nathumwui Avā leilakha eina tangda,' da mahāngluimara, ⁸kha, 'Atungshong ngalei eina kala athumli kashamhaowa apam kachiva̱wui eina Israelwui shimkhurwui ara̱-azā thānshokta latungshokkhame nathumwui Avā leilakha eina tangda' da hāngra. Chithākha athum khalattawui ngaleili somra."

Avāna Minama Marānbing Khuishoktha̱

⁹Marānbingwui pongli: Iwui malung za̱khuihaira; iwui ara̱-arā saikora nganuka. Ithumwui Avā kala awui kathara tuibingwui vang, I khamarip mi kathāna, zam eina yuikahai mi kathāna. ¹⁰Apam chi phokaphābing eina pemtinghaira; khonkashiwui vang ngaleina sifaya, kala lamhāngwui seizātpambing thenghaowa. Athumwui apong makaphāna, kala athumna khalattawui pangshapli makaphā eina sai.

¹¹"Marānla pāngmonla vare makatheibingna; iwui shimli tangda ina athumwui makaphā phakakhui, da ithumwui Avāna hānga. ¹²Chiwui vang eina athumwui apong chi athumli tangkhamangli khanganai shongfa kathāna sāngasakra, chili athumli thānshoklaga athum pitāra; kaja athumwui tandi kumli ina athumwuitungli kalākashi shoksangmira, da ithumwui Avāna hānga. ¹³Samariawui marānbingli ina chinhao ot akha thei: athumna Baal eina marāna kala iwui mi Israelli ma̱zat ngasaka. ¹⁴Kha Jerusalemwui marānbingli ina khangachee khangachā ot akha thei: athumna phophā sai, athumna mikhanam eina ringa, makaphā kasābingwui pāng nganingngasaka, chieina khipākha awui makaphāwui eina mahorhaimara. Athum saikora ili Sodom kathāna sāhaira, chiwui mibing Gomorrah kathāna.'

¹⁵Chiwui vang, kazingramwui raikhavābingwui Avāna marānbingwui pongli hithāda hānga: Ina athumli thingkhā chishaira, kala athumli kathiriwui tara̱ mimangra, kaja Jerusalemwui marānbingwui eina apam saikorali vare makathei ngayaovāhaira.'

¹⁶Kazingramwui raikhavābingwui Avāna hithāda hānga: Nathumli marāna marānbingwui tui manganāpaimana; athumna nathumli arema kachihān eina pemtinghai ngasaka, khalattawui ning eina shok khamahā hāngda, iwui khamorwui eina maningmana. ¹⁷Iwui tui ningkakachaibingli athumna hāngchinga, 'Nathumli chingri leira,' kala khalattawui kaphaning ngakaishilāk eina shurthuibing saikorali athumna hānga, 'Nathumwuitungli kalākashi marāmara.'"

¹⁸Kaja athumwui ngachaili khipāna ithumwui Avāwui kazipli nganingda awui tui theida kala nganāhaikhala? Khipāna awui tui nganātitkhuida shārakhala? ¹⁹Yanglu, ithumwui Avāwui siphan zingrot chi malungkhavāta ngathunghaira, sur kakhaning siphan zingrot; makhayābingwui kuitungli tāra. ²⁰Awui ningli ngarān kahai chi thaklāk eina makupchaoranglakha eina tangda, ithumwui Avāwui malungkhavāt chi ning mangacheimara. Khanā zimiksholi hi nathumna tharlak eina theishingkhuinaora.

²¹"Ina marānbing hi machihovamana, kha athumna yonghaowa; ina athumli makhamayāmana, kha athumna marānhaowa. ²²Kha athumna iwui kazipli nganingakha, athumna iwui tui iwui mibingli hāshokra kala athumli athumwui makaphā apong kala athumwui otsakwui makaphāwui eina ngalan ngasakra. ²³Ina ngalemli maningla nathumwui Avāna, da ithumwui Avāna hānga, kala katāli khalei nathumwui Avāla maningmala? ²⁴Khipānakha ngathum kahai pamli thumtitakha, ina ali matheikhala? da ithumwui Avāna hānga. Ina kazingram kala okathui pemting maningmala? da ithumwui Avāna hānga.'

²⁵"Ina iwui ming eina kakapik marān kahai marānbing chi shāhaira; athumna 'Ina mang shimana! Ina mang shimana!' da hānga. ²⁶Athumwui kachichā ningwui mikhanam marān kahai marānbingwui ningli, kakapik chi karankha pemtinghairakhala? ²⁷Athumwui avā ngarāna Baalwui vang iwui ming malaihaowa thāda, athumna akha eina akhali hāng kahai mang chi eina iwui mibingli iwui ming malai ngasak khavai khangarān sai. ²⁸Mang kalei marānna chi hāngranu, kha iwui tui kalei china iwui tui ningtongda hāngranu. Chāngli lanji chi khi leikhala? da ithumwui Avāna hānga. ²⁹Iwui tui hi mei thāda maningmala, da ithumwui Avāna hānga, kala lunghār sātekmi yāmkar thāda maningmala?'

³⁰"Chiwui vang eina, yanglu, ina marānbingli ngakaishida lei, da ithumwui Avāna hānga, athumna akha eina akhawui eina iwui tui leekazā. ³¹Yanglu, ina marānbingli ngakaishida lei, da ithumwui Avāna hānga, athumna kachichā male eina khamatuina, 'Varena kahāngna' da hānga. ³²Ina kakapik mang marān kahaibingli ngakaishida lei, da ithumwui Avāna hānga; athumna chi hāngda, athumwui kakapik kala khangashar langso eina iwui mibingli mathānngui ngasaka. Ina athumli machihovamana lah maningmimana, kala athumna mibing hili katong khikha masāmimana, da ithumwui Avāna hānga.'

Nathumva Otphunna

³³"Mibing hi, marān akha, lah pāngmon akhana, 'Ithumwui Avāwui otphun khi lei?' da ngahānakha, athumli hānglu, 'Nathumva otphunna! Ina nathumli horhaira, da ithumwui Avāna hānga.' ^a a v33 'Oracle' da mapong kahai tui china 'otphun' da khamela̱la kakhalatna. Mibingna pao akha ningchāngda poi; ithumwui Avāna ngahānkā china, athumwui kachichā mashitkasang chiya ana chihotā khavai otphun chi ngasāra da hānga. ³⁴'Ithumwui Avāwui otphun' da hāng kahai marān, pāngmon, lah mi chi, ina mi chi kala awui shimkhurli tandi mira. ³⁵Nathum kachiva̱na kachichāwui khongnainao kala achināli hithāda hāngra: 'Ithumwui Avāna khi ngahānkākhala?' lah 'Ithumwui Avāna khi hāngkhala?' ³⁶Kha 'ithumwui Avāwui otphun,' da ara mahāngluilakmara, kaja mi kachiva̱na kachichāwui tui china awui otphun ngasāra; nathumna kharinga ashangva̱wui Avāwui tui chi matuiphāphā sāhaira.' ³⁷Marānli nana hithāda hāngra: 'Ithumwui Avāna nali khi ngahānkākhala?' lah 'Ithumwui Avāna khi hāngkhala?' ³⁸Kha nathumna 'ithumwui Avāwui otphun' da hāngakha, chiwui vang eina ithumwui Avāna hithāda hānga: Khikhalajila nathumna tui hi, 'ithumwui Avāwui otphun,' da kahāngwui vang, ina nathumli hithāda chihorāchinga, 'ithumwui Avāwui otphun da mahānglu, ³⁹Chiwui vang, yanglu, nathum kala ina nathumli kala navā ngarāli mikahai keinung chili ina otphun thāda mashoila phunglaga iwui mangāwui eina horyānghaora. ⁴⁰Kala ina nathumwuitungli katang makhavai khayā khamalā, kala mamalairarlakmara katang mavai maikashi khuirāra.'"