Jeremiah 23 FHB Father's Heart Bible™

23 ¹“Moi laga chorani laga mer khan ke khotom kori aru titiri kori diya rakhiyal khan ke hai ase!’ amar Pitri pora koise. ²Etu nimite Moi laga manuh khan ke sa-bera kora rakhiyal khan laga kotha te Israel laga amar Pitri pora eneka koise: ‘Tumikhan pora Moi laga jhak ke titiri kori aru khedai dise, aru taikhan ke bhal pora sa-bera kora nai. Etiya tumikhan pora kora biya kaam nimite Moi tumikhan ke saja dibo, amar Pitri pora koise. ³Titia Moi pora taikhan ke khedai diya sob desh khan pora Moi laga jhak laga bachi juwa khan ke joma koribo, aru taikhan ke taikhan laga chorani te wapas anibo, aru taikhan phol dhoribo aru bisi hoi jabo. ⁴Moi pora taikhan uporte taikhan ke sa-bera kora rakhiyal khan ke uthabo; taikhan aru bhoi nakoribo aru chinta bhi nakoribo, aru ekjon bhi haraija nai hobo, amar Pitri pora koise. ⁵Sabi, din khan ahi ase, amar Pitri pora koise, jitia Moi pora David nimite ekta dharmik Dal uthabo, aru tar raja hoi kene raj koribo aru gyaan pora kaam koribo, aru tar desh te niyai aru dharmikota chola bo. ⁶Tar din khan te Judah ke bachai lobo, aru Israel surakhit pora thakibo. Aru etu tar naam ase junke pora tar ke mati bo: Prabhu Amar Dharmikota.’

⁷“Etu nimite din khan ahi ase, amar Pitri pora koise, jitia taikhan aru nakobo, ‘Israel laga manuh khan ke Egypt pora ulai kene ana tumar Pitri jinda thaka nisina hosa,’ ⁸kintu, ‘Israel ghor laga khandan khan ke uttor desh pora aru Tar pora khedai diya sob desh khan pora ulai kene wapas ana tumar Pitri jinda thaka nisina hosa.’ Titia taikhan nijor mati te thakibo.”

Pitri pora misa bhabobadi khan ke ujagar kore

⁹Bhabobadi khan laga kotha te: Moi laga mon bhangi jaise; Moi laga sob hardi khan kapi ase. Amar Pitri aru Tar laga pobitro kotha khan nimite, Moi ekjon nisa-khuwa manuh nisina, draksharos pora hari juwa ekjon nisina ase. ¹⁰Kilemane desh tu byobhichari khan pora bhorta ase; shrap nimite desh tu dukh kori ase, aru jongol laga chorani khan sukhi jaise. Taikhan laga rasta biya ase, aru taikhan laga takot ke biya pora cholai.

¹¹“Bhabobadi aru purohit duijon bhi Isor-bihin ase; Moi laga ghor te bhi Moi taikhan laga biya kaam pai loise, amar Pitri pora koise. ¹²Etu nimite taikhan laga rasta taikhan nimite andhar te thaka khisikni rasta nisina hobo, jun bhitor te taikhan ke khedai dibo aru taikhan giri jabo; kilemane taikhan laga saja laga saal te Moi taikhan uporte dukh-digdar anibo, amar Pitri pora koise. ¹³Samaria laga bhabobadi khan majot te Moi ekta ghin-lagi kaam dikhise: taikhan Baal laga naam pora bhabobani korise aru Moi laga manuh Israel ke bhul rasta te loi jaise. ¹⁴Kintu Jerusalem laga bhabobadi khan majot te Moi bhoyanok ekta jinis dikhise: taikhan byobhichar kore, taikhan misa pora jinda thake, taikhan biya kaam kora khan laga hath ke uthai diye, etu karne kun bhi tar biya pora wapas nahe. Taikhan sob Moi nimite Sodom nisina hoi jaise, aru etu laga manuh khan Gomorrah nisina.’

¹⁵Etu nimite bhabobadi khan laga kotha te sorgo laga sena khan laga Pitri pora eneka koise: Moi taikhan ke tita kha-luwa khilabo aru bikh-mila pani dibo, kilemane Jerusalem laga bhabobadi khan pora pura desh te Isor-bihin kaam phaili jaise.’

¹⁶Sorgo laga sena khan laga Pitri pora eneka koise: Tumikhan ke bhabobani kora bhabobadi khan laga kotha nahuni bi; taikhan tumikhan ke misa asha pora bhorta kore, taikhan nijor mon laga darshan khan koi ase, Moi laga mukh pora nohoi. ¹⁷Moi laga kotha ke ghin kora khan ke taikhan hodai koi thake, ‘Tumikhan ke shanti hobo,’ aru nijor mon laga pichete gath pora juwa sob manuh ke taikhan koi, ‘Tumikhan uporte eku dukh-digdar nahe bo.’”

¹⁸Kilemane taikhan majot te kun amar Pitri laga sabha te khara hoi kene Tar laga kotha sabole aru hunibole thakise? Kun pora Tar laga kotha ke dhyan dise aru hunise? ¹⁹Sabi, amar Pitri laga andhi khong pora ulai jaise, ekta ghurni andhi; etu biya manuh khan laga matha uporte giri bo. ²⁰Amar Pitri laga khong tu, jitia tak Tar mon laga itcha khan ke pura pora kori nakore, titia tak wapas nahe bo. Ahi thaka din khan te tumikhan etu ke sapha pora bujhi bo.

²¹“Moi etu bhabobadi khan ke patha nai, hoilebi taikhan polai jaise; Moi taikhan ke kotha kowa nai, hoilebi taikhan bhabobani korise. ²²Kintu taikhan jodi Moi laga sabha te khara hoise koile, taikhan Moi laga manuh khan ke Moi laga kotha khan prochar koribole thakise aru taikhan ke taikhan laga biya rasta pora aru taikhan laga biya kaam pora wapas anibole thakise. ²³Moi khali usor te he tumar Pitri ase naki, amar Pitri pora koise, aru dur te bhi tumar Pitri nohoi naki? ²⁴Kun manuh Moi dikhibo napara lukai thaka jaga khan te lukabo pare naki? amar Pitri pora koise. Moi sorgo aru prithibi ke napuri bo naki? amar Pitri pora koise.’

²⁵“Moi laga naam te misa bhabobani kora bhabobadi khan ke Moi hunise, taikhan koi ase, ‘Moi sapna dikhise! Moi sapna dikhise!’ ²⁶Nijor mon laga thogai-baji bhabobani kora bhabobadi khan laga mon te kiman din tak misa bhorta thakibo? ²⁷Taikhan laga baba-khandan khan pora Baal nimite Moi laga naam pahori juwa nisina, taikhan ekjon-ekjon ke kowa sapna khan pora Moi laga manuh khan ke Moi laga naam pahoribole bhabona kore. ²⁸Kun bhabobadi logot sapna ase, tai etu kobi, kintu kun logot Moi laga kotha ase, tai imandari pora Moi laga kotha kobi. Gehu logot te kher tu ki ase? amar Pitri pora koise. ²⁹Moi laga kotha jui nisina nohoi naki, amar Pitri pora koise, aru pathor ke bhangi diya hathuri nisina nohoi naki?’

³⁰“Etu karne, sabi, Moi bhabobadi khan laga birodh te ase, amar Pitri pora koise, kun pora ekjon-ekjon pora Moi laga kotha khan churi kore. ³¹Sabi, Moi bhabobadi khan laga birodh te ase, amar Pitri pora koise, kun pora nijor jiba ke cholai kene koi, ‘Isor pora koise.’ ³²Misa sapna bhabobani kora khan laga birodh te Moi ase, amar Pitri pora koise; taikhan etu koi aru nijor misa aru pagla phutani pora Moi laga manuh khan ke bhul rasta te loi jai. Moi taikhan ke patha nai aru hukum diya nai, aru taikhan etu manuh khan nimite eku bhi bhal nakore, amar Pitri pora koise.’

Tumikhan he bhar ase

³³“Jitia etu manuh khan, ekjon bhabobadi, nohole ekjon purohit pora hudibo, ‘Amar Pitri laga bhar ki ase?’ titia taikhan ke kobi, ‘Tumikhan he bhar ase! Moi tumikhan ke phelai dibo, amar Pitri pora koise.’ ^a a v33 “bhabobani” laga kotha tu laga ortho “bhar” bhi ase. Manuh khan ekta khobor mange; amar Pitri pora jowab diye taikhan nijor laga biswas-nathaka he Tar pora nichete rakhi diya bhar ase. ³⁴Kun bhabobadi, purohit, nohole manuh pora koi, ‘Amar Pitri laga bhar,’ Moi etu manuh aru tar ghor manuh khan ke saja dibo. ³⁵Tumikhan sob nijor ghor-usor manuh aru bhai ke eneka kobi: ‘Amar Pitri ki jowab dise?’ nohole ‘Amar Pitri ki koise?’ ³⁶Kintu ‘amar Pitri laga bhar’ aru kitia bhi nakobi, kilemane sob manuh laga nijor kotha he tar bhar hoi jai; tumikhan jinda sorgo laga sena khan laga Pitri laga kotha khan ke bera-ghura kori dise.’ ³⁷Bhabobadi ke eneka kobi: ‘Amar Pitri tumi ke ki jowab dise?’ nohole ‘Amar Pitri ki koise?’ ³⁸Kintu tumikhan jodi koi, ‘Amar Pitri laga bhar,’ titia amar Pitri pora eneka koi ase: Moi tumikhan ke kotha pathai kene koise hoilebi, ‘Amar Pitri laga bhar eneka nakobi,’ tumikhan etu kotha, ‘Amar Pitri laga bhar,’ koise karne, ³⁹etu nimite sabi, Moi hosa pora tumikhan ke ekta bhar nisina uthai lobo aru Moi laga age pora tumikhan ke phelai dibo—tumikhan aru Moi tumikhan aru tumikhan laga baba-khandan khan ke diya sheher ke. ⁴⁰Aru Moi tumikhan uporte ananta beijjati aru kitia bhi napahoribo thaka hodai laga sorom anibo.’”