Pitri pora Jeremiah ke dimoru phol laga duita tukri dikhai diya

Mondir laga hamne te duita tukri dimoru phol ase. Bhal khan to Babylon te bondi hoi kene loi ja manu khan ase — taikhan ke amar Pitri aru lagai dibo aru Tai ke jani bole mon dibo. Bura khan Zedekiah aru Jerusalem te etiya bhi thaka manu khan ase jun khan bachi jaise koi kene bhabi thakise.

Adhyay 24.

Babylon laga raja Nebuchadnezzar pora Judah laga raja Jehoiakim laga putro Jeconiah ke, Judah laga adhikari khan, hath-kaam kora manuh khan aru loha-kaam kora manuh khan logot, Jerusalem pora Babylon te bondi kori loi juwa pichete, amar Pitri pora amar Pitri laga mondir laga age te rakha dimoru phol laga duita tukri moi ke dikhai dise. Ekta tukri te bisi bhal dimoru phol thakise, joldi paki juwa; kintu dusera tukri te khabole napara iman biya dimoru phol thakise.

Tetiya amar Pitri pora moi ke hudise, “Jeremiah, tumi ki dikhi ase?” Moi koise, “Dimoru phol, bhal tu bisi bhal, aru biya tu khabole napara iman biya ase.”

Tetiya amar Pitri laga kotha moi logot te ahhise:

“Israel laga amar Pitri pora eneka koi ase: Etu bhal dimoru phol khan nisena, tineka Moi yate pora Babylon manuh khan laga desh te pathai diya Judah laga bondi khan ke bhal nisena sabo.

“Moi bhal nimite tarkhan uporte Moi laga suku rakhibo, aru tarkhan ke etu desh te wapas loi anibo; Moi tarkhan ke bonai dibo, bhangai nadibo, aru tarkhan ke ropibo, ulai naphelabo. Moi tarkhan ke Moi ke Pitri nisena jana laga mon dibo; tarkhan Moi laga bacha khan hobo, aru Moi tarkhan laga Pitri hobo, kilemane tarkhan pura mon pora Moi logot wapas ahhibo.’

“Kintu khabole napara iman biya dimoru phol khan nisena—amar Pitri pora koi ase—tineka Moi Judah laga raja Zedekiah ke, tar adhikari khan ke, aru yate nahole Egypt te thaki juwa Jerusalem laga bachi juwa manuh khan ke bonabo.

“Moi tarkhan ke jun jun jagate khedai pathabo, ta te prithibi laga sob rajyo khan majote Moi tarkhan ke ekta bhoi laga jinis, dukh, sorom, thatta kora jinis, hahi uribo laga jinis aru shrap bonabo. Moi tarkhan aru tarkhan laga pitri khan ke diya desh pora tarkhan khotom nohua tak, Moi tarkhan uporte talwar, akaal aru bemari pathai dibo.”