Jeremiah 24

24 ¹Babylonwui awunga Nebuchadnezzarna Jehoiakimwui naomayara, Judahwui awunga Jeconiahli ngasoda Judahwui wungnaobing, pāngthem kathemabing, kala mari kasābingli Jerusalemwui eina Babylonli raithā kahaiwui thili, ithumwui Avāna ithumwui Avāwui khorumshimwui mangāli haikahai khaorāthei luk khani ili chithei. ²Luk akhali khaorāthei khamathā laka, ngathorshong minphok kahai leisai; luk khangateiwuili mashaikapai thāda makaphā khaorāthei leisai.

³Chieina ithumwui Avāna ili ngahāna, "Jeremiah, nana khi theikhala?" "Khaorāthei," da ina hānga, "khamathābing chi khamathā laka, makaphābing chi mashaikapai thāda makaphāna."

⁴Chieina ithumwui Avāwui tui china ili rāhānga:

⁵"Israelwui ithumwui Avāna hithāda hānga: Hi khaorāthei khamathābing thāda, ina apam hiwui eina Chaldeanaobingwui ngaleili chihovā kahai Judahwui raithā kahaibingli khamathā da khuira.

⁶"Athumli khamathā khavai ina yangchingra, apam hili athumli khuiungluira; athumli sākāmira, masāshimānmimara, athumli lingsangra, maphākthuihaimara. ⁷Ili Avā da theikhavai ning akha athumli ina mira; athum iwui mi ngasāra, I athumwui Avā ngasāra, kaja athumna ning tharchao ili latungra.'

⁸"Kha khaorāthei makaphā, shuihaida mashaikapai thāda, da ithumwui Avāna hānga, chithāda Judahwui awunga Zedekiah, awui wungnaobing, kala apam hili maningkha Egypt ngaleili leikahai Jerusalemwui shākkahaibingli ina sāmira.

⁹"Ina athumli khuikhavā pam kachida, okathuiwui wungram saikorali ina athumli khangachee-khangachā, kalākashi, maikashi, mana̱shi, zeikakharui, kala khonkashi ngasā ngasakra. ¹⁰Ina athumli kala athumwui avāva̱ ngarāli mikahai ngalei chiwui eina athum shimānserranglakha eina tangda, ina athumli raighai, chāmrei, kala kazātkashi chihorāra."