Mi eng' bukuit

Jeremiah 24 FHB Father's Heart Bible™

Kiistoi 15% eng' kiy ne iale korook →
Bukuit

Koboorchin Kwanda Jeremiah Ateruusyek Aeng' che po Mogoonik

Tebi ateruusyek aeng' che po mogoonik eng' taitap Hekaluut. Mogoonik che myee ko piik che ki kagimut koba Babilon—che miine kogeny Kwandanyo ak koochi mugulet si konai ineendet. Mogoonik che yaach ko Zedekiah ak piik che tagomi Jerusalem che bwaat kole kagosar.

Ng'alaali Kwandanyo eng' mustarisyek 3, 5–10

Sura 24.

Ki koboorchi Kwandanyo ateruusyek aeng' che po mogoonik, che ki kiinde eng' taitap Hekaluutap Kwandanyo—eng' let ne ki kagimut Nebukadnezar laitoryatap Babilon Jekoniah weeriitap Jehoiakim, laitoryatap Judah, kobooto pounigap Judah, ak piik che ng'om, ak che yaei kariik, kobunu Jerusalem koba Babilon. Ki tinyei ateruut agenge mogoonik che myee miising', che neegit koruryo tai; ago ki tinyei age mogoonik che yaach miising' che ma kimuuchi keam.

Ki teebe anyun Kwandanyo, koleenji, “Nee ne igeere, Jeremiah?” “Mogoonik,” ale, “che myee ko myee miising', che yaach ko yaach che ma kimuuchi keam.”

Ki nyoonjo anyun ng'olyootap Kwandanyo, koleenjo,

“Mwaei Kwandanyo ne po Israel kole: Ko uu mogoonichu che myee, ko uu nooto si ageere che myee piigap Judah che ki kagimut, che ki ayookte kobunu yu koba emetap piigap Babilon.

“Ariibe konyekyuk kowo icheek agobo ne myee, ak aweeksei icheek kobwa emoni; ateech icheek, ago amagabui, amin icheek, ago amatut. Agoochi icheek mugulet si konai kole aa Kwanda; ak koek lagokyuk, ak aek Kwandanywa, amu koweeksei ye mi anee eng' muguleldanywa komugul.’

“Ago ko uu mogoonik che yaach, che ma kimuuchi keam—mwaei Kwandanyo—ko uu nooto ye ayai Zedekiah laitoryatap Judah, ak pounikyik, ak che ki ng'et che po Jerusalem, che ki pagaakta yu anan eng' Misiri.

“Ayai icheek kwong'utyet, yaityet, teweernat, kiy ne kireenyei, kalewenet, ak chubisyet eng' laitornatosyek tugul che po ng'wony, ole amuti icheek tugul. Ayookte rotwetap chok, rubeet, ak koroito agaigai icheek, agoi kobet icheek eng' emet ne ki agoochi icheek ak kwanisyekwak.”