Yelemiya 24 FHB Father's Heart Bible™

24 ¹Tata wetu wánsongila bitunga byodi bya fiki, bina básya ku thwala ya nzu ya Tata wetu. Mambu mama másalama kunima dya Nebukadanesale, kyamvu wa Babiloni, kunata Yekonya mwana wa Yoyakimi, kyamvu wa Yuta, yi bapfumu ba Yuta, basadi ba kisalu yi basadi ba bibende, mu kinzenza, tukidila ku Yelusalemi tii ku Babiloni. ²Kitunga kimosi kyákala yi fiki za mboti za lawu, fiki za theti; kitunga kyakwawu kyákala yi fiki za mbi za lawu, zina zifwaniku mu kudya.

³Amana Tata wetu wámbyula: «Biki wisi mona, Yelemiya?» «Fiki,» meni yizimbudi, «za mboti zenina za mboti za lawu, kaasi za mbi zenina za mbi za lawu, zina zifwaniku mu kudya.»

⁴Amana ndinga ya Tata wetu yisa kwena meni:

⁵«Tala mana kazimbula Tata wetu wa Kiseledi: Bwosu buna fiki zazi zenina za mboti, bwabuna yikámona za mboti batu ba kinzenza ba Yuta, bana yáthuma tukidila haha tii ku tsi ya bisi Babiloni.»

⁶«Yikátula mesu mama kwena bawu mu diambu dya mboti, yikábavutula mu tsi yayi; yikábatunga, kaasi yikábamwangaku, yikábakuna, kaasi yikábavusaku. ⁷Yikábaheka mbundu ya kunzaya meni hanga Tata wa bawu; bakála bana bama, meni yikála Tata wa bawu, mukuma bakávutuka kwena meni ni mbundu yawu yosu.»

⁸«Kaasi, bwosu buna fiki za mbi zenina, zina zivwidi za lawu zifwaniku mu kudya» — Tata wetu kazimbula — «bwabuna yikákitula Zedekiya, kyamvu wa Yuta, yi bapfumu bandi, yi ndambu ya bisi Yelusalemi yina yásala, yuka haha, yuka ku Ngiphiti.

⁹Yikábakitula bawu kima kya bweya, kya disa, kya tsoni, kya museya, kya nsekununu, yi kya kusinga kwena bipfumu byosu bya ha tsi, kwosu kuma kuna yikábasenda bawu. ¹⁰Yikútuma mbedi ya phoku, nzala, yi mbefu mwena bawu, tii bakámana mu tsi yina yápheka kwena bawu yi kwena batata ba bawu.»