Yeremiya 24 FHB Father's Heart Bible™

24 ¹Baba wathu andipangiza madengu mawiri a makuyu, akhali akuikhwa patsogolo pa templo ya Baba wathu. Pyenepi pyacitika Nebhukadhinezari mambo wa Bhabhilonya pidamala iye kutenga Jekoniya mwana wa Yoyakimi, mambo wa Yuda, pabodzi na akulu a Yuda, anyamisiri a manja, na anyakusula utale, mbaabulusa ku Yerusalemu, mbaenda nawo ku ukapolo ku Bhabhilonya. ²Dengu ibodzi ikhali na makuyu adidi kakamwe, adapya pakutoma; dengu inango ikhali na makuyu akuipa kakamwe, akukhonda kudyeka.

³Na tenepo Baba wathu andibvundza kuti: “Usaona ciyani, Yeremiya?” “Makuyu,” ine ndatawira, “adidi ndi adidi kakamwe, akuipa ndi akuipa kakamwe, akukhonda kudyeka.”

⁴Na tenepo fala ya Baba wathu yabwera kuna ine, mbilonga kuti:

⁵“Baba wathu wa Izarayeli asalonga tenepa: Ninga makuyu awa adidi, ndimo ene ndinadzaaona ninga adidi anthu a Yuda adaenda ku ukapolo, ale ndidaatumiza kubuluka pano kuenda ku dziko ya Bhabhilonya.”

⁶“Ndinadzaikha maso anga pa iwo toera kuacitira pyadidi, mbandiabweresa ku dziko ino; ndinadzaamanga, mbandikhonda kuagwesa; ndinadzaabzwala, mbandikhonda kuadzula. ⁷Ndinadzaapasa ntima toera kundidziwa, kudziwa kuti Ine ndine Baba wawo; iwo anadzakhala ana anga, Ine Baba wawo, thangwi anadzabwerera kuna Ine na ntima wawo onsene.”

⁸“Mbwenye ninga makuyu akuipa, akuola kakamwe akukhonda kudyeka,” alonga Baba wathu, “ndimo ene ndinadzacita Zedhekiya mambo wa Yuda, akulu ace, na anthu adasala a Yerusalemu, adasala pano peno ku Edjipito.

⁹“Ndinadzaacita kukhala cinthu cakugopswa, cinthu cakuipa, na manyazi pa umambo onsene wa pa dziko yapantsi; anadzakhala cakusingwa, cakusekwa, na cakudikhwa, konsene kunandinaathamangisa iwo.” ¹⁰“Ndinadzatumiza supada, njala na utenda pakati pawo, mpaka iwo afudzike pa dziko idandipasa iwo na ambuya awo.”