ኤርሚያስ 24 FHB Father's Heart Bible™

24 ¹ናቡከደነፆር ንጉስ ባቢሎን ንኢኮንያን ወዲ ዮኣቄም ንጉስ ይሁዳ፥ ምስ መኳንንቲ ይሁዳን ጥበበኛታትን ሰረሕቲ ሓፂንን ካብ ኢየሩሳሌም ናብ ባቢሎን ድሕሪ ምምራኹ፥ ኣቦና ኣብ ቅድሚ ቤተ መቕደስ ኣቦና ዝተነበረ ክልተ መሶብ በለስ ኣርኣየኒ። ²እቲ ሓደ መሶብ ቀዲሙ ዝበሰለ እምብዛ ፅቡቕ በለስ ነበሮ፤ እቲ ካልኣይ መሶብ ግና ክሳዕ ዘይብላዕ ዝኸፍአ በለስ ነበሮ።

³ሽዑ ኣቦና “ኦ ኤርሚያስ፥ እንታይ ትሪኢ ኣለኻ?” ኢሉ ጠየቐኒ። ኣነ ድማ “በለስ” በልኩ፥ “እቲ ፅቡቕ እምብዛ ፅቡቕ እዩ፥ እቲ እኹይ ከዓ ክሳዕ ዘይብላዕ ዝኸፍአ እዩ።”

⁴ከምዙይ ዝብል ቃል ኣቦና ድማ ናባይ መፀ፦

⁵“ኣቦና ናይ እስራኤል ከምዙይ ይብል ኣሎ፦ ከምቶም ፅቡቓት በለስ፥ ከምኡ ነቶም ካብዚ ናብ ምድሪ ባቢሎናውያን ዝሰደድክዎም ምሩኻት ይሁዳ ከም ፅቡቕ ጌረ ኽርእዮም እየ።

⁶“ኣዒንተይ ንፅብቖም ኣብ ልዕሊኦም ከቕንዕ እየ፤ ናብዛ ምድሪ እዚኣ ኸዓ ክመልሶም እየ፤ ክሃንፆም እምበር ኣይፈርሶምን፥ ክተኽሎም እምበር ኣይነቕሎምን እየ። ⁷ንዓይ ከም ኣቦ ኽፈልጡ ልቢ ኽህቦም እየ፤ ንሳቶም ውሉደይ ክኾኑ እዮም፥ ኣነ ኸዓ ኣቦኦም ክኸውን እየ፤ ብምሉእ ልቦም ናባይ ክምለሱ እዮም እሞ።”

⁸“ከምቶም ክሳዕ ዘይብላዕ ዝኸፍአ እኩያት በለስ ግና—ይብል ኣቦና—ከምኡ ንሴዴቅያስ ንጉስ ይሁዳን ንመኳንንቱን ኣብዚ ወይ ኣብ ግብፂ ንዝተረፉ ተረፍ ኢየሩሳሌምን ክገብሮም እየ።

⁹“ኣብ ኵሎም መንግስታት ምድሪ፥ ናብ ዝሰጐጎም ኵሉ ቦታ፥ መስካሕክሒን መዓትን ውርደትን መላገፂን መመሰሊን መርገምን ክገብሮም እየ። ¹⁰ነታ ንኣኣቶምን ንኣቦታቶምን ዝሃብክዎም ምድሪ ክሳዕ ዝጠፍኡ፥ ሰይፍን ጥሜትን መቕሰፍትን ናብኣቶም ክሰድድ እየ።”