Bouei Jeremia la bhuk kam nyi lenbü
Seneibü Bou chem thedanga bhuk kam nyi settikei. Maibü shuong kho haka Babilon to langsenbü shuong — haoen seneibü Bou touje tela hoba hao kijakbü nyek haoen la kula. Amaibü shuong kho Zedekia hoba Jerusalema touje joubü, haoen satenkei dogo thounoubü shuong ki.
24 1Babilonbü Choba Nebukadnezarei Jihudabü Choba Jehoiakim shou Jekhonia hoba Jihudabü yaangenbü shuong, nam kümbü shuong hoba son nam kümbü shuong Jerusalem ka Babilon to langsenbü phaia, Bouei kü la seneibü Bou chem thedanga phobü bhuk kam nyi lenkei. 2Kam che ka maibütham bhuk, jihsiphai elibou sembü kikei; lubü kam ka shaula athük amaibütham bhuk kikei.
3Kheijinei Bouei kü to phekei, “Jeremia, nyi ai hapda?” Ngei laukei, “Bhuk, maibü kho maibütham, amaibü kho shaula athük amaibütham.”
4Kheijinei Boueibü ngüh kü jungto loukei:
5“Israelbü Bouei hai lauda: Ho maibü bhuk tegü, khei ngei haka Babilonbü kaodak to hautibü Jihudabü langsenbü shuong maibü dogo chühlabü.
6“Ngei maibü shanga haoen thüka kü nyek souhatlabü, hoba haoen ho kaodak to leian loungailabü; ngei haoen kümlabü, aleilulabü, haoen kelabü, apheienlabü. 7Ngo Bou dogo ngela shanga ngei haoen la maangpon kulabü; hoba haoen kü shousi shuong kilabü, ngo haoeneibü Bou kilabü, aishanga haoen maangpon khümboei kü jungto sepeilabü.’
8“Lausikei shaula athük amaibü bhuk tegü — dogo Bouei lauda — khei ngei Jihudabü Choba Zedekia, haoeibü yaangenbü shuong, hoba hanei ayingsi Ijep kaodaka joubü Jerusalembü joubü shuong to kümlabü.
9“Ngei haoen leian haubü aenei kaodak sangle pendou thedanga haoen konga, thushed, himou, amaaphelabü, tetlatalabü hoba shedsikhau yeitilabü. 10Ngei haoen hoba haoeneibü pisibou shuong la kubü kaodak ka haoen abangtila shongko, haoen thükto in, mühsinou hoba lim sungbakulabü.”
