Tata ya beto ke Lakisa Yelemi Bitunga Zole ya Bambuma ya Fike
Bitunga zole ya bambuma ya fike kele na mantwala ya yinzo. Ya mbote kele bankole yina ba me nata na Babilone—bayina Tata ya beto ke kuna dyaka mpe ke pesa ntima samu na kuzaba yandi. Ya yimbi kele Sidekya mpe bayina me bikana na Yelusalemi, bayina yindulaka ti bawu me guluka.
Tata ya beto ke zonza na bavese 3, 5–10
24 1Tata ya beto lakisaka munu bitunga zole ya bambuma ya fike yina ba tulaka na mantwala ya Yinzo ya Tata ya beto. Yawu salamaka na manima ya ntangu Nabukodonozole, ntinu ya Babilone, nataka na ngolo Yekonya, mwana ya Yoyakime, ntinu ya Yuda, kumosi na bamfumu ya Yuda, bisadi ya maboko, mpe bisadi ya bisengo, yandi katulaka bawu na Yelusalemi mpe nataka bawu na Babilone. 2Kitunga mosi vwandaka na bambuma ya fike ya mbote mingi, bonso bambuma ya ntete ya ntangu; kasi kitunga ya nkaka vwandaka na bambuma ya fike ya yimbi mingi, yina bantu lenda dya ve.
3Na yina, Tata ya beto yufulaka munu: «Yelemi, nge ke tala nki?» «Bambuma ya fike,» mu tubaka, «bambuma ya mbote kele ya mbote mingi, kasi bambuma ya yimbi kele ya yimbi mingi, yina bantu lenda dya ve.»
4Na yina, mambu ya Tata ya beto kuminaka munu mutindu yayi:
5«Tata ya beto ya Isayeli ke na kutuba mutindu yayi: Bonso bambuma yayi ya fike ya mbote, ni mutindu mosi mu ke tala bonso ya mbote bankole ya Yuda, yina mu fidisaka katuka awa tii na yinsi ya bantu ya Babilone.
6Mu ke tula meso ya munu na bawu samu na mambu ya mbote, mpe mu ke vutula bawu na yinsi yayi. Mu ke tunga bawu, mu ke pasula bawu ve; mu ke kunda bawu, mu ke timuna bawu ve. 7Mu ke pesa bawu ntima ya kuzaba munu bonso Tata; bawu ke kuma bana ya munu, mpe mu ke kuma Tata ya bawu, samu ti bawu ke vutuka na munu na ntima ya bawu nyonso.»
8«Kasi bonso bambuma ya fike ya yimbi, yina bantu lenda dya ve samu yawu me bola,» Tata ya beto ke tuba, «ni mutindu mosi mu ke sala Sidekya, ntinu ya Yuda, bamfumu ya yandi, mpe bantu ya Yelusalemi yina bikanaka, bayina ke zinga awa to na Ngipiti.
9«Mu ke sala bawu kima ya nsisi, mpasi, nsoni, kima ya kuseka, kima ya kufinga, mpe nsiingulu na mantwala ya bimfumu nyonso ya ntoto, na bisika nyonso yina mu ke nata bawu. 10Mu ke fidisa na bawu mbele ya mvita, nsatu, mpe kiyoolo, tii bawu ke zimbana nyonso na yinsi yina mu pesaka bawu mpe bankooko ya bawu.»