Jeremiah 22

22 ¹Ithumwui Avāna hithāda hānga: Judah awungawui shimshong kharāda vālu, kala apam chili tui hi hānglu,

²kala hānglu: O Judah awunga, Davidwui wungpamkhongli kapama, na, nawui raobing, kala ngavei hibingli zang kahai nawui mibing, ithumwui Avāwui tui nganālu. ³Ithumwui Avāna hithāda hānga: Mashun kala khamashung khangarong sālu; phama̱shaomi kahaipali kashaopāwui pāng eina kankhuimilu. Ramkazata, avāva̱ makhaleina, lah ra̱meinaoli marekharekpaimana, kala athumli khangama̱ masāpaimana, kala apam hili khayon makhalei ashee matāpaimana. ⁴Nathumna hi kachangkhat eina saakha, Davidwui wungpamkhongli kapama awungabing, awui raobing kala awui mibingna siguigari kala siguili kātongda ngavei hibingli zangra. ⁵Kha nathumna tui hibing mangananglakha, ina ikhalatta khangashit sāhaira, da ithumwui Avāna hānga: shim hi ruinganaili ngasāra.

⁶Ithumwui Avāna Judah awungashi shimkhurwui vang hithāda hānga: Na iwui vanga Gilead thaina, Lebanonwui kaphungton thaina; chithālala ina nali siwuk, khipānakha maleilui keinungbing onngasakra. ⁷Akha kachiva̱ awui khutlai eina sākakhayāngabing ina nathumli ngaranpinghaira; athumna nawui cedar mathāmeikap kaji katattāthata kala meili sa̱tāmihaora.

⁸Miyur kachungkhana keinung hili kānthuida akha eina akha ngahānrumra, "Khisāda PROHO Varena keinung kahaka hili hithāda sāhaokhala?"

⁹Athumna ngahānkāra, "Khikhalajila athumna athumwui Avāwui tuingashit horhaowa, vare kateibingli khoruma, kala athumli otram ngatha̱ya."

Avāna Shallumwui Vang Hānga

¹⁰Kathi vang chapkhangachā masālu lah ali machapngachālu; kha vākhui kahaia vang soso chapngachālu, khikhalajila ana awui pharāt ngalei theikhavai katang mavaila malatungmara.

¹¹Awui avāwui mahut awunga khangasā kala apam hi horkahai, Judah awunga Josiahwui naomayara Shallumwui pongli ithumwui Avāna hithāda hānga: Ana katang mavaila malatungmara. ¹²Athumna ali tukthuiwui apam chili ana thira, kala ngalei hi lāngda matheiluimara.

¹³Makhamashung eina awui shim sākakā, kala makhangarong eina awui ato kābing sākakā, khongnainaoli aremali ot sāngasaka kala awui pokhangai chi mamila a chili kakhanang ngasāranu, ¹⁴a china hānga, "Ina ikhalattawui shim kahaka, kala khamashā ato kābing eina sāra," kala chiwui vang charfa khamashā sasanga, cedarthing eina heirormi, kala hung eina heirormi.

¹⁵Cedar eina kateibingli reimei sāthuda na mungra̱khala? Nawui avāna phāshak phazā, chithālala ana mashun kala khamashung khangarong sai, chieina ali phālakhaowa.

¹⁶Ana kachāma kala khavātabingwui vang huimi, chieina phālakhaowa. Hi ili theikhui kakhalata maningmala? da ithumwui Avāna hānga. ¹⁷Kha nawui mik kala nawui ning chi nawui makhamashung apong eina tongkhavai, khayon makhalei ashee tākhavai, kala rekakharek kala khangama̱ sākhavaiwui vangmānga.

¹⁸Chiwui vang eina Judahwui awunga Josiahwui naomayara Jehoiakimwui pongli ithumwui Avāna hithāda hānga: Khipākha ali machapngachāmara: "O igato!" lah "O izarva̱!" Khipākha ali machapngachāmara: "O amei!" lah "O awui khangamkharei!" ¹⁹Ali gadhāwui chifa thāda chifara; tukkhuilaga Jerusalemwui ngaveibingwui kānda pahangngasakhaora. ²⁰Lebanonli reilaka vaolu; Bashanli nawui akhon juilu; Abarimwui eina vaolu, kaja nawui leikashe saikora sātekmihaira. ^a a v20 Abarim chi Jordan kongwui lamhāngli, Moab tampākwui thākta khalei phungrei akhana. ²¹Nawui ringphālak atambingli ina nali hānga, kha nana "Ina manganāmara" da hānga. Hi nganuilakhawui eina nawui apongna; nana iwui kahāng manganāsangmana. ²²"Masina nawui yaokahomabing saikora kashamshokra, kala nawui leikashebing raikathāli vāra; chithākha nawui makaphā makhayā saikorawui vang na khayakta maishihaora. ²³O Lebanonli kapamva̱, cedarthingbingwui ngachaili athip kasāva̱, naokhara̱ kachot nawuitungli rā tharan, nao khara̱va̱wui ringkhangā thāda, na kayākha ngahuihaokhala!"

²⁴Ina ringda lei tākam eina, da ithumwui Avāna hānga, Judahwui awunga Jehoiakimwui naomayara Coniah chi iwui yāpangli mahor namkhavai khutop ngasāsai kajila, ina nali ngakaimihaora. ²⁵"Ina nali nawui manglā khuikida kasābing, na ngacheeva̱bing, Babylonwui awunga Nebuchadnezzar kala Chaldeanaobingwui pāngli horsangra. ²⁶Ina nali kala nali kapharāva̱ nawui ava̱li, khani kapharā maleilui ram khangatei akhali horsangra; chili na thira. ²⁷Athumna latungluikhavai kahaowa ram chi, chili athum khikha malatungluimara."

²⁸Coniah mi hi yangkakharinga, sāshimān ngaleiham, khipākha ningmaphāwui asā akha ngasakmala? Khisāda ana kala awui naongarā pahangngasakhaida, athumna makatheiwui ramli horsangngasakhaokhala? ²⁹Ngalei, ngalei, ngalei, ithumwui Avāwui tui nganālu!

³⁰Ithumwui Avāna hithāda hānga: Mi hi nao makhalei, awui thotli matāchammara mi akha da kapisanglu; kaja awui ara̱-azā khipākha matāchammara, khipākha Davidwui wungpamkhongli mapammara lah Judahli latluida mamungmara.