Ubanmu Ya Kira Sarakuna ga Adalci

Ubanmu ya aiki Irmiya zuwa fādar kanta. Yosiya ya kāre matalauta, ya kuwa zauna lafiya; 'ya'yansa maza suna gini da itacen al'ul da aikin da ba a biya ba. Shallum ba zai ƙara ganin gida ba, Yehoyakim za a binne shi kamar jaki, Koniya kuma za a fizge shi kamar zoben hatimi.

Babi na 22.

Ga abin da Ubanmu ya ce, Ka gangara zuwa gidan sarkin Yahuda, ka furta wannan magana a can,

ka ce, Ka saurari maganar Ubanmu, ya sarkin Yahuda, kai da kake zaune a kan gadon sarautar Dawuda — kai, da fadawanka, da mutanenka da suke shiga ta waɗannan ƙofofi. Ga abin da Ubanmu ya ce, Ku yi adalci da gaskiya; ku ceci wanda aka yi wa fashi daga hannun mai danniya. Kada ku zalunci baƙo, ko maraya, ko gwauruwa, kada kuma ku yi musu rikici, kada kuma ku zub da jinin marar laifi a nan. Gama in har kuka yi wannan da gaske, sai sarakuna masu zama a kan gadon sarautar Dawuda su shiga ta waɗannan ƙofofi, suna hawan karusai da dawakai — sarkin, da fadawansa, da mutanensa. Amma in ba za ku saurari waɗannan maganganu ba, na rantse da kaina, in ji Ubanmu, cewa wannan gida zai zama kufai.

Ga abin da Ubanmu ya ce game da gidan sarautar Yahuda, A gare ni kai Gileyad ne, kololuwar Lebanon — duk da haka zan mai da kai jeji, birane da ba mai zama a cikinsu. Zan keɓe masu hallakarwa su yaƙe ka, kowanne da makamansa; za su sassare zaɓaɓɓun itatuwan al'ul naka su kuma jefa su cikin wuta.

Al'ummai masu yawa za su wuce ta wannan birni, su kuma tambayi juna, “Me ya sa Ubangiji ya yi haka da wannan babban birni?”

Za su amsa, “Domin sun yashe alkawarin Ubansu, suka bauta wa waɗansu alloli, suka kuma yi musu hidima.”

Ubanmu Ya Yi Magana a Kan Shallum

Kada ku yi kuka domin matacce ko ku yi makoki dominsa; a maimako ku yi kuka mai zafi domin wanda yake tafiya, gama ba zai dawo ba har abada yă ga ƙasar haihuwarsa.

Ga abin da Ubanmu ya ce game da Shallum ɗan Yosiya, sarkin Yahuda, wanda ya gāji mahaifinsa a sarauta, ya kuma bar wannan wuri, Ba zai taɓa dawowa ba. Zai mutu a inda aka kai shi bauta, ba kuwa zai ƙara ganin wannan ƙasa ba.

Kaiton wanda yake gina gidansa ba tare da adalci ba, yake kuma gina ɗakunan samansa da rashin gaskiya, wanda yake sa maƙwabcinsa aiki a banza, ba ya kuwa biyansa ladansa, wanda yake cewa, “Zan gina wa kaina babban gida mai faɗin ɗakunan sama,” yake kuma yanka manyan tagogi dominsa, yake lulluɓe shi da itacen al'ul, yake kuma shafa masa jan fenti mai haske.

Ashe kana sarauta ne domin ka fi waɗansu yawan itacen al'ul? Mahaifinka ya ci ya kuma sha, duk da haka ya yi adalci da gaskiya, sa'an nan al'amura suka yi masa kyau.

Ya kāre hakkin matalauta da masu bukata, saboda haka al'amura suka yi kyau. Ashe wannan ba shi ne ma'anar sanin ni ba? in ji Ubanmu. Amma idanunka da zuciyarka suna a kan ƙazamar riba kaɗai, a kan zub da jinin marar laifi, da kuma yin danniya da rikici.

Saboda haka Ubanmu ya ce game da Yehoyakim ɗan Yosiya, sarkin Yahuda, Ba wanda zai yi masa makoki, yana cewa, “Kaico, ɗan'uwana!” ko “Kaico, 'yar'uwata!” Ba wanda zai yi masa makoki, yana cewa, “Kaico, ranka yă daɗe!” ko “Kaico, mai martaba!” Za a yi masa jana'izar jaki — a ja shi a jefar da shi waje can bayan ƙofofin Urushalima. Ki hau zuwa Lebanon ki yi kuka; ki ɗaga muryarki a Bashan; ki yi kuka daga Abarim, gama dukan masoyanki sun ragargaje. ^a Na yi miki magana a lokutan jin daɗinki, amma kika ce, “Ba zan saurara ba.” Haka tafiyarki take tun ƙuruciyarki — ke ba ki yi biyayya da muryata ba. “Iska za ta kori dukan makiyayanki, masoyanki kuma za su tafi bauta; sa'an nan za ki sha kunya a kuma ƙasƙantar da ke saboda dukan muguntarki. Ke da kike zama a Lebanon, kina sheƙa a cikin itatuwan al'ul, yadda za ki yi nishi sa'ad da naƙudar haihuwa ta kama ki, azaba kamar ta mace mai naƙuda!”

Muddin ina raye, in ji Ubanmu, ko da Koniya ɗan Yehoyakim, sarkin Yahuda, zoben hatimi ne a hannun damana, duk da haka zan ɓalle ka daga wurin. “Zan ba da kai ga waɗanda suke neman ranka, waɗanda kake tsoro — Nebukadnezar sarkin Babila da kuma Babiloniyawa. Zan jefa kai da mahaifiyarka wadda ta haife ka zuwa wata ƙasa dabam, inda ba a haifi kowannenku ba — a can za ku mutu. Amma game da ƙasar da suke marmarin dawowa, ba za su taɓa dawowa can ba.”

Ashe wannan mutum Koniya tukunyar da aka raina, wadda ta farfashe ce, kwaryar da ba wanda yake so? Me ya sa aka jefar da shi tare da 'ya'yansa aka tura su cikin ƙasar da ba su sani ba? Ƙasa, ƙasa, ƙasa, ki saurari maganar Ubanmu!

Ga abin da Ubanmu ya ce, Ku rubuta wannan mutum marar 'ya'ya, mutumin da ba zai ci nasara ba a kwanakin ransa; gama ba wani daga cikin zuriyarsa da zai ci nasara, ba wanda zai zauna a kan gadon sarautar Dawuda ko yă ƙara yin mulki a Yahuda.