ኤርምያስ 22

22 ¹አባታችን እንዲህ ይላል፤ ወደ ይሁዳ ንጉሥ ቤት ውረድ፤ ይህንም ቃል በዚያ ተናገር፤

²እንዲህም በል፤ በዳዊት ዙፋን ላይ የተቀመጥህ የይሁዳ ንጉሥ ሆይ፤ የአባታችንን ቃል ስማ፤ አንተና ባሪያዎችህ፤ በእነዚህ በሮች የምትገባ ሕዝብህ ስሙ። ³አባታችን እንዲህ ይላል፤ ፍትሕንና ጽድቅን አድርጉ፤ የተበዘበዘውን ከአስጨናቂው እጅ አድኑ፤ መጻተኛውን፣ ድኻ አደጉን ወይም መበለቲቱን አትበድሉ፤ ዐመፅም አታድርጉባቸው፤ ንጹሕ ደምንም በዚህ ስፍራ አታፍስሱ። ⁴ይህን በእውነት ብታደርጉ፤ በዳዊት ዙፋን ላይ የሚቀመጡ ነገሥታት በሠረገላና በፈረስ ተቀምጠው በእነዚህ በሮች ይገባሉ፤ ንጉሡ፣ ባሪያዎቹና ሕዝቡ። ⁵ነገር ግን እነዚህን ቃሎች ባትሰሙ፤ በራሴ እምላለሁ፤ ይላል አባታችን፤ ይህ ቤት ባድማ ይሆናል።

⁶አባታችን ስለ ይሁዳ ንጉሣዊ ቤት እንዲህ ይላል፤ አንተ ለእኔ ገለዓድ ነህ፤ የሊባኖስ ጫፍ ነህ፤ ነገር ግን በረሓ አደርግሃለሁ፤ ማንም የማይኖርባቸው ከተሞች አደርግሃለሁ። ⁷አጥፊዎችን በአንተ ላይ አዘጋጃለሁ፤ እያንዳንዱም የጦር መሣሪያውን ይዞ ይመጣል፤ የተመረጡትን ዝግባዎችህን ይቈርጣሉ፤ ወደ እሳትም ይጥሏቸዋል።

⁸ብዙ ሕዝቦች በዚህች ከተማ አልፈው፤ “እግዚአብሔር በዚህች ታላቅ ከተማ ይህን ለምን አደረገ?” ብለው እርስ በርሳቸው ይጠያየቃሉ።

⁹እነርሱም፤ “የአባታቸውን ኪዳን ትተው፤ ሌሎች አማልክትን ስለ ሰገዱና ስላገለገሉ ነው” ብለው ይመልሳሉ።

አብ ስለ ሰሎም ይናገራል

¹⁰ለሞተው አታልቅሱ፤ ስለ እርሱም አትዘኑ፤ ይልቁንስ ለሚሄደው ምርር ብላችሁ አልቅሱ፤ የተወለደባትን ምድር ለማየት ከቶ አይመለስምና።

¹¹አባታችን ስለ ይሁዳ ንጉሥ ስለ ኢዮስያስ ልጅ ስለ ሰሎም፤ በአባቱ ፈንታ ነግሦ ከዚህ ስፍራ ስለ ወጣው እንዲህ ይላል፤ ከቶ አይመለስም። ¹²ማርከው ወደ ወሰዱበት ስፍራ በዚያ ይሞታል፤ ይህችንም ምድር ከቶ ዳግመኛ አያያትም።

¹³ቤቱን በዐመፅ፤ ሰገነቶቹንም በግፍ ለሚሠራ፤ ባልንጀራውን በከንቱ ለሚያሠራና ደመወዙን ለማይሰጠው ወዮለት፤ ¹⁴እርሱም፤ “ሰፊ ቤትና ሰፋፊ ሰገነቶች ለራሴ እሠራለሁ” ይላል፤ ሰፋፊ መስኮቶችንም ይከፍትለታል፤ በዝግባ ይለብጠዋል፤ በደማቅ ቀይ ቀለምም ይቀባዋል።

¹⁵በዝግባ ከሌሎች ስለ በለጥህ ትነግሣለህን? አባትህ በላና ጠጣ፤ ነገር ግን ፍትሕንና ጽድቅን አደረገ፤ ከዚያም መልካም ሆነለት።

¹⁶የድኻውንና የችግረኛውን ጕዳይ ተከራከረ፤ ስለዚህም መልካም ሆነለት። እኔን ማወቅ ማለት ይህ አይደለምን? ይላል አባታችን። ¹⁷ነገር ግን ዐይኖችህና ልብህ በግፍ በተገኘ ረብህ ላይ ብቻ ናቸው፤ ንጹሕ ደም በማፍሰስ ላይ፤ ግፍንና ዐመፅን በማድረግ ላይ ናቸው።

¹⁸ስለዚህ አባታችን ስለ ይሁዳ ንጉሥ ስለ ኢዮስያስ ልጅ ስለ ኢዮአቄም እንዲህ ይላል፤ ማንም፤ “ወዮ፣ ወንድሜ!” ወይም “ወዮ፣ እኅቴ!” ብሎ አያለቅስለትም፤ ማንም፤ “ወዮ፣ ጌታ ሆይ!” ወይም “ወዮ፣ ክቡርነቱ!” ብሎ አያለቅስለትም። ¹⁹እንደ አህያ ቀብር ይቀበራል፤ ተጐትቶ ከኢየሩሳሌም በሮች ወዲያ ተጥሎ ይጣላል። ²⁰ወደ ሊባኖስ ውጪና ጩኺ፤ በባሳን ድምፅሽን አሰሚ፤ ከዓባሪም ጩኺ፤ ፍቅረኞችሽ ሁሉ ተሰባብረዋልና። ^a a v20 ዓባሪም ከዮርዳኖስ ወንዝ በስተ ምሥራቅ፤ ከሞዓብ ሜዳዎች አጠገብ የሚገኝ የተራሮች ሰንሰለት ነው። ²¹በረፍትሽ ጊዜ ተናገርኩሽ፤ አንቺ ግን፤ “አልሰማም” አልሽ። ይህ ከወጣትነትሽ ጀምሮ መንገድሽ ነበረ፤ ድምፄን አልታዘዝሽም። ²²“ነፋስ እረኞችሽን ሁሉ ይነዳቸዋል፤ ፍቅረኞችሽም ወደ ምርኮ ይሄዳሉ፤ ያን ጊዜ ስለ ክፋትሽ ሁሉ ታፍሪያለሽ፤ ትዋረጂማለሽ። ²³በሊባኖስ የምትኖሪ፤ በዝግባዎች መካከል ሰፍረሽ የምትኖሪ ሆይ፤ የምጥ ጣር ሲይዝሽ፤ እንደምትወልድ ሴት ጭንቅ ሲይዝሽ እንደምን ትቃትቻለሽ!”

²⁴ሕያው እንደ ሆንሁ፤ ይላል አባታችን፤ የይሁዳ ንጉሥ የኢዮአቄም ልጅ ኮንያ በቀኝ እጄ ላይ የማኅተም ቀለበት ቢሆንም እንኳ፤ ከዚያ ነቅዬ እጥልሃለሁ። ²⁵“ነፍስህን ለሚሹ፤ አንተ ለምትፈራቸው፤ ለባቢሎን ንጉሥ ለናቡከደነጾርና ለባቢሎናውያን አሳልፌ እሰጥሃለሁ። ²⁶አንተንና የወለደችህን እናትህን ወደ ሌላ ምድር፤ ወደ አልተወለዳችሁባት ምድር እወረውራችኋለሁ፤ በዚያም ትሞታላችሁ። ²⁷ሊመለሱባት ወደሚናፍቋት ምድር ግን ከቶ አይመለሱም።”

²⁸ይህ ሰው ኮንያ የተናቀ፣ የተሰበረ ዕቃ ነውን? ማንም የማይፈልገው ዕቃ ነውን? እርሱና ልጆቹ ለምን ተወርውረው ወደማያውቋት ምድር ተጣሉ? ²⁹ምድር ሆይ፤ ምድር ሆይ፤ ምድር ሆይ፤ የአባታችንን ቃል ስሚ!

³⁰አባታችን እንዲህ ይላል፤ ይህን ሰው እንደ መካን ጻፉት፤ በዘመኑ የማይከናወንለት ሰው ነው፤ ከዘሩ አንዱም አይከናወንለትምና፤ በዳዊት ዙፋን ላይ የሚቀመጥ የለም፤ ዳግመኛም በይሁዳ የሚገዛ የለም።