ኤርምያስ 21

21 ¹ንጉሡ ሴዴቅያስ የመልክያስን ልጅ ፋሹርንና የማዕሤያን ልጅ ካህኑን ሶፎንያስን ወደ እርሱ በላከ ጊዜ፣ ከአባታችን ዘንድ ወደ ኤርምያስ የመጣው ቃል ይህ ነው፦ ²“እባክህ፣ የባቢሎን ንጉሥ ናቡከደነፆር ስለሚወጋን፣ ስለ እኛ አባታችንን ጠይቅልን። ምናልባት አባታችን እንደ ድንቅ ሥራዎቹ ሁሉ ያደርግልን ይሆናል፤ ጠላትም ከእኛ ዘንድ ይርቅ ዘንድ።”

³ኤርምያስም እንዲህ አላቸው፤ “ሴዴቅያስን እንዲህ በሉት፦

⁴የእስራኤል አባት እንዲህ ይላል፦ ‘እነሆ፣ ከቅጥሩ ውጭ በከበቡአችሁ በባቢሎን ንጉሥና በባቢሎናውያን ላይ የምትዋጉባቸውን በእጃችሁ ያሉትን የጦር መሣሪያዎች እመልሳለሁ፤ ወደዚህችም ከተማ መካከል እሰበስባቸዋለሁ። ⁵እኔ ራሴ በተዘረጋ እጅና በብርቱ ክንድ፣ በቍጣ፣ በመዓትና በታላቅ ንዴት እወጋችኋለሁ። ⁶የዚህችን ከተማ ነዋሪዎች፣ ሰውንም እንስሳንም እመታለሁ፤ በታላቅ ቸነፈርም ይሞታሉ። ⁷ከዚያም በኋላ፣ ይላል አባታችን፣ የይሁዳን ንጉሥ ሴዴቅያስን፣ ባሪያዎቹንም፣ በዚህችም ከተማ ከቸነፈሩ፣ ከሰይፉና ከራብ የተረፉትን ሕዝብ፣ ሕይወታቸውን ለሚሹ ጠላቶቻቸው፣ ለባቢሎን ንጉሥ ለናቡከደነፆር አሳልፌ እሰጣቸዋለሁ። በሰይፍም ይመታቸዋል፤ አይራራላቸውም፣ አይምራቸውም፣ አያዝንላቸውም።

⁸ለዚህም ሕዝብ አባታችን እንዲህ ይላል በላቸው፦ እነሆ፣ የሕይወትን መንገድና የሞትን መንገድ በፊታችሁ አኖራለሁ። ⁹በዚህች ከተማ የሚቀር ሁሉ በሰይፍ፣ በራብና በቸነፈር ይሞታል፤ ወጥቶ ለሚከቡት ባቢሎናውያን እጅ የሚሰጥ ግን በሕይወት ይኖራል፤ ነፍሱም ምርኮ ሆና ትተርፍለታለች። ¹⁰ፊቴን በዚህች ከተማ ላይ ለክፉ አድርጌአለሁ እንጂ ለበጎ አይደለም፣ ይላል አባታችን። በእሳት ለሚያቃጥላት ለባቢሎን ንጉሥ አሳልፋ ትሰጣለች።

የአባታችን ቃል ለዳዊት ቤት

¹¹ለይሁዳ ንጉሣዊ ቤትም እንዲህ በል፦ የአባታችንን ቃል ስሙ።

¹²የዳዊት ቤት ሆይ፣ አባታችን እንዲህ ይላል፦ በማለዳ ሁሉ በትክክል ፍረዱ፤ የተበዘበዘውን ከበዳዩ እጅ አድኑ፤ አለዚያ ቍጣዬ በክፉ ሥራችሁ ምክንያት እንደ እሳት ይነድዳል፤ የሚያጠፋውም ሳይኖር ይቃጠላል። ¹³እነሆ፣ አንቺ በሸለቆው በላይ የምትኖሪ፣ የሜዳው ዐለት ሆይ፣ እኔ የተቃወምሁሽ ነኝ፣ ይላል አባታችን፤ “በእኛ ላይ ሊወርድ የሚችል ማን ነው? ወደ መኖሪያችንስ ሊገባ የሚችል ማን ነው?” የምትዪ። ^a a v13 ኢየሩሳሌም በዙሪያዋ ካሉት ሸለቆዎች በላይ ከፍ ባለ ዳገት ላይ ትቀመጥ ነበር፤ ይህም ለሕዝቧ ከተማይቱ የማትደፈር እንደ ሆነች የሐሰት እምነት ሰጥቷቸው ነበር። ¹⁴እንደ ሥራችሁ ፍሬ እቀጣችኋለሁ፣ ይላል አባታችን። በዱሯም እሳት አነድዳለሁ፤ በዙሪያዋ ያለውንም ሁሉ ይበላል።’”