எரேமியா 21

21 ¹பாபிலோன் ராஜாவாகிய நேபுகாத்நேச்சார் அவர்களுக்கு விரோதமாய் யுத்தம்செய்கையில், சிதேக்கியா ராஜா மல்கியாவின் குமாரனாகிய பஸ்கூரையும், மாசெயாவின் குமாரனாகிய ஆசாரியன் செப்பனியாவையும் எரேமியாவினிடத்தில் அனுப்பினபோது, எங்கள் பிதாவினிடத்திலிருந்து எரேமியாவுக்கு உண்டான வார்த்தை: ²“பாபிலோன் ராஜாவாகிய நேபுகாத்நேச்சார் எங்களுக்கு விரோதமாய் யுத்தம்பண்ணுகிறபடியால், எங்களுக்காக எங்கள் பிதாவை நோக்கி விண்ணப்பம்செய்யும்; ஒருவேளை எங்கள் பிதா தம்முடைய எல்லா அற்புதங்களின்படியும் எங்களுக்குச் செய்வதினால், சத்துரு எங்களைவிட்டு விலகிப்போவான்” என்று சொல்லச்சொன்னார்கள்.

³அப்பொழுது எரேமியா அவர்களை நோக்கி: “நீங்கள் சிதேக்கியாவுக்குச் சொல்லவேண்டியது என்னவென்றால்:

⁴இஸ்ரவேலின் பிதா சொல்லுகிறது என்னவென்றால்: பாபிலோன் ராஜாவுக்கும், மதிலுக்கு வெளியே உங்களை முற்றுகையிடுகிற கல்தேயருக்கும் விரோதமாய் நீங்கள் உங்கள் கைகளில் பிடித்திருக்கிற யுத்த ஆயுதங்களை நான் திருப்பி, இந்த நகரத்தின் நடுவிலே ஒன்றுசேர்ப்பேன். ⁵நான்தானே நீட்டின கையினாலும், பலத்த புயத்தினாலும், கோபத்தினாலும், உக்கிரத்தினாலும், மகா கடுங்கோபத்தினாலும் உங்களுக்கு விரோதமாய் யுத்தம்பண்ணுவேன். ⁶இந்த நகரத்தின் குடிகளாகிய மனுஷரையும் மிருகங்களையும் சங்கரிப்பேன்; அவர்கள் மகா கொள்ளைநோயால் சாவார்கள். ⁷அதற்குப்பின்பு, யூதாவின் ராஜாவாகிய சிதேக்கியாவையும், அவனுடைய ஊழியக்காரரையும், இந்த நகரத்தில் கொள்ளைநோய்க்கும் பட்டயத்துக்கும் பஞ்சத்துக்கும் தப்பியிருக்கிற ஜனத்தையும், பாபிலோன் ராஜாவாகிய நேபுகாத்நேச்சாருடைய கையிலும், அவர்களுடைய பிராணனை வாங்கத் தேடுகிற அவர்களுடைய சத்துருக்களின் கையிலும் ஒப்புக்கொடுப்பேன் என்று எங்கள் பிதா சொல்லுகிறார்; அவன் அவர்களைப் பட்டயக்கருக்கினால் வெட்டுவான்; அவன் தப்பவிடமாட்டான், மன்னிக்கமாட்டான், இரக்கம் காட்டமாட்டான்.

⁸மேலும் இந்த ஜனங்களை நோக்கி நீ சொல்லவேண்டியது என்னவென்றால், எங்கள் பிதா சொல்லுகிறது: இதோ, நான் ஜீவனுக்கான வழியையும் மரணத்துக்கான வழியையும் உங்களுக்கு முன்பாக வைக்கிறேன். ⁹இந்த நகரத்தில் தங்கியிருக்கிறவன் பட்டயத்தாலும் பஞ்சத்தாலும் கொள்ளைநோயாலும் சாவான்; உங்களை முற்றுகையிடுகிற கல்தேயரிடத்தில் போய்ச் சரணடைகிறவனோ பிழைத்திருப்பான்; அவனுடைய பிராணன் அவனுக்குக் கொள்ளையாய்க் கிடைத்ததுபோலத் தப்பிப்பிழைப்பான். ¹⁰நான் இந்த நகரத்துக்கு விரோதமாய் நன்மைக்கல்ல, தீமைக்கே என் முகத்தைத் திருப்பினேன் என்று எங்கள் பிதா சொல்லுகிறார்; அது பாபிலோன் ராஜாவின் கையில் ஒப்புக்கொடுக்கப்படும், அவன் அதை அக்கினியால் சுட்டெரிப்பான்.

பிதாவானவர் தாவீதின் வம்சத்திற்குச் சொன்ன வார்த்தை

¹¹யூதாவின் ராஜவம்சத்தாரை நோக்கி: எங்கள் பிதாவின் வார்த்தையைக் கேளுங்கள் என்று சொல்.

¹²தாவீதின் வம்சத்தாரே, எங்கள் பிதா சொல்லுகிறது என்னவென்றால்: ஒவ்வொரு காலையிலும் நீதியாய் நியாயம் விசாரியுங்கள்; கொள்ளையிடப்பட்டவனை ஒடுக்குகிறவனுடைய கையிலிருந்து விடுவியுங்கள்; இல்லாவிட்டால் உங்கள் துன்மார்க்கமான செய்கைகளினிமித்தம் என் கோபம் அக்கினியைப்போல் பற்றியெரியும், அதை அவிக்க ஒருவரும் இராதிருப்பார். ¹³இதோ, பள்ளத்தாக்கின்மேல் குடியிருக்கிறவளே, உனக்கு விரோதமாய் நான் இருக்கிறேன், சமபூமியின் கன்மலையே என்று எங்கள் பிதா சொல்லுகிறார்—“எங்களுக்கு விரோதமாய் இறங்கிவருகிறவன் யார்? எங்கள் வாசஸ்தலங்களுக்குள் பிரவேசிக்கிறவன் யார்?” என்று சொல்லுகிறவளே. ^a a v13 எருசலேம் தன்னைச் சுற்றியிருந்த பள்ளத்தாக்குகளுக்கு மேலான உயர்ந்த மேட்டின்மேல் அமைந்திருந்தது; இது, தங்கள் நகரம் யாராலும் தாக்கமுடியாதது என்ற பொய்யான நம்பிக்கையை அதின் குடிகளுக்கு உண்டாக்கியது. ¹⁴உங்கள் செய்கைகளின் பலனுக்குத்தக்கதாக நான் உங்களைத் தண்டிப்பேன், என்று எங்கள் பிதா சொல்லுகிறார். அவளுடைய வனத்திலே நான் தீ மூட்டுவேன், அது அவளைச் சுற்றியுள்ள எல்லாவற்றையும் பட்சித்துப்போடும்.”