Pitri pora Zedekiah laga binti ke jawab dise
Raja Zedekiah pora Babylon laga biruddhe ekta asurit kaam hobo koi asha kori kene khobor diya manu pathai. Jowab tu etu laga ulta ahe — amar Pitri nijor sohor laga biruddhe lorai koribo. Manu khan laga hamne te duita rasta rakhe: dewal laga bhitor te mori jabi, nohoile hath uthai diya aru jinda thakibi. Raja laga ghor pora thik bisar koribo lage.
21 1Raja Zedekiah pora Malchiah laga putro Pashhur aru Maaseiah laga putro, purohit Zephaniah ke Jeremiah logot pathai diya somoi te, amar Pitri pora Jeremiah logot ahise Kotha tu eneka ase: 2“Daya kori kene amikhan nimite amar Pitri ke hudi dibi, kilemane Babylon laga raja Nebuchadnezzar pora amikhan ke hamla kori ase. Hunabo amar Pitri pora Tar laga sob asurit kaam khan pora amikhan logot kaam koribo, titia dushman tu amikhan pora ghuri jabo.”
3Titia Jeremiah pora tarkhan ke koise, “Zedekiah ke eneka kobi:
4Israel laga Pitri pora eneka koi ase: “Dewar laga bahar te tumikhan ke gheri thaka Babylon laga raja aru Babylon manuh khan bhirodh te cholai thaka, tumikhan laga hath te thaka hathiyar khan ke, Moi ghuri abo, aru eitu khan ke eitu sohor laga maja te joma koribo. 5Moi nijor pasarai diya hath aru takotwala bahu pora, khong, bisi khong aru dangor gusa pora, tumikhan logot lorai koribo. 6Moi eitu sohor te thaka manuh khan ke, manuh aru janwar duita ke bhi, mari dibo; tarkhan dangor bemari pora mori jabo. 7Tar pichete, amar Pitri pora koi ase, Moi Judah laga raja Zedekiah ke, tar laga noukar khan ke, aru eitu sohor te bemari, talwar aru akal pora bachi juwa manuh khan ke, tarkhan laga jibon bisara dushman, Babylon laga raja Nebuchadnezzar laga hath te di dibo. Tar pora tarkhan ke talwar pora maribo—eku morom nai, eku chari nadibo, eku doya nai.”
8Eitu manuh khan ke amar Pitri ki koi ase eitu kobi: Moi tumikhan age te jibon laga rasta aru mrityu laga rasta rakhi dise. 9Kun manuh eitu sohor te thakibo, tai talwar, akal aru bemari pora moribo; kintu kun manuh gheri thaka Babylon manuh khan logot nijor ke di dibo, tai jinda thakibo, aru tar laga jibon ke luth laga maal nisena bachai rakhibo. 10Moi eitu sohor bhirodh te bhal nimite nohoi, kintu biya nimite Moi laga mukh rakhi dise, amar Pitri pora koi ase. Eitu Babylon laga raja laga hath te di dibo, aru tai eitu ke jui pora julai dibo.
David laga ghor ke Pitri laga Kotha
11Judah laga rajani ghor ke kobi: amar Pitri laga Kotha huni bi.
12David laga ghor, amar Pitri pora koi ase: Har din phojur te thik pora bisar koribi, luth kora manuh ke tarkhan ke julum kora manuh laga hath pora chutkai dibi, nohole tumikhan laga biya kaam khan nimite Moi laga khong jui nisena ulai jabo, aru eitu ke bhujabole kun bhi nathakibo. 13Sabi, Moi tumi bhirodh te ase, tumi jun tu upotyoka laga uporte thaki ase, tumi somotol laga pathor, amar Pitri pora koi ase—tumi jun koi ase, “Kun amikhan bhirodh te nami ahibo? Kun amikhan laga ghor khan te ghusi bo?” a a v13 Jerusalem tu chari phale thaka upotyoka khan laga uporte ekta ucha pahar te bohi thakise, aru eitu pora ta laga manuh khan ke eitu sohor ke kun bhi hamla koribo napare koi kene ekta misa biswas dise. 14Tumikhan laga kaam khan ki pabole thik ase, eitu hisab te Moi tumikhan ke saja dibo, amar Pitri pora koi ase. Moi tai laga jongol te ekta jui lagai dibo, aru eitu tai laga chari phale sob jinis ke khai dibo.”