Avāna Zedekiahwui Kapoli Ngahānkā
Awunga Zedekiahna Babylonwui ngasoda khangachon akha sāmiranu da ningchāngda mi chiho. Ngahānkhamang chiya chiwui ngatei eina: ithumwui Avāna awui keinung khalatta ngasungra. Mibingwui mangāli apong khani chitheimi: keinung phākho alungli thilu, lah khaorāda ringlu. Awungwui shimkhurna mashun eina bichar sāphalu.
21 1Awunga Zedekiahna Malchiahwui naomayara Pashhur kala Ma-aseiahwui naomayara Zephaniah pāngmonli Jeremiahli chihovā tharan, ithumwui Avāwui tui china awuili rāhānga: 2"Ithumwui vang ithumwui Avāli seihā sāmilu, kaja Babylonwui awunga Nebuchadnezzarna ithumli ngararda leili. Kalikha ithumwui Avāna awui matakhak kahai ot saikora eina ithumli sāmipaira, chithākha yangkashe chi ithumwui eina hātkhuira."
3Chieina Jeremiahna athumli hānga, "Zedekiahli hithāda hānglu:
4Israelwui Avāna hithāda hānga: "Yanglu, phākhowui ayarli nathumli kuinamkasā Babylonwui awunga kala Babylonnaobing nathumna ngarar sākasā, nathumwui pāngli khalei raisāri chi ina ngalan ngasakmira, kala athumli keinung hiwui alungli kaziphaira. 5Imāng eina ina pāng katingvai kala pāngthei kharei eina, malungvāt, malung kasā, kala reikhamatai malungkhavāt eina nathumli ngararmira. 6Keinung hili kapambing, mi kala sā, ina thikhangasakmira; athum reikhamatai kazātkashi eina thira. 7Naoda, da ithumwui Avāna hānga, ina Judahwui awunga Zedekiah, awui raobing, kala keinung hili kazātkashi, raighai, kala chāmrei eina taishokabingli, Babylonwui awunga Nebuchadnezzarwui pāngli, kala athumwui mirin pha yangkashebingwui pāngli mira. Ana athumli raighai eina shaothatra; lumashanla malumashanmimara, kashākla mashākmimara, lukhamashan pemting masāmimara."
8Kala mibing hili nana hithāda hāngra: Ithumwui Avāna hithāda hānga, Yanglu, ina nathumwui mangāli kharingwui apong kala kathiwui apong chipamhaira. 9Keinung hili kapambing raighai eina, chāmrei eina, kala kazātkashi eina thira; kha nathumli kuinamkasā Babylonnaobingwuili yāmkasangbing ringra, awui mirin raimazum sāda samphangra. 10Kaphā khavai maningla makaphā khavai, ina keinung hishong imai ngareizanghaira, da ithumwui Avāna hānga. Chi Babylonwui awungawui pāngli mihaira, kala ana mei eina thottāmihaora.
Davidwui Shimli Avāwui Tui
11Judahwui awunga shimli hānglu: Ithumwui Avāwui tui nganālu.
12Davidwui shim, ithumwui Avāna hithāda hānga: Ngathor kachida mashun eina bichar sāmilu, phama̱shaomi kahaipali kashaopāwui pāngwui eina kankhuimilu; maningkha nathumwui makaphā otsakwui vang iwui malungkhavāt mei thāda shokta, chuida, khipākhana makhāngmathotmara. 13Yanglu, ina nathumli ngakaishida lei, O tampākwui tungli kapama, khanganiwui lunghār, da ithumwui Avāna hānga; nathumna hānga, "Khipāna ithumli ngararda tungra̱khala? Khipāna ithumwui pamkhavaili zangrakhala?" a a v13 Jerusalem chi akuimareida khalei tampākbingwui tungli kaphung kajui akhatungli leisai, chi awui mibingli keinung hi khipākhana ngararlaga mayuishapmara da mashun maningmāng kachihān mihaowa. 14Nathumwui otsak samphangkhangayi athishurda ina nathumli tandi mira, da ithumwui Avāna hānga. Ina awui ngahongli mei kahai thotra, kala chi meina awui kuimareili khalei saikora chuitāserhaora."
