ପିତା ସିଦିକୀୟଙ୍କ ନିବେଦନର ଉତ୍ତର ଦିଅନ୍ତି

ରାଜା ସିଦିକିୟ ବାବିଲ ବିରୁଦ୍ଧରେ ଏକ ଆଶ୍ଚର୍ଯ୍ୟ କର୍ମର ଆଶାରେ ଦୂତ ପଠାନ୍ତି। ଉତ୍ତରଟି ତାହାର ଓଲଟା — ଆମ୍ଭମାନଙ୍କ ପିତା ନିଜ ନଗର ବିରୁଦ୍ଧରେ ଯୁଦ୍ଧ କରିବେ। ଲୋକମାନଙ୍କ ସମ୍ମୁଖରେ ଦୁଇଟି ପଥ ରଖାଯାଏ: ପ୍ରାଚୀର ଭିତରେ ମର, କିମ୍ବା ଆତ୍ମସମର୍ପଣ କରି ବଞ୍ଚ। ରାଜବଂଶ ନ୍ୟାୟରେ ବିଚାର କରିବା ଆବଶ୍ୟକ।

ଅଧ୍ୟାୟ 21।

ଯେଉଁ ସମୟରେ ସିଦିକୀୟ ରାଜା ମଲ୍‌କୀୟର ପୁତ୍ର ପଶ୍‌ହୂର ଓ ମାସେୟର ପୁତ୍ର ସଫନୀୟ ଯାଜକଙ୍କୁ ଯିରିମିୟଙ୍କ ନିକଟକୁ ପ୍ରେରଣ କଲେ, ସେତେବେଳେ ପିତାଙ୍କଠାରୁ ଯିରିମିୟଙ୍କ ନିକଟକୁ ଯେଉଁ ବାକ୍ୟ ଉପସ୍ଥିତ ହେଲା, ତାହା ଏହି — “ବାବିଲର ରାଜା ନବୂଖଦ୍‌ନିତ୍ସର ଆମ୍ଭମାନଙ୍କୁ ଆକ୍ରମଣ କରୁଅଛି, ଏଣୁ ଦୟାକରି ଆମ୍ଭମାନଙ୍କ ନିମନ୍ତେ ପିତାଙ୍କୁ ପଚାରନ୍ତୁ। କେଜାଣି ପିତା ଆପଣା ସମସ୍ତ ଆଶ୍ଚର୍ଯ୍ୟକର୍ମ ଦ୍ଵାରା ଆମ୍ଭମାନଙ୍କ ପ୍ରତି ବ୍ୟଵହାର କରିବେ, ତହିଁରେ ସେହି ଶତ୍ରୁ ଆମ୍ଭମାନଙ୍କ ନିକଟରୁ ଫେରିଯିବ।”

ସେତେବେଳେ ଯିରିମିୟ ସେମାନଙ୍କୁ କହିଲେ, “ତୁମ୍ଭେମାନେ ସିଦିକୀୟଙ୍କୁ ଏହି କଥା କୁହ —

ଇସ୍ରାଏଲର ପିତା ଏହି କଥା କହନ୍ତି, ‘ଦେଖ, ବାବିଲର ରାଜା ଓ ପ୍ରାଚୀର ବାହାରେ ତୁମ୍ଭମାନଙ୍କୁ ଅବରୋଧ କରିଥିବା କଲ୍‌ଦୀୟମାନଙ୍କ ବିରୁଦ୍ଧରେ ବ୍ୟଵହୃତ ତୁମ୍ଭମାନଙ୍କ ହସ୍ତସ୍ଥିତ ଯୁଦ୍ଧାସ୍ତ୍ରସବୁ ଆମ୍ଭେ ଫେରାଇ ଆଣି ଏହି ନଗରର ମଧ୍ୟସ୍ଥାନରେ ସଂଗ୍ରହ କରିବା। ପୁଣି, ଆମ୍ଭେ ନିଜେ ବିସ୍ତୀର୍ଣ୍ଣ ହସ୍ତ ଓ ବଳବାନ ବାହୁ ଦ୍ଵାରା, କ୍ରୋଧ, ପ୍ରକୋପ ଓ ମହାକୋପରେ ତୁମ୍ଭମାନଙ୍କ ବିରୁଦ୍ଧରେ ଯୁଦ୍ଧ କରିବା। ଆମ୍ଭେ ଏହି ନଗରନିବାସୀ ମନୁଷ୍ୟ ଓ ପଶୁ ସମସ୍ତଙ୍କୁ ଆଘାତ କରିବା; ସେମାନେ ମହାମାରୀରେ ମରିବେ। ପିତା କହନ୍ତି, ତହିଁ ଉତ୍ତାରେ ଆମ୍ଭେ ଯିହୂଦାର ରାଜା ସିଦିକୀୟକୁ, ତାହାର ଦାସମାନଙ୍କୁ, ପୁଣି ଏହି ନଗରସ୍ଥିତ ଯେଉଁ ଲୋକମାନେ ମହାମାରୀ, ଖଡ୍ଗ ଓ ଦୁର୍ଭିକ୍ଷରୁ ବଞ୍ଚିବେ, ସେମାନଙ୍କୁ ବାବିଲର ରାଜା ନବୂଖଦ୍‌ନିତ୍ସରର ହସ୍ତରେ, ଅର୍ଥାତ୍‌ ସେମାନଙ୍କ ପ୍ରାଣର ଅନ୍ଵେଷଣକାରୀ ଶତ୍ରୁମାନଙ୍କ ହସ୍ତରେ ସମର୍ପଣ କରିବା। ସେ ସେମାନଙ୍କୁ ଖଡ୍ଗଧାରରେ ଆଘାତ କରିବ — ଦୟା ନ କରିବ, କ୍ଷମା ନ କରିବ, କରୁଣା ନ କରିବ।’

ଆଉ, ତୁମ୍ଭେ ଏହି ଲୋକମାନଙ୍କୁ କୁହ, ପିତା ଏହି କଥା କହନ୍ତି, ‘ଦେଖ, ଆମ୍ଭେ ତୁମ୍ଭମାନଙ୍କ ସମ୍ମୁଖରେ ଜୀବନର ପଥ ଓ ମୃତ୍ୟୁର ପଥ ରଖୁଅଛୁ। ଯେ ଏହି ନଗରରେ ରହିବ, ସେ ଖଡ୍ଗ, ଦୁର୍ଭିକ୍ଷ ଓ ମହାମାରୀରେ ମରିବ; ମାତ୍ର ଯେ ବାହାରିଯାଇ ତୁମ୍ଭମାନଙ୍କୁ ଅବରୋଧକାରୀ କଲ୍‌ଦୀୟମାନଙ୍କ ନିକଟରେ ଆତ୍ମସମର୍ପଣ କରିବ, ସେ ବଞ୍ଚିବ, ପୁଣି ଆପଣା ପ୍ରାଣ ଲୁଟିତ ଦ୍ରବ୍ୟ ତୁଲ୍ୟ ରକ୍ଷା କରିବ। ପିତା କହନ୍ତି, କାରଣ ଆମ୍ଭେ ମଙ୍ଗଳ ନିମନ୍ତେ ନୁହେଁ, ମାତ୍ର ଅମଙ୍ଗଳ ନିମନ୍ତେ ଏହି ନଗର ବିରୁଦ୍ଧରେ ଆପଣା ମୁଖ ରଖିଅଛୁ। ତାହା ବାବିଲ ରାଜାର ହସ୍ତରେ ସମର୍ପିତ ହେବ, ଆଉ ସେ ତାହା ଅଗ୍ନିରେ ଦଗ୍ଧ କରିବ।’

ଦାଉଦଙ୍କ ବଂଶ ପ୍ରତି ପିତାଙ୍କ ବାକ୍ୟ

ଆଉ, ଯିହୂଦାର ରାଜବଂଶ ବିଷୟରେ କୁହ, ତୁମ୍ଭେମାନେ ପିତାଙ୍କ ବାକ୍ୟ ଶୁଣ।

ହେ ଦାଉଦ ବଂଶ, ପିତା ଏହି କଥା କହନ୍ତି, ‘ତୁମ୍ଭେମାନେ ପ୍ରତି ପ୍ରଭାତରେ ନ୍ୟାୟ ବିଚାର କର, ଅତ୍ୟାଚାରୀର ହସ୍ତରୁ ଲୁଣ୍ଠିତ ବ୍ୟକ୍ତିକୁ ଉଦ୍ଧାର କର, ନୋହିଲେ ତୁମ୍ଭମାନଙ୍କ ଦୁଷ୍କର୍ମ ସକାଶୁ ଆମ୍ଭର କ୍ରୋଧ ଅଗ୍ନି ପରି ଜ୍ଵଳି ଉଠିବ, ଆଉ ତାହା ନିର୍ଵାଣକାରୀ କେହି ନ ଥାଇ ଦଗ୍ଧ କରିବ। ପିତା କହନ୍ତି, ହେ ଉପତ୍ୟକାର ଊର୍ଦ୍ଧ୍ଵରେ ବାସକାରିଣୀ, ହେ ସମଭୂମିର ଶୈଳ, ଦେଖ, ଆମ୍ଭେ ତୁମ୍ଭର ପ୍ରତିକୂଳ — ତୁମ୍ଭେ ତ କହୁଅଛ, ‘ଆମ୍ଭମାନଙ୍କ ବିରୁଦ୍ଧରେ କିଏ ଓହ୍ଲାଇ ଆସିବ? ଆମ୍ଭମାନଙ୍କ ବାସସ୍ଥାନରେ କିଏ ପ୍ରବେଶ କରିବ?’ ^a ପିତା କହନ୍ତି, ଆମ୍ଭେ ତୁମ୍ଭମାନଙ୍କ କର୍ମାନୁସାରେ ତୁମ୍ଭମାନଙ୍କୁ ଦଣ୍ଡ ଦେବା। ଆମ୍ଭେ ତାହାର ବନରେ ଅଗ୍ନି ଜ୍ଵଳାଇବା, ଆଉ ତାହା ତାହାର ଚତୁର୍ଦିଗସ୍ଥ ସମସ୍ତ ଗ୍ରାସ କରିବ।’”