Ithe Agĩcookia Ihooya rĩa Zedekia
Mũthamaki Zedekia agatũma andũ eerĩgĩrĩire ũndũ wa kũgegania wa kũhootana na Babuloni. Macookio nĩ o ũngĩ wake: Ithe witũ arĩ ahũũrane na itũũra rĩake mwene. Andũ makaigĩrwo njĩra igĩrĩ: gũkuĩra thĩinĩ wa thingo, kana kwĩneana matũũre muoyo. Nyũmba ya ũthamaki no nginya ĩtuanagĩre ciira na kĩhooto.
21 1Kiugo kĩrĩa gĩokire kũrĩ Jeremia kuuma kũrĩ Ithe witũ rĩrĩa Mũthamaki Zedekia aamũtũmĩire Pashuri mũrũ wa Malkija, na Zefania mũthĩnjĩri Ngai, mũrũ wa Maaseia, atĩrĩ: 2“Twĩhoere harĩ Ithe witũ, tondũ Nebukadinezaru mũthamaki wa Babuloni nĩaratũtharĩkĩra. Hihi Ithe witũ nĩagatũrĩĩkĩra kũringana na ciama ciake ciothe, nĩguo thũ ĩtweherere.”
3Naake Jeremia akĩmeera atĩrĩ, “Ĩrai Zedekia ũũ:
4Ũũ nĩguo Ithe wa Isiraeli ekuuga: ‘Nĩngũcookia na thuutha indo cia mbaara iria irĩ mookoinĩ manyu, iria mũrahũthĩra gũũkĩrĩra mũthamaki wa Babuloni na andũ a Babuloni arĩa mamũrigiicĩirie nja ya rũthingo, na ndĩcicookanĩrĩrie gatagatĩinĩ ka itũũra rĩĩrĩ inene. 5Niĩ mwene nĩngarũa na inyuĩ na guoko gũtambũrũkie, na njara ĩrĩ hinya, ndĩ na marakara, na ũrũũru, na mangʼũrĩ manene. 6Nĩngaringa andũ arĩa matũũraga itũũra rĩĩrĩ inene, andũ o hamwe na nyamũ; nĩmagakua na mũthiro mũnene. 7Thuutha ũcio, ũguo nĩguo Ithe witũ ekuuga, nĩnganeana Zedekia mũthamaki wa Juda, na ndungata ciake, na andũ arĩa marĩ itũũra rĩĩrĩ inene arĩa magaatigara thuutha wa mũthiro, na rũhiũ rwa njora, na ngʼaragu, mookoinĩ ma Nebukadinezaru mũthamaki wa Babuloni, thũ ciao iria icaragia mĩoyo yao. Nĩakamaringa na rũhiũ rwa njora—atarĩ na tha, atekũmahonokia, na atekũmaiguĩra tha.’
8Ĩra andũ aya ũrĩa Ithe witũ ekuuga: Nĩndamũigĩra mbere njĩra ya muoyo na njĩra ya gĩkuũ. 9Mũndũ o wothe ũrĩa ũgũtũũra itũũra rĩĩrĩ inene nĩagakua na rũhiũ rwa njora, na ngʼaragu, na mũthiro; no mũndũ o wothe ũrĩa ũkeneana kũrĩ andũ a Babuloni arĩa mamũrigiicĩirie nĩagatũũra muoyo, naguo muoyo wake ũtuĩke ta ndaho. 10Nĩnjerekeirie ũthiũ wakwa itũũra rĩĩrĩ inene nĩguo ndĩrĩĩke ũũru, no ti wega, ũguo nĩguo Ithe witũ ekuuga. Nĩrĩkaneanwo mookoinĩ ma mũthamaki wa Babuloni, nake arĩcine na mwaki.
Kiugo kĩa Ithe kũrĩ Nyũmba ya Daudi
11Ĩra nyũmba ya ũthamaki ya Juda atĩrĩ: Ta thikĩrĩriai kiugo kĩa Ithe witũ.
12Inyuĩ a nyũmba ya Daudi, Ithe witũ ekuuga atĩrĩ: Tuagai ciira na kĩhooto o rũũciinĩ, mũteithũre arĩa matunyĩtwo indo kuuma guokoinĩ kwa ũrĩa ũramahinyĩrĩria, kana marakara makwa maakane ta mwaki, maakane hatarĩ mũndũ ũngĩmahoria, nĩ ũndũ wa ciĩko cianyu njũru. 13Ta rora, nĩngũgũũkĩrĩra, wee ũikaraga igũrũ rĩa gĩtuamba, wee ihiga rĩa werũ, ũguo nĩguo Ithe witũ ekuuga—wee uugaga atĩrĩ, ‘Nũũ ũngĩikũrũka atũũkĩrĩre? Nũũ ũngĩtoonya ciikaro ciitũ?’ a a v13 Jerusalemu rĩaikarĩte igũrũ rĩa kĩrĩma kĩraihu igũrũ rĩa ituamba iria ciarĩthiũrũrũkĩirie, na ũndũ ũcio wekagĩra andũ a rĩo mwĩhoko wa maheeni atĩ itũũra rĩu rĩtingĩatharĩkĩrwo. 14Nĩngakũherithia kũringana na ũrĩa ciĩko ciaku ciagĩrĩire, ũguo nĩguo Ithe witũ ekuuga. Nĩngaakia mwaki mũtitũinĩ warĩo, naguo nĩũgaacina indo ciothe iria irĩ hakuhĩ narĩo.”