Tebui Zedekia Mepishiba Langzü
Zedekia chubai, Babilon anema sayatenya ka ngua pela asoshi, osang abenertem yok. Langzüji aji tenyar lir — asenok Tebui pei yimti sasa anema raratsü. Nisungtem nükdang tetsüng ana ayua lir: kiset tsüngda nung asütsü, mesüra atua litsü. Chuba kidongi ochi shia o bendangtsü tetemsü.
21 1Zedekia chubai Malkia chir Pashhur aser putir Maaseia chir Zefania pa dangi yok aodang, asen Tebu nungi Yeremia dangi aruba o iba lir: 2“Yimlibilema onok asoshi asen Tebu dang mepishiangma, kechiaser Babilon chuba Nebui onok anema rara. Südi asen Tebui pa sayatenya ajak agi onok dang benshitsü, aser tsükchiri onok nungi atsünga aotsü.”
3Idangji Yeremiai parnok dang ashi, “Zedekia dang yamai shiang:
4Yamai Israel Tebui ashir: ‘Ajiang, nenoki jara kimaleni nenok anema anenba Babilon chuba aser Babilon nunger den raratsü asoshi abenba, nenok ket nung aliba nok o nütemji, ni meyipa iba yimti kilung nung senteptsütsü. 5Ni pei sasa tepen songtokba aser tashi tait teka agi, ain adoka, kanga mepelaba, aser tarasaba tulu agi, nenok den raratsü. 6Ni iba yimti nung alir, nisung aser shiruru ajakji tepsettsü; parnok wara tulu agi asütsü. 7Tesülen, ta asen Tebui ashir, ni Yihuda chuba Zedekia, pa tenzükertem, aser iba yimti nung aliba wara, nok, aser ayawara nungi benden nisungtem, parnok taküm bushiba parnok tsükchir Babilon chuba Nebu ket nung bendanga agütsütsü. Pai nok agi parnok tepsettsü; pa parnok dang maochitsü, mekümzüktsü, mesüra taochi mesayutsü.’
8Iba nübur dang asen Tebui ashiba shiang: ‘Ajiang, ni nenok madang taküm lenmang aser tasü lenmang yutsür. 9Shibai iba yimti nung aludir, pa nok, ayawara, aser wara agi asütsü; saka shibai nenok anema anenba Babilon nunger dangi jenoka odir, pa litettsü, aser pei takümji temakzükba oset ama abentsü. 10Ni iba yimti anema, tajung asoshi masü saka tamajung asoshi, kü tejak yuogo, ta asen Tebui ashir. Ibaji Babilon chuba ket nung bendanga agütsütsü, aser pai aji mi nung rongtsü.’
Dawid Kibong dang Tebu O
11Yihuda chuba kibong dang shiang: Asen Tebu O angang.
12Dawid kibong, asen Tebui ashir: ‘Anepdang shishia ochi shia o bendangang, rakzükba nisung dang kangshiker ket nungi kümzükang; aji oda nenok tamajung benshiba yagi, kü ain adokbaji mi ama jangrutsü, aser aji remseptsü shinga malitsü.’ 13Ajiang, ni ne anema lir, na lenten temalen aludakba, ali telemok lung na, ta asen Tebui ashir— na shiba ashir, ‘Shibai onok anema lutsü? Shibai onok alidak nung aitsü?’ a a v13 Yirusalem meketa lententem temalen aliba tenem tulu ka nung alisü; iba yagi pa nüburtemi, yimtiji shibai mesamatsü ta, tiyazü amang den liasü. 14Nenok inyakba yari ni nenok merenshitsü, ta asen Tebui ashir. Ni pa arem nung mi jangrudaktsütsü, aser aji pa meketa aliba ajak achitsü.”