ኤርሚያስ 21 FHB Father's Heart Bible™

21 ¹እቲ ንጉስ ሴዴቅያስ ንጳስሁር ወዲ መልክያን ንሶፎንያስ ወዲ መዓሴያ እቲ ኻህንን ናብኡ ምስ ለኣኸ፥ ካብ ኣቦና ናብ ኤርሚያስ ዝመፀ ቃል እዙይ እዩ፦ ²“ናቡከደነፆር ንጉስ ባቢሎን የጥቅዓና ኣሎ እሞ፥ በይዛኻ ንኣቦና ለምነልና። ምናልባሽ እቲ ፀላኢ ካባና ምእንቲ ኽለቅቕ፥ ኣቦና ከም ኵሉ እቲ ዝገበሮ ተኣምራት ይገብረልና ይኸውን።”

³ኤርሚያስ ድማ ከምዙይ ኢሉ መለሰሎም፦ “ንሴዴቅያስ ከምዙይ በልዎ፦

⁴ኣቦ እስራኤል ከምዙይ ይብል ኣሎ፦ ‘እንሆ፥ ነቲ ንጉስ ባቢሎን ምስቶም ኣብ ወፃኢ መንደቕ ዝኸበኩም ባቢሎናውያን እትዋግኡሉ፥ ኣብ ኢድኩም ዘሎ ኣፅዋር ውግእ ክመልሶ፥ ናብ ማእኸል እዛ ኸተማ እዚኣ ድማ ክእክብ እየ። ⁵ኣነ ባዕለይ ድማ ብዝርግሕቲ ኢድን ብሓያል ቅልፅምን፥ ብዂራን ብንዴትን ብዓብዪ ቝጥዓን ክዋግኣኩም እየ። ⁶ነቶም ኣብዛ ኸተማ እዚኣ ዝነብሩ፥ ሰብ ኮነ እንስሳ ክወቕዖም እየ፤ ብዓብዪ መዓት ድማ ክሞቱ እዮም። ⁷ድሕሪዙይ ድማ፥ ይብል ኣቦና፥ ንሴዴቅያስ ንጉስ ይሁዳን ንሓሻኽሩ ነቶም ኣብዛ ኸተማ እዚኣ ኻብ መዓትን ካብ ሰይፍን ካብ ጥሜትን ዝደሓኑ ህዝብን፥ ናብ ኢድ ናቡከደነፆር ንጉስ ባቢሎን፥ ናብ ኢድ እቶም ንህይወቶም ዝደልዩ ፀላእቶም ኣሕሊፈ ክህቦም እየ። ንሱ ኸዓ ብስሕለት ሰይፊ ክወቕዖም እዩ፤ ኣይርህርሆምን፥ ኣይናሕስየሎምን፥ ኣይምሕሮምን እዩ።’

⁸ነዝ ህዝቢ እዚ ድማ ኣቦና ከምዙይ ይብል ኢልካ ንገሮም፦ እንሆ፥ ኣነ መንገዲ ህይወትን መንገዲ ሞትን ኣብ ቅድሜኹም ኣንቢረ ኣለኹ። ⁹እቲ ኣብዛ ኸተማ እዚኣ ዝተርፍ ብሰይፍን ብጥሜት ብመዓትን ክመውት እዩ፤ እቲ ወፂኡ ናብቶም ዝኸብብዋ ዘለዉ ባቢሎናውያን ኢዱ ዝህብ ግና፥ ህይወቱ ኸም ዘመተ ረኺቡ ብህይወት ክነብር እዩ። ¹⁰ገፀይ ንኽፉእ እምበር ንፅቡቕ ዘይኮነ ኣብዛ ኸተማ እዚኣ ኣንቢረ ኣለኹ፤ ይብል ኣቦና። ናብ ኢድ ንጉስ ባቢሎን ክትወሃብ እያ፤ ንሱ ኸዓ ብሓዊ ከቃፅላ እዩ።

ቃል ኣቦ ናብ ቤት ዳዊት

¹¹ነቲ ቤተ መንግስቲ ይሁዳ ድማ ከምዙይ በሎም፦ ቃል ኣቦና ስምዑ።

¹²ኦ ቤት ዳዊት፥ ኣቦና ከምዙይ ይብል ኣሎ፦ ንጉሆ ንጉሆ ብቕንዕና ፍረዱ፤ ነቲ ዝተዘምተ ኸዓ ካብ ኢድ ገፋዒኡ ኣናግፍዎ፤ እንተዘይኮይኑ ብሰሪ ክፉእ ግብርኹም ቝጥዓይ ከም ሓዊ ይውላዕ፥ ዘጥፍእ ዘይብሉ ኸዓ ይነድድ። ¹³እንሆ፥ ኣብ ልዕሊ ለሰ እትነብሪ፥ ኣብ ጐልጐል ዘለኺ ኰዅሒ፥ ኣነ ኣባኺ እየ፤ ይብል ኣቦና፤ ንስኺ፥ ‘መን እዩ ናባና ዝወርድ? ናብ ማሕደርና ኸ መን እዩ ዝኣቱ?’ እትብሊ ኢኺ። ^a a v13 ኢየሩሳሌም ኣብ ልዕሊ እቲ ኸቢብዋ ዝነበረ ለሰታት፥ ኣብ ልዑል ጎቦ ተቐሚጣ ነበረት፤ እዙይ ድማ ነቶም ህዝባ እታ ኸተማ ዘይትስዐር ምዃና ናይ ሓሶት ምትእምማን ሃቦም። ¹⁴ከምቲ ግብርኹም ዝግብኦ ኽቐፅዐኩም እየ፥ ይብል ኣቦና። ኣብ ዱራ ድማ ሓዊ ከንድድ እየ፤ ነቲ ኣብ ከባቢኣ ዘሎ ዅሉ ኸዓ ክበልዕ እዩ።”