Tiberias Tuipui Paan Bi
Ngaa nam lang han se rwanna khatchale nam mak ngaake, atiyeda thei mak misa khat om chong bina ngaa raza khat somnga le thum namluga kalang kai lat rwe, khatle louthwan thaisaak ga be in daan ongnu mu rwe. Charut mei kateina kim bi Jisu na Peter khou thum ding Ating kriang inkubo diga ngaiye, basaak pi sa thang lang zao pi thangne, atiga Anung suiro diga indaoga rinne.
21 1Hei bing nung bi Jisu na Tiberias tuipui paan bi potroi rwan khou Baraanto pi mu thang lat ngaake; heiyana Maanna pi mu thangnu gaye. 2Simon Peter, Ka Ngaphinnu diga kounu Thomas, Galilee taram Cana lana Nathanael, Zebedee sa kapaisa rwan, khatle potroi katei pakhat kani le khatcha toga ong ngaake. 3Simon Peter na bani khou rinne, “Ei ngaa nam lang se nge.” Banina, “Ani le nang le diga selune,” diga rinne. Atiga banina thouluga li sung bi khut ong ngaake, atiyeda haba zing bi banina khatchale nam mak ngaake.
4Khwa baan swaknu kaan bi Jisu na tui paan bi han ong ngaake, atiyeda potroi rwanna Maan Jisu gaye dinu thei mak ngaake.
5Jisu na bani khou rinne, “Naosen rwan, nani khou ngaa ong kabo?” Banina Bakhou katakka, “Maak rwe,” diga rinne.
6Maanna bani khou rinne, “Kalang ga li om bakut cham bang la sato, atiga nanina ngaa doulune.” Atiga banina haga satnu kaan bi, ngaa taswang khak ong briakpina banina kalang kai lang lat ngam mak ngaake.
7Jisu na kriangnu potroi na Peter khou rinne, “Maan Pukraangba gaye!” Maan Pukraangba gaye diga ngaisunu kaan bi, Simon Peter na baom talathu pi pwan sinluga (balangbe maan chwan to lang haga lon ta ngaake) tuipui bi baraanto kazun sat rwe. 8Potroi katei rwan ga li bi hungluga, ngaa sipnu kalang ga kai hung rwe, balangbe bani tui paan bina raza yard khak zana namlaa lan ngaake. 9Bani tui paan hung tangnu kaan bi, banina mei kahai, haba balu bi ngaa, khatle uilu ong ongnu mu rwe.
10Jisu na bani khou rinne, “Atun nanina nam hungnu ngaa inza phun hungro.”
11Atiga Simon Peter li bi twang kaluga, ngaa kalian raza somnga saruk thum sipnu kalang ding tui paan la kai hung rwe; taswang khak ong peida, kalang ga re make.
12Jisu na bani khou rinne, “Hungluga, zingpha sa inno.” Potroi rwan lak pina pakhatchanale Bakhou, “Nang tubo?” diga ngai lang raang mak ngaake—balangbe Maan Pukraangba gaye dinu banina thei ngaake.
13Jisu na hungluga, uilu ga louluga bani khou pi rwe, khatle ngaa le hadanga pi rwe. 14Heiya Jisu thi bina ring thou tangnu nung bi potroi rwan khou Baraanto pi mu thangnu leng thumnu ngaake.
15Bani zingpha sa in taang bi, Jisu na Simon Peter khou rinne, “John sa kapaisa Simon, nangna heiba rwan hakna nasung bingza toga Ating kriang kabo?” Maanna katake, “Ouwe, Pukraangba, eina Nang baan amga kriangnu Nangna theiye.” Jisu na bakhou rinne, “Atangiya rwan sa lang kasem pi thangbiyo.”
16Leng ninu Jisu na rinne, “John sa kapaisa Simon, nangna nasung bingza toga Ating kriang kabo?” Maanna katake, “Ouwe, Pukraangba, eina Nang baan amga kriangnu Nangna theiye.” Jisu na rinne, “Azao rwan ding kot thouro.”
17Leng thumnu Jisu na bakhou rinne, “John sa kapaisa Simon, nangna Ating baan amga kriang kabo?” Jisu na leng thumnu toga, “Nangna Ating baan amga kriang kabo?” diga ngainu briakpina Peter sung pi riangre rwe, atiga maanna rinne, “Pukraangba, Nangna thing bingza theiye; eina Nang baan amga kriangnu Nangna theiye.” Jisu na bakhou rinne, “Azao rwan sa lang kasem pi thangbiyo.”
18“Batak sekka Eina nang khou rinnuwe, nang katang ong balei, nang baraanto pwan sinluga nang se nwamnu riak khou se rwe; atiyeda nang kaningmi ong tabe, nang nakut bing balaan swaklune, atiga katei khatna nang ding pwan sin thangluga nang se nwam maknu riak khou kalwang thanglune.” 19Jisu na heiya rinnu langba, Peter impei thit thiluga ani Pa ding lwat pi liannu dingbo dinu pi thei lang naye. Haba nung bi Maanna bakhou rinne, “Anung suiyo.”
20Peter na koi impuluga Jisu na kriangnu potroi anung suinu mu rwe—maan ga sa in taang bi Jisu pam bi hainanuluga, “Pukraangba, Nang pi swak lang tonu maan ga tubo?” diga ngai ngaaknu maan ga ngaake. 21Peter na maan ding munu kaan bi, Jisu khou rinne, “Pukraangba, heiba manpa ga impei ding gabo?”
22Jisu na bakhou rinne, “Ei hung mak basaan maan ding ongta lang Eina nwamme dabe, haga nang lang pa-aam ding gabo? Nang gana Anung suiyo.” 23Atibriakpina heiba potroi ga thilaye dinu heiba chong ga unao rwan lak pi kazan swak rwe. Atiyeda Jisu na maan thilaye diga rin make, atiyeda, “Ei hung mak basaan maan ding ongta lang Eina nwamme dabe, haga nang lang pa-aam ding gabo?” diga rinnuwe.
24Heiba thing bing ding sake pinu khatle haga hiaknu potroi ga heiya gaye; maan om sake ga bataknu gaye dinu anina theiye. 25Jisu na alaang thing katei taswang khak le to rwe. Haga pakhat pakhatcha toga hiak thang dabe, hiak thangnu chongdip bing ga talei ram baraanto bina le dou lang ngamlaye diga eina ningme. a a v25 Heiya Jisu na imphaang to lian rwe dinu pi thei lang ningtingga rinnu chong gaye — batak takka tenu make.