Ataraa ga Chunto Lo Sianu lang Gon Rwe
Atun, bani om pa rwan ding baom zao sui bazei zanu uilu nung le batan lang maanna za mak tingnu misa rwanna, maan ding bani om laa toluga, Bamai bi bachinta nge. Zing bi baru bing ga rou nge. Maanna rinne, ani Pa na maan ding talei nei sung bi bazwan thangluga, baom kakounu ding khwa seiga phaangga katak nge.
30 1Atiyeda atun ei hakna naosennu bing na ating banui nge—bani om pa rwan ding azao sui bazei zanu uilu nung le batan lang ei za mak tingnu mi nun gaye. 2Bani om kut thuknu ga ating pa-aam kasanu tongnu ambo? Bani om thuknu ga braan ta rwe. 3Lungsianu khatle chaamnu bina pum thit tang damnu, banina to braannu khatle lung taak om zingnu bi tui maaknu talei ding ei pat rwe. 4Banina ram lou lak pi sum lou ding kha rwe khatle broom thing om bakung ga bani om bu gaye. a a v4 Sum lou khatle broom thing ga ramhaang bi phunnu lounu gaye—imphum tanu lungsianu mi nun lang alamsek om bu gaye. 5Bani ding mi nun lak pina laak thang rwe; barusanu ding danga mi nunna bani nung au rwe. 6Bani ding thit tangnu tuikhun bi, talei khun bi khatle lung pui bing bi ring ding ngaake. 7Ram lou lak pi banina au rwe; kaling lou talei la banina khang karung ong ngaake. 8Sensaak, meng maaknu mikin ga, bani ding talei ram bina laak thang rwe.
9“Atun ei bani om kiam laa tang rwe; ei bani lang banuinu tang rwe. 10Banina ating batanne khatle ating lak pina khwa seiga ong nge; bani zong makka Amik bi bachin thang nge. 11Rikrwang na Atholi rui sut sat thangluga ating bangiam ta thang briakpina, Ameithaan bi banina bani om kalan pum brum ga lou sat rwe. 12Ainchang pek la rabbi nunna han thou nge; Aket ding banina sut laak thangluga ating to braan lang bani om rampon ding cha thou nge. 13Alampui ding banina re basiat nge; ating riangrenu bina banina alaang tong nge khatle bani ding thin thang dingnu pakhatcha le maake. 14Lianga lat ongnu riak pi danga banina hung nge; raang kabet lai lak pi banina khang gana hung thou nge. 15Ating lang kachinu badannu bing han hung nge; Alwat ga thiraangna danga laak thang rwe, khatle ating taswan ga tambu danga se thou drwe.
16“Atun Aring ga asung bi lwangta drwe; riangrenu aniya bingna ating paan drwe. 17Chwan to Aru bing ga sungna chou nge khatle ating ei patnu naalai bing ga chat la mako. 18Thuknu lianna Apwan ga bachanu tang rwe; Atalathu bakhwan danga ating karung bang nge. 19Ani Pa na ating tui kalum bi bazwan thang rwe, khatle ei tambut khatle kaphut danga tang rwe.
20“Nakhou kan lang eina kou nge atiyeda Nangna ating katak mako; ei han thou nge atiyeda Nangna ating han ong nge. 21Nang ating lang sung natnu tang rwe; Nakut thuknu bina Nangna ating katwak nge. 22Nangna ating thiraang la basaang ka thangga ating pi twang thang nge; thiraang thirwei baraam lak pi Nangna ating bazwan koi nge. 23Balangbe Nangna ating thinu la basuk thanglune, ringnu pum brum lang chong to damnu in khou dinu eina theiye.
24“Atiyeda braannu lak pina pakhatna bakut balaan swak mak tingbo, mak tabe baom liamnu bi kan lang kou mak tingbo? 25Riangrenu aniya amnu mi lang eina chap mak ngaakpo? Baatnu mi nun lang Akatha riangre mak ngaakpo? 26Atiyeda eina kasanu bachun ongnu kaan bi sianu hung rwe; khwa ding ngaak ongnu kaan bi zingnu hung rwe. 27Akarin bing ga sou ong nge khatle chat la mako; riangrenu aniya bingna ating maitwang nge. 28Ei kaling kaling tangga poi se nge atiyeda lumik briakpina make; khang karungnu lak pi ei han thouluga kan lang kou nge. 29Ei ramui rwan om unao tang rwe, khatle ostrich rwan om bakot ong tang rwe. 30Apum ga bum drwe khatle akhouna re swak rwe, atiga aru bing ga nat kanuna chok nge. 31Ataraa ga chunto lo sianu bi pi gon rwe, khatle atamrwang ga chapnu baraam bi pi gon rwe.”