Kilumbu kya Tsambwadi
Musamu wanene wa muhangu wisi fitakana tee ni kilanga kimosi. Tata wetu wákuna kyawu, wátula mutu muna mu kusala amana mu kukengila kyawu, wámuheka kiphwanza yi nkandiku wamosi, buna wuzimbula ni kukala kwandi yandi mosi kwambi, amana wátunga mukhetu tuka ku luseki lwandi-meni.
Tata wetu kisi zonza mu mavese 16–18
2 1Buna zilu yi tsi byálungila, ha kimosi yi bima byosu bina byákala mwena byawu. 2Muna kilumbu kya tsambwadi, Tata wetu wámanisa muhangu wandi, amana wálembwa muna kilumbu kya tsambwadi ku bima byosu bina káhanga. 3Amana Tata wetu wásakumuna kilumbu kya tsambwadi, wákikitula kyatoma, mukuma muna kyawu wálembwa ku muhangu wosu wa phangamu wuna káhanga.
Atamu yi Evwa
4Mama menina mambu ma zilu yi tsi muna tangwa byáhangama, muna tangwa Tata wetu káhanga tsi yi zilu. 5Kweku kedi miti mya kilanga ha tsi, amana mwangu wa kilanga kedi wámenaku, mukuma Tata wetu kánokisaku kedi mvula ha tsi, amana kweku mutu wa kusala mafu, 6Kaasi mabulu ma mamba mátuka mu mafu, amana mátyakila ha thandu ya mafu moosu. 7Amana Tata wetu wáhanga mutu mu fusyangeni dya mafu, amana wáfula mu mazunu mandi mwela wa luzingu, buna mutu wákituka mutu wa luzingu. a a v7 «Mutu wa luzingu» dibati songila bunene bwa kithwadi bwa batu, bana báhangamina mu kuzinga ku thwala ya Tata wetu. 8Amana Tata wetu wákuna kilanga ku Edeni, kuna Kola, amana wátula kuna mutu wuna káhanga. 9Mu mafu, Tata wetu wákodisa miti wosu wuna wenina kasemi mu kutala amana wa bukheti mu kudya; hana kati dya kilanga, mwákala miti wa luzingu, amana miti wa kuzaya bukheti yi mbi. 10Nzadi yimosi yátuka ku Edeni mu kutyakila kilanga; tuka kuna, yadíkabisa, yákituka banzadi baya. 11Yina yatheti, khumbu yandi Phishoni; yisi hita mu tsi yosu ya Havila, kuna wolu wisi monika. b b v11 Havila yákala kinzunga kyazayakana kikuma kya wolu wandi wa kitoku; amana homa handi hazayakanaku hika. 12Wolu wa tsi yina wenina wa bukheti; mananasi ma nsudi yimbote yi tadi dya oniki byákala phi kuna. c c v12 Bedeliyo yákala mananasi ma nsudi yimbote, mana mákala yi thalu yimbote hanga tadi dya thalu, muna nza ya nganga. 13Khumbu ya nzadi yazodi yenina Gihoni; yisi landanda mu tsi yosu ya Kusi. d d v13 Kusi yákala tsi yimosi kuna banda kwa Ngiphiti, muna kinzunga kina, ndambu ya tangwa, bisi tela Nubiya ya nganga. 14Khumbu ya nzadi yatatu yenina Tigili, yisi tika ku Kola kwa Asiliya. Nzadi yaya yenina Efalati. 15Tata wetu wábonga mutu amana wámutula mu kilanga kya Edeni, ndangu kasala kyawu amana kakeba kyawu.
16Amana Tata wetu wáhana mutu muswa: «Wulenda kudya mu miti wosu wena mu kilanga; 17kaasi wudyaku mu miti wa nzayilu wa bukheti yi mbi, mukuma, kyedika, mu kilumbu kina wudya mu wawu, wufwá.»
18Amana Tata wetu wázimbula: «Ka kyambote ku ni mutu kakala yandi mosi. Yisala muhombi wuna kafwánana yi yandi.»
19Mu mafu, Tata wetu wáhanga bambisi boosu ba kilanga yi banuni boosu ba ku zilu, amana wábanata kwena mutu hanga kazaya khi khumbu kátela. Khumbu yina mutu kátela kosu kima kya luzingu, yina yákala khumbu yandi. 20Mutu wápheka makhumbu kwena bibulu byosu, banuni ba ku zilu yi bambisi boosu ba mu tseki, kaasi kwena Atamu, muhombi wuna kafwánana yi yandi kábakanaku. 21Buna Tata wetu wápheka mutu kilu kya ndindi, amana bwosu kakala nimba, wábonga lumosi lwa mahati mandi amana wázibika musuni ha homa hana. 22Amana Tata wetu wátunga mukhetu mu luhati luna wábonga mu mutu, amana wámunata kwena mutu. 23Mutu wázimbula: «Bwabu kaka! Yayi yenina mufufwa wa mifufwa myama yi musuni wa musuni wama; yandi katelwa “mukhetu”, mukuma yábongwa mu yakala.» 24Yi hakana ni, yakala kasísa tata wandi ha kimosi yi ngudi wandi, amana kakhundakana kwena mukhetu wandi, buna bawu bodi bakítuka lutu lumosi. 25Mutu yi mukhetu wandi bawu bodi bákala khonga, amana báyukaku tsoni.
