እታ ሻውዐይቲ መዓልቲ

እቲ ገፊሕ ዛንታ ፍጥረት ናብ ሓንቲ ገነት ይፀብብ። ኣቦና ይተኽላ፥ ነቲ ሰብ ድማ ኽሰርሓን ክሕልዋን ኣብኣ የቐምጦ፥ ብሓደ ኽልከላ ጥራሕ ነፃነት ይህቦ፥ ደሓር ከዓ በይኑ ምዃኑ ፅቡቕ ከም ዘይኮነ ተዛሪቡ፥ ካብ ጎድኑ ሰበይቲ ይሰርሕ።

ምዕራፍ 2።

ከምዙይ ኢሉ ድማ ሰማይን ምድርን ምስ ኵሉ ሰራዊቶም ተፈፀሙ። ኣቦና በታ ሻውዐይቲ መዓልቲ ዝሰርሖ ዕዮኡ ፈፂሙ ነበረ፤ በታ ሻውዐይቲ መዓልቲ ኸዓ ካብ ኵሉ ዝገበሮ ዕዮ ኣዕረፈ። ኣቦና ድማ ነታ ሻውዐይቲ መዓልቲ ባረኻ፥ ቀደሳውን፤ በታ መዓልቲ እቲኣ ኻብ ኵሉ ዝገበሮ ዕዮ ፍጥረት ኣዕሪፉ ስለ ዝነበረ።

ኣዳምን ሄዋንን

እዝ ሰማይን ምድርን ምስ ዝተፈጠሩ ዝኾነ ዛንታኦም እዙይ እዩ፤ ኣቦና ምድርን ሰማያትን ዝገበረሉ እዋን። ኣብ ምድሪ ገና ዝኾነ ቈፅሊ መሮር ኣይነበረን፥ ዝኾነ ብቝሊ መሮርውን ገና ኣይበቘለን ነበረ፤ ኣቦና ኣብ ምድሪ ዝናም ኣየዝነመን ነበረ እሞ፥ ንምድሪ ዝሰርሕ ሰብውን ኣይነበረን፤ ካብ ምድሪ ግና ዓይኒ ማይ ወፂኡ፥ ንብዘሎ ገፅ እታ ምድሪ ኣስተዮ። ሽዑ ኣቦና ንሰብ ካብ ሓመድ መሬት ፈጠሮ፥ ኣብ ኣፍንጫኡ ድማ እስትንፋስ ህይወት ኣፍሰሰ፤ እቲ ሰብውን ህያው ነፍሲ ኾነ። ^a ሽዑ ኣቦና ኣብ ኤደን ብወገን ምብራቕ ገነት ተኸለ፤ ነቲ ዝፈጠሮ ሰብ ድማ ኣብኡ ኣቐመጦ። ኣቦና ድማ ንምርኣይ ፅቡቕን ንብልዒ ፅቡቕን ዝኾነ ዅሉ ኦም ካብ ምድሪ ኣብቈለ፤ ኣብ ማእኸል ገነት ድማ ኦም ህይወትን ኦም ፍልጠት ፅቡቕን ክፉእን ነበረ። ካብ ኤደን ድማ ንገነት ዘስቲ ሩባ ይውሕዝ ነበረ፤ ካብኡ ተመቒሉ ድማ ኣርባዕተ ሩባ ኾነ። ስም እቲ ቐዳማይ ፊሶን እዩ፤ ንሱ ንብዘላ ምድሪ ሓዊላ፥ ወርቂ ዝርከበላ፥ ይኸብባ። ^b ወርቂ እታ ምድሪ እቲኣ ፅቡቕ እዩ፤ ጥዑም ሽታ ዘለዎ እንዳዲዕን እምኒ ኦኒክስን ድማ ኣብኡ ኣለዉ። ^c ስም እቲ ኻልኣይ ሩባ ድማ ግዮን እዩ፤ ንሱ ንብዘላ ምድሪ ኵሽ ይኸብባ። ^d ስም እቲ ሳልሳይ ሩባ ድማ ጤግሮስ እዩ፤ ብወገን ምብራቕ ኣሶር ይውሕዝ። እቲ ራብዓይ ሩባ ኸዓ ኤፍራጥስ እዩ። ኣቦና ድማ ንሰብ ወሲዱ፥ ነታ ገነት ክሰርሓን ክሕልዋን ኣብ ገነት ኤደን ኣቐመጦ።

ኣቦና ድማ ንሰብ ከምዙይ ኢሉ ኣዘዞ፦ “ካብ ኵሉ ኦም ገነት ኽትበልዕ ትኽእል ኢኻ፤ ካብ ኦም ፍልጠት ፅቡቕን ክፉእን ግና ኣይትብላዕ፤ ካብኣ ብእትበልዓላ መዓልቲ ብርግፅ ክትመውት ኢኻ እሞ።”

ሽዑ ኣቦና ኸምዙይ በለ፦ “እቲ ሰብ በይኑ ክኸውን ፅቡቕ ኣይኮነን። ንእኡ ዝበቅዕ ሓጋዚ ክገብረሉ እየ።”

ኣቦና ድማ ኵሉ እንስሳ መሮርን ኵሉ ኣዕዋፍ ሰማይን ካብ ምድሪ ገበረ፤ እቲ ሰብ እንታይ ከም ዝሰምዮ ኽርኢ ኸዓ ናብኡ ኣምፅኦ። እቲ ሰብ ድማ ንነፍሲ ወከፍ ህያው ፍጡር ብዝሰመዮ ስም፥ ስሙ እቲ ኾነ። እቲ ሰብ ድማ ንዅሉ እንስሳን ንኣዕዋፍ ሰማይን ንዅሉ ኣራዊት መሮርን ሰመዮም፤ ንኣዳም ግና ንእኡ ዝበቅዕ ሓጋዚ ኣይተረኽበን። ስለዙይ ኣቦና ነቲ ሰብ ዓሚቝ ድቃስ ኣደቀሶ፤ እናደቀሰ ኸሎ ድማ ካብ መሳንቱ ሓደ ወሲዱ፥ ኣብ ክንድኡ ስጋ ዓፀዎ። ኣቦና ድማ ነታ ኻብ ሰብ ዝወሰዳ መሳንቲ ሰበይቲ ገይሩ ሰርሓ፤ ናብቲ ሰብ ድማ ኣምፅኣ። እቲ ሰብ ድማ “እንሆ ሕዚ! እዚኣ ዓፅሚ ኣዕፅምተይ፥ ስጋ ድማ ስጋይ እያ፤ ካብ ሰብኣይ ስለ ዝተወሰደት፥ ‘ሰበይቲ’ ክትብሃል እያ” በለ። ስለዙይ ሰብኣይ ንኣቦኡን ንኣዲኡን ሓዲጉ ምስ ሰበይቱ ይጠብቕ፤ ክልቲኦም ድማ ሓደ ስጋ ይኾኑ። እቲ ሰብን ሰበይቱን ክልቲኦም ዕሩቓን ነበሩ፤ ኣይሓፈሩን ከዓ።