ነህምያ 5 FHB Father's Heart Bible™

5 ¹ካብ እቶም ህዝብን ኣንስቶምን ድማ ኣብ ልዕሊ ኣሕዋቶም ኣይሁድ ዓብዪ ኣውያት ተልዓለ። ²ገሊኣቶም ከዓ “ንሕናን ኣወዳትናን ኣጓላትናን ብዙሓት ኢና፤ እንበልዖ እኽሊ ኣምፂእና ንንበር” በሉ። ³ካልኦት ድማ “ኣብዝ ጥሜት እዙይ እኽሊ ምእንቲ ኽንረክብ፥ ገራሁናን ኣታኽልቲ ወይንናን ኣባይትናን ኣትሒዝና ኣለና” በሉ። ⁴ካልኦት ከዓ “ንቐረፅ ንጉስ ኣብ ገራሁናን ኣታኽልቲ ወይንናን ገንዘብ ተለቂሕና ኣለና። ⁵ሕዚ ስጋና ኸም ስጋ ኣሕዋትና እዩ፥ ደቅናውን ከም ደቆም እዮም፤ ኮይኑ ግና ንኣወዳትናን ኣጓላትናን ናብ ባርነት ነገድዶም ኣለና። ገሊኣተን ኣጓላትና ድሮ ባሮት ኮይነን ኣለዋ፤ ኣብ ኢድናውን ሓይሊ የለን፤ ገራሁናን ኣታኽልቲ ወይንናን ናይ ካልኦት ኮይኑ ኣሎ።”

⁶ኣነ ኸዓ ኣውያቶምን እዝ ቃላት እዙይን ምስ ሰማዕኹ፥ የመና ተቘጣዕኹ። ⁷ኣብ ልበይ ድማ ሓሰብኩ፥ ነቶም ክቡራትን ሹመኛታትን ከዓ “ነፍሲ ወከፍኩም ነሕዋትኩም ሃረፃ ትፅዕኑ ኣለኹም!” ኢለ ገጠምክዎም። ኣብ ልዕሊኦም ድማ ዓብዪ ጉባኤ ፀዋዕኹ። ⁸ኣነ ድማ “ንሕና ነቶም ናብ ካልኦት ኣህዛብ ተሸይጦም ዝነበሩ ኣሕዋትና ኣይሁድ፥ ዝከኣለና ገይርና ተመሊስና ዓዲግናዮም፤ ሕዚ ከዓ ንስኻትኩም ነሕዋትኩም ትሸጥዎም ኣለኹም፤ ንሳቶም ድማ ናባና ተመሊሶም ክሽየጡ እዮም!” በልክዎም። ንሳቶም ከዓ ዝብልዎ ስኢኖም ስቕ በሉ። ⁹ኣነ ድማ “እዝ ትገብርዎ ዘለኹም ነገር ፅቡቕ ኣይኮነን። ካብ ፀርፊ እቶም ፀላእትና ኣህዛብ ንምህዳም፥ ብፍርሓት ኣቦና ክትመላለሱ ኣይግብኣኩምንዶ? ¹⁰ኣነን ኣሕዋተይን ኣገልገልተይን ድማ ገንዘብን እኽልን ነለቅሖም ኣለና። እዝ ሃረፃ እዙይ ንሕደጎ። ¹¹ገራሁኦምን ኣታኽልቲ ወይኖምን ኣዋልዖምን ኣባይቶምን፥ ከምኡውን እቲ ኣብ ገንዘብን እኽልን ሓድሽ ወይንን ዘይትን ዝፀዓንኩምሎም ሃረፃ፥ ሎሚ መልሱሎም።”

¹²ንሳቶም ከዓ “ክንመልሰሎም ኢና፤ ገለ እኳ ኻብኣቶም ኣይክንደልን ኢና፤ ከምቲ ዝበልካዮ ኽንገብር ኢና” ኢሎም መለሱ። ኣነ ድማ ንኻህናት ፀዊዐ፥ ነቶም ክቡራት ከምዝ ቃል እዙይ ክፍፅሙ ኣምሓልክዎም።

¹³ኣነ ኸዓ ሕፅኒ ክዳነይ ነገፍኩ እሞ “ነዝ ቃል እዙይ ዘይፍፅም ዅሉ ሰብ፥ ኣቦና ኸምዙይ ካብ ቤቱን ጥሪቱን ይንገፎ፤ ከምዙይ ተነጊፉ ኸዓ ጥራሑ ይተረፍ” በልኩ። ኵሉ እቲ ጉባኤ ድማ “ኣሜን” በለ፤ ንኣቦናውን ኣመስገነ። እቲ ህዝቢ ኸዓ ኸምቲ ዝተመባፅዕዎ ገበረ።

¹⁴ካብታ ኣብ ምድሪ ይሁዳ ሹም ኮይነ ዝተሸየምኩላ መዓልቲ ጀሚረ፥ ካብ መበል ዕስራ ዓመቱ ንንጉስ ኣርጤክስስ ክሳዕ መበል ሰላሳን ክልተን ዓመቱ፥ ዓሰርተ ኽልተ ዓመት፥ ኣነ ኾነ ኣሕዋተይ ምግቢ እቲ ሹም ኣይበላዕናን። ¹⁵እቶም ቕድመይ ዝነበሩ ናይ ቀደም ሹማምቲ ግና ንህዝቢ ኸበድዎም፤ ብዘይ ኣስታት ፍርቂ ኪሎ ብሩር፥ ምግብን ወይንን ካብኣቶም ይወስዱ ነበሩ። ኣገልገልቶም እኳ ኣብ ልዕሊ እቲ ህዝቢ ይገዝኡ ነበሩ። ኣነ ግና ንኣቦና ስለ ዝፈራህኹ፥ ከምኡ ኣይገበርኩን። ¹⁶ኣነ ኸዓ ኣብ ስራሕ እዝ መንደቕ እዙይ ፀናዕኹ፤ ምድሪ ኣይገዛእናን። ኵሎም ኣገልገልተይ ድማ ነቲ ስራሕ ኣብኡ ተኣከቡ። ¹⁷ብዘይ እቶም ካብቶም ኣብ ዙርያና ዘለዉ ኣህዛብ ዝመፁ፥ ሚእትን ሓምሳን ኣይሁድን ሹመኛታትን ድማ ኣብ መኣደይ ይበልዑ ነበሩ። ¹⁸ንነፍሲ ወከፍ መዓልቲ ዝዳሎ ድማ፥ ሓደ ብዕራይ፥ ሽዱሽተ ሕሩያት ኣባጊዕን ኣዕዋፍን ነበረ፤ ኵሉ ድማ ብወፃኢየይ ይዳሎ ነበረ፤ ኣብ ነፍሲ ወከፍ ዓሰርተ መዓልቲ ኸዓ፥ ብዙሕ በብዓይነቱ ወይኒ ይዳሎ ነበረ። ከምኡ እኳ እንተኾነ፥ እቲ ዕዮ ኣብ ልዕሊ እዝ ህዝቢ እዙይ ስለ ዝኸበደ፥ ምግቢ እቲ ሹም ኣይሓተትኩን። ¹⁹ኦ ኣቦይ፥ ነዝ ህዝቢ እዙይ ዝገበርክዎ ዅሉ ምእንቲ፥ ንፅቡቕ ዘክረኒ።