ነህምያ 5

5 ¹ከሕዝቡና ከሚስቶቻቸው በኩል በወንድሞቻቸው በአይሁድ ላይ ታላቅ ጩኸት ተነሣ። ²አንዳንዶቹ፣ “እኛ፣ ወንዶችና ሴቶች ልጆቻችን ብዙ ነን፤ የምንበላውን እኽል አግኝተን እንኑር” አሉ። ³ሌሎች፣ “በራብ ጊዜ እኽል ለማግኘት እርሻዎቻችንን፣ የወይን ተክሎቻችንንና ቤቶቻችንን እናስይዛለን” አሉ። ⁴ሌሎች ደግሞ፣ “ለእርሻዎቻችንና ለወይን ተክሎቻችን የንጉሡን ግብር ለመክፈል ገንዘብ ተበድረናል። ⁵ሥጋችን እንደ ወንድሞቻችን ሥጋ ነው፤ ልጆቻችንም እንደ ልጆቻቸው ናቸው፤ ሆኖም ወንዶችና ሴቶች ልጆቻችንን ለባርነት እናስገድዳለን። አንዳንዶቹ ሴቶች ልጆቻችን አስቀድመው ባሪያ ሆነዋል፤ እኛም አቅም የለንም፤ እርሻዎቻችንና የወይን ተክሎቻችን የሌሎች ሆነዋልና።”

⁶ጩኸታቸውንና እነዚህን ቃሎች በሰማሁ ጊዜ እጅግ ተቈጣሁ። ⁷አሰብሁበት፤ ከዚያም መኳንንቱንና ሹማምንቱን፣ “እያንዳንዳችሁ ለገዛ ወንድሞቻችሁ በምታበድሩት ላይ ወለድ ትጭናላችሁ!” ብዬ ተቃወምኋቸው። በእነርሱም ላይ ታላቅ ጉባኤ ጠራሁ። ⁸እንዲህም አልኋቸው፤ “ለሌሎች አሕዛብ የተሸጡትን የአይሁድ ወንድሞቻችንን መልሰን ለመግዛት በቻልነው ሁሉ ጥረናል። እናንተ ግን የገዛ ወንድሞቻችሁን ትሸጣላችሁ፤ እነርሱም መልሰው ለእኛ ይሸጣሉ!” ዝም አሉ፤ የሚሉትም አጡ። ⁹እኔም እንዲህ አልሁ፤ “የምታደርጉት መልካም አይደለም። የጠላቶቻችን የሆኑ አሕዛብ እንዳያፌዙብን በአባታችን ፍርሃት ልትመላለሱ አይገባችሁምን? ¹⁰እኔም ሆንሁ ወንድሞቼና አገልጋዮቼ ገንዘብና እኽል እናበድራቸዋለን። ይህን ወለድ እንተው። ¹¹ዛሬውኑ እርሻዎቻቸውን፣ የወይን ተክሎቻቸውን፣ የወይራ ቦታዎቻቸውንና ቤቶቻቸውን፣ እንዲሁም በገንዘብ፣ በእኽል፣ በአዲስ የወይን ጠጅና በዘይት ላይ ያስከፈላችኋቸውን ወለድ መልሱላቸው።”

¹²እነርሱም፣ “እንመልሳለን፤ ከዚህም በኋላ ከእነርሱ ምንም አንጠይቅም። እንዳልኸውም እናደርጋለን” ብለው መለሱ። ካህናቱንም ጠርቼ መኳንንቱ ይህን ቃል እንዲጠብቁ አማልኋቸው።

¹³ደግሞም የልብሴን እጥፋት አራግፌ፣ “ይህን ቃል የማይጠብቅ ሰው ሁሉ አባታችን እንደዚሁ ከቤቱና ከንብረቱ ያራግፈው፤ ተራግፎም ባዶውን ይቅር” አልሁ። ጉባኤውም ሁሉ፣ “አሜን” አለ፤ አባታችንንም አመሰገኑ። ሕዝቡም እንደ ተስፋ ቃሉ አደረጉ።

¹⁴በይሁዳ ላይ ገዥ ሆኜ ከተሾምሁበት ቀን ጀምሮ፣ ከንጉሡ ከአርጤክስስ ከሃያኛው ዓመት አንሥቶ እስከ ሠላሳ ሁለተኛው ዓመት ድረስ፣ ዐሥራ ሁለት ዓመት፣ እኔም ሆንሁ ወንድሞቼ ለገዥ የተመደበውን ቀለብ አልበላንም። ¹⁵ከእኔ በፊት የነበሩት የቀድሞ ገዥዎች ግን ሕዝቡን አከበዱበት፤ ከምግብና ከወይን ጠጅ ሌላ አንድ ፓውንድ ያህል ብር ይወስዱባቸው ነበር። አገልጋዮቻቸውም እንኳ በሕዝቡ ላይ ይገዙ ነበር። እኔ ግን አባታችንን ስለ ፈራሁ እንዲህ አላደረግሁም። ¹⁶እኔም በዚህ ቅጥር ሥራ ጸናሁ፤ መሬትም አልገዛንም። አገልጋዮቼም ሁሉ ለሥራው በዚያ ተሰበሰቡ። ¹⁷ከአካባቢው አሕዛብ ከመጡት ሌላ መቶ አምሳ አይሁድና ሹማምንት ደግሞ በማዕዴ ይበሉ ነበር። ¹⁸በየቀኑ የሚዘጋጀው ቀለብ፦ አንድ በሬ፣ ስድስት የተመረጡ በጎችና ዶሮዎች ነበሩ፤ ሁሉም በራሴ ወጪ ይዘጋጅ ነበር፤ በየዐሥሩ ቀንም ልዩ ልዩ የወይን ጠጅ በብዛት ይቀርብ ነበር። ከዚህ ሁሉ ጋራ ግን ሥራው በዚህ ሕዝብ ላይ እጅግ ከብዶ ስለ ነበር ለገዥ የተመደበውን ቀለብ አልጠየቅሁም። ¹⁹አባቴ ሆይ፣ ለዚህ ሕዝብ ያደረግሁትን ሁሉ በማሰብ መልካሙን አድርግልኝ።