Nehemiahei shieikoeko kibü haoeibü jaisina shuong khümenbü
Ho jiha mautibü kho khonga ki: mühsinou hoba Choba khüm kho mütshuongei haoeneibü sek semlüh thepetla hoba haoeneibü shousi shuong aaola lekei, khünei Jihudabü yaangenbü shuongei haoeneibü jaisina shanga phopnam hikei. Nehemiaeibü ange, hoba seneibü Bou khinbü kho, haoen shemngaitikei, hoba haoei governor shaubü kho po anthüknyi akukei.
5 1Hobaje mütshuong hoba haoeneibü yaksi shuongei haoeneibü jaisina Jihudabü khulimbo yaangbü ngühyobü longkei. 2Atei laukei, “Künei, küneibü shousi hoba nouyangshousi shuong juong ki; shaula hoba langla shanga künei youshou louko.” 3Ateije laukei, “Künei mühsinou chaloua youshou loula shanga küneibü sek, semlüh bamang hoba chem shuong thepetan ki.” 4Ateije laukei, “Küneibü sek hoba semlüh thüka Choba khüm kula shanga künei nam lepkei. 5Künei küneibü jaisina phe ki, hoba küneibü shousi shuong haoeneibü shousi tegü ki; khei yingsikei künei küneibü shousi hoba nouyangshousi shuong aaola lekei. Küneibü nouyangshou atei toukei aaola letikei, hoba künei hau aki; küneibü sek hoba semlüh atei müt shuongeibü ki.”
6Ngei haoeneibü ngühyobü hoba habü ngüh shuong ditjinei, ngo aeibou khauangkei. 7Ngei ho maanga thounoukei, kheijinei yaangenbü shuong hoba leiyeibü shuong to thükto loukei, “Kan mütpem weko kaibü jaisina shanga phopnam hida!” Khoei ngei haoen khulimbo yaangbü kaman che ngakei. 8Ngei haoen to laukei, “Atei phang shuong to yaakkubü küneibü jaisina Jihudabü angngaila künei souko kümbei. Lausikei touje kanei kaneibü jaisina yaakbü, hoba haoen künto jekan ngaitilabü shanga!” Hobaje haoen semele kikei, laula ai aki. 9Kheijinei ngei laukei, “Kan kümbü ho tükde aying. Seneibü dangbou phang shuongeibü nyikubü ka püetla shanga, kanei seneibü Bou to souhatko kuilabü aying lo? 10Ngei kü jaisina, kü khangenbü shuong hoba ngokei haoen to nam hoba youshou lotkuda. Habü phopnam senei dankhümkho. 11Tat haoeneibü sek, semlüh bamang, oliv bamang hoba chem shuong ngaitikushi; hoba nam, youshou, ih haanbü hoba onang shanga kanei haoen ka hibü phopnam khokei ngaitikushi.”
12Haoenei jongaiko laukei, “Künei ngaitikulabü hoba haoen ka ai amorea hilabü. Nyi laubü tegü künei kümlabü.” Kheijinei ngei ungshedbou shuong ngaan, habü thekubü kho jungeila shanga yaangenbü shuong to theyolanyotikei.
13Ngei kü neisimei nopshang kho shaknyinan laukei, “Habü thekubü kho ajungeibü müt pendou to seneibü Bouei haoeibü chem hoba nyaksinam ka khei tegü shaknyinan ikkong ngaitishima.” Kaman pendouei, “Amen,” laukei hoba seneibü Bou nyen sangkei. Hoba mütshuongei thekubü tegü kümbei.
14Jihuda kaonyeka ngo governor yeila pienbü chalou ka, Choba Artaxerxes po saoche boubüa ka haoeibü po khujinto nyiboubü sühko, po anthüknyi, ngo yingsikei kü jaisina shuongei governor shausiyung ashaukei. 15Lausikei ngo thedangto kibü shangiedbü governor shuongei mütshuong to onat yeikei, haoen ka shausiyung hoba ih louan, kho to limbo hon sekel saolei bang lekei. Haoeneibü khangenbü shuongeikei mütshuong thüka songdakkei. Lausikei ngei seneibü Bou to hatsije, khei aküm. 16Toukei ngei ho kümthang kümsileia khümbo kukei; künei kaonyek aikei ajek. Kü khangenbü shuong pendouei kümsilei shanga khünei yoshaikei. 17Toukei Jihudabü hoba leiyeibü shuong 150 kü khümsoka shaukei, kaijembo kibü phang shuong ka loubü to limbo. 18Chaangbou shausiyung kho: masu che, sanlon maiboutham lak, hoba au shuong, kho pendou ngeibü namei lamlekei; chalou an weko, ih phang lulu souko kikei. Khei yingsikei, labou ho mütli thüka kaangan apbü kijinei, ngei governor shausiyung alekei. 19Kü Bou, ho mütli shanga ngei kümbü pendou shanga, ngo maibüa damenkaima.
