Nehemiahna Awui Rekharek Kahai Achinabingli Phayetkhame
Hiyang khamashāt chi alungwui eina rāa: chāmrei kala kaiwui vang shimkhurbingna athumwui lui mortong sāda athumwui naobing tandi sai, kala Jihudi wungnaobingna athumwui achināwui eina atār khuia. Nehemiahwui malungkavāt kala ithumwui Avāli khangachee china athumli hanmilui ngasaka, kala ana kum tharāda khani governorwui sākhavai allon maphazāmana.
5 1Chitharan mibing kala athumwui preiva̱ ngarāwui eina athumwui achinā Jihudibingwui pongli ngaunlop kachungkha leihaowa. 2Kaikhana hānga, "Ithumwui naomayara kala naongalāva̱bing zangda ithum kachungkhana; phazā khavai kala ringkhavai kashakazā samphangsa." 3Kha khangateibingna hānga, "Ithumna chāmrei atamli kashakazā samphang khavai ithumwui lui, drakhā yāmgui kala shimbing hamserhaira." 4Kha khangateibingna hānga, "Ithumwui lui kala drakhā yāmguiwui awungawui khāshinā kashān khavai ithumna lupā kachishut sai. 5Ithumla ithum kachichā achinābingwui asāna, ithumwui naobingla athumwui naobing kathāna; chithālala ithumna ithumwui naomayara kala naongalāva̱bingli raonao sāda tandi sai. Ithumwui naongalāva̱ kaikha raonao ngasāhairasai, kala ithumli pangshap maleimana: ithumwui lui kala drakhā yāmgui chi khangateibingwuisera."
6Athumwui ngaunlop kala tui hi kashā eina ina malungvātlakhaowa. 7Ina malungli phaninglaga, chiwui thili wungnaobing kala kathānabingli ngasunga, "Nathum kachiva̱na nathum kachichā achinābingli atār khuiki jira!" Chieina ina athumwui pongli yarui kazip kachungkha hokazipkhui. 8Ina athumli hānga, "Miyur khangateibingli yorkasang ithumwui Jihudi achinābingli loshittungkhui khavai ithumna sākhui chi sāhaira. Ara nathumna nathum kachichā achinābingli yorda lei, chithāda athum ithumli yorshittungphalungra!" Athum kasaikha pamda, hāngkhavai khikha maleimana. 9Chieina ina hānga, "Nathum kasā hi kaphā maningmana. Ithumwui yangkashe miyurbingwui khamashāt chi mazangkhavai, nathum ithumwui Avāli ngacheeda ringmangayimalā? 10Ina, iwui achinābing kala iwui raobingnala athumli lupā kala kashakazā chishut mila. Atār khuiki hi ithumna thāhaosa. 11Aja athumwui lui, drakhā yāmgui, olive yāmgui kala shimbing, kala nathumna athumli lupā, kashakazā, drakhāra̱ kadhar kala thaowui vang khuikahai atār chila hanmihaolu."
12Athumna ngahānkai, "Ithumna hanmira kala athumwui eina khikha mapokhuiluimara. Nana kahāng athishurda ithumna sāra." Chieina ina pāngmonbingli hokhui, kala hi tuingashit mayon khavai wungnaobingli mingzai ngasaka.
13Ina iwui kachon mareila kathantāhaida hānga, "Hi tuingashit mayon khavai makasā mi kachiva̱li, ithumwui Avāna awui shim kala apam eina kathantāranu. Kathantāda khamasai eina chihoranu." Yarui katonga saikorana, "Amen," da hānglaga ithumwui Avāli sochikata. Kala mibingna ngashit kahai athishurda sai.
14Ili Judahwui governor kapangkhui thang eina, Awunga Ar-ta-xerxesna mungda khamaga̱ kum eina thumrāda khani kum tangda, zingkum tharāda khani, ina lah iwui achinabingnala governorwui sākhavai allon maphazāmana. 15Kha ili rida khalei governorbingna athumwui eina kashakazā kala drakhāra̱, chiwui lāngda lupā pound akha thāda khuilaga mibingli khanang ngasaka. Athumwui raobingnala mibingwuitungli munga. Kha ina ithumwui Avāli ngacheewui vang chikathā masāmana. 16Ina phākho hiwui ot chili muivai; ithumna lam khipākha malomana. Iwui raobing saikorana ot chiwui vang chili rākazipa. 17Ithumwui kuikhamareili khalei miyurbingwui eina rai kajibingli lāngda, Jihudibing kala kathānabing mi shākha kala hangphangāna iwui tableli phāzai. 18Thangthangwui kashakazā mukkā akha, yao khamathā tharuk, kala vānaobingna, saikora iwui lan eina ngarān kahaina; kala tharāthang kachida drakhāra̱ ayur ayāyāva̱ kachungkha ngarāna. Chithālala, ina governorwui vang sākahai kashakazā chi mashaimana, kaja ot chi mibing hili ritlak eina shirena. 19O iwui Avā, ina mibing hiwui vang sākahai saikora chiwui pongli, ili kaphā eina phaningungmilu.
