Nehemiah 4

4 ¹Sanballatna ithumna phākho sakāluira kaji shālaga, ana malungvātlakhaoda ning khājir pemtinghaowa, kala ana Jihudibingli mana̱shihaira. ²Ana awui achinā ngarā eina Samariawui raimibingwui mangāli hānga, "Khangazana Jihudibing hina khi sālikhala? Athumna phākho khalattawui vang sakāluishitra? Pha̱kaphayā chigatra? Thangkhawui alungli sākupra? Chuitāhaira khalei ja̱tā kahaiwui eina lunggui chi athumna kharing hanmiluira?"

³Ammonpa Tobiah awui ngalemli leida hānga, "Athumna sāki kaji ngalung phākho chi, ramfa akhana chiwuitungli vākailala, ana chi sakhaimihaora!"

⁴Ithumwui Avā, ithumli shālu, kaja ithum yangkakharinga ngasāhaira. Athumwui zeikakharui chi athum khalattawui kuitungli latunglu, kala raithā kahai atamli sāshai thāda horsanglu. ⁵Athumwui khayonkhamāng mathummihaialu, kala athumwui morei nawui miktāli eina mapheomipairanu, kaja athumna shim kasābingwui mangāli zeikakharui horsanghaira.

⁶Chithāda ithumna phākho sakāluishita, kala saikora chi ajui ngayarpak vāshungda ngarumhaowa, kaja mibingna ning katonga sāda ot sai.

⁷Kha Sanballat, Tobiah, Arabnaobing, Ammonnaobing, kala Ashdodnaobingna Jerusalemwui phākho chiphokhui chi mataisang khalei kala mintā kahai apambing chi shungnam sāphoka kaji shālaga, athum malungvātlakhaowa. ⁸Athum saikorana Jerusalemli rida ngarar khavai kala chili pa̱ngapā ngasak khavai akha eina akha khangarān sāhaowa.

⁹Kha ithumna ithumwui Avāli seihā sāda, athumwui vang ngashun ngayā khamayon haimi.

¹⁰Chitharan Judahwui mibingna hānga, "Ot kasābingwui yāng ngasakthura, kala ja̱tā kachungkha lei chieina ithumna phākho sakāluira mangatha̱mana." ¹¹Kala ithumwui yangkashebingna hānga, "Athumna matheikasa kala ithumli matheirang thada, ithum athumwui ngachaili rāra; ithumna athumli shaothatta ot chi sākup ngasakra."

¹²Chieina athumwui nganaili leikasā Jihudibingna rida ithumli thara shida hānga, "Nathum kachiza̱li ngareilala, athumna ithumli rāra."

¹³Chithāda ina phākhowui khamei kakaibingwui khanukli, theipai apambingli, mibingli chipamsanga; athumli avāva̱ shimkhur eina raighai, kazei, kala malāthing eina ngasoda pamngasaka. ¹⁴Ina ot saikora yangkakā tharan, ngakarthuida wungnaobing, otva̱bing, kala ringkashok mibingli hānga, "Athumli mangacheealu. Reikhamatai kala khangachee khangachā Proho Avāli phaningunglu, kala nathumwui achinā ngarā, nathumwui naomayara kala naongalāva̱, nathumwui preiva̱ ngarā kala nathumwui shimwui vang ngararlu."

¹⁵Ithumwui yangkashebingna ithumna athumwui khangarān chi theikhui kala ithumwui Avāna chi aremali ngasakhaowa kaji shālaga, ithum saikora phākholi latungda kachichāwui ot sai. ¹⁶Chithang eina thuida, iwui mibingwui ngayarpakna ot sai, kha ngayarpak khangateina kazei, chāngvei, malāthing, kala raikachon eina ngarān sai. Kala otva̱bingna Judahwui mi saikorawui khanukli nganinga, ¹⁷phākho sāki kajibing. Mateila phungkasābingna pāng khareina ot sāda, pāng khangateina zeighai khāngngasaka, ¹⁸kala shim kasābing mi kachiva̱na ot sāda aniwui raighai atungli thāngkhuiserhaowa. Kha talla̱ kakhonga mipā chi iwui shong pamsanga. ¹⁹Chieina ina wungnaobing, otva̱bing, kala khangatei mibingli hānga, "Ot chi khamashā kala ngayaovāhaira, kala ithum akha eina akha phākho hupta ngatei ngasakda lei. ²⁰Nathumna talla̱khon kachiza̱li shālala, chili ithumli kuimarei khavai rālu. Ithumwui Avāna ithumwui vang ngararmira!"

²¹Chithāda ngathor eina sirābing shokranglakha eina tangda, mi tangkhaina kazei singlaga ithumna ot sāchinga. ²²Atam chitharan ina mibingli hānga, "Mi kachiva̱ kala awui ngachonkhame ngayā Jerusalem alungli pamsangranu, chithāda athum ngayā shantri sāda, ngashun khangava̱ sāra." ²³Chithāda I maningla, iwui ivānaobing maningla, iwui mibing maningla, ili shurkahai shantribing maningla, ithumwui kachon khipākha maraiserlakmana; mi kachiva̱na tara̱ khuikhavai vālala kachichāwui zeighai pāngli singa.