Shimkhurna Phākho Katonga Sakāra
Ngavei kachida, pām kachida, keinung katonga ot sāthui: pāngmonbing, sinā sākatheibing, thao kashunga mi akha, rammungabing, Jericho kala Tekoawui mibing, kala Shallum awui naongalāva̱bing ngasoda ot sāsa. Tekoinaobingwui khangambing khalattana ot chili akahung sang khavai mamayāmana.
3 1Pāngmon kharei Eliashib eina awui achinā pāngmonbing ngakarthuilaga Yao Ngavei sakā sai. Athumna chi dharkat sāda chiwui khāmongbing sāsanga; Shākhawui Raikānphung eina tangda, Hananelwui Raikānphung vāshungda chi dharkat sai. 2Athumwui thili Jerichowui mibingna sakā sai, kala athumwui thili Imriwui naomayara Zaccurna sakā sai.
3Hassenaahwui naomayarabingna Khai Ngavei sakāluida, chiwui khangenbing sāsanga, kala chiwui khāmongbing, phinbing, kala phākashutbing sāsanga. 4Athumwui thili, Hakkozwui naomayara Uriahwui naomayara Meremothna chipho sai. Athumwui thili, Meshezabelwui naomayara Berechiahwui naomayara Meshullamna chipho sai. Athumwui thili, Baanawui naomayara Zadokna chipho sai. 5Athumwui thili Tekoinaobingna chipho sai, kha athumwui khangambingna athumwui akhavāwui otli akahung sang khavai mamayāmana.
6Paseahwui naomayara Joiada eina Besodeiahwui naomayara Meshullamna Kachama Ngavei chipho sai; chiwui khangenbing sāsanga, chiwui khāmongbing, phinbing, kala phākashutbing sāsanga. 7Athumwui thili Gibeon eina Mizpahwui mibing, Gibeonpa Melatiah eina Meronothpa Jadonna Kong Kānda ngaleiwui rammungawui pam kaji apamli chipho sai. a a v7 Kong Kānda ngalei hi Persiana yangkhami ngalei akhana, Euphrates Kongwui zingtunshong khalei ngalei saikora, Judahla ngasoda kupkahaina. 8Awui thili sinā sākatheibingwui ngachaili akha Harhaiahwui naomayara Uzzielna chipho sai. Awui thili, thao kashunga mina kasā Hananiahna chipho sai. Athumna Jerusalem Khamashā phako vāshungda hanmilui. 9Athumwui thili Jerusalem pam tangkhaiwui khamunga Hurwui naomayara Rephaiahna chipho sai. 10Athumwui thili Harumaphwui naomayara Jedaiahna awui shimwui kāroda chipho sai; awui thili, Hashabneiahwui naomayara Hattushna chipho sai. 11Harimwui naomayara Malchijah eina Pahath-moabwui naomayara Hasshubna apam khangatei akha kala Sharkha̱wui Raikānphung chipho sai. 12Awui thili Jerusalem pam tangkhaiwui khamunga Halloheshwui naomayara Shallum eina awui naongalāva̱bingna chipho sai.
13Hanun eina Zanoahwui mibingna Tampāk Ngavei sakāluida chiwui khāmongbing, phinbing, kala phākashutbing sāsanga, kala Thothap Ngavei vāshungda phākho phei thing akha shākhaphangā (1,500) shakha chipho sai.
14Beth-haccherem pamwui khamunga Rechabwui naomayara Malchijahna Thothap Ngavei sakāluida chiwui khāmongbing, phinbing, kala phākashutbing sāsanga.
15Mizpah pamwui khamunga Col-hozehwui naomayara Shallumna Ura̱ Ngavei sakāluida, chi kupda, kala chiwui khāmongbing, phinbing, kala phākashutbing sāsanga. Ana David keinungwui eina tunglu chonchak vāshungda Awungawui yāmgui ngalemli khalei Siloam ra̱khongwui phako chila chipho sai. 16Awui thili Beth-zur pam tangkhaiwui khamunga Azbukwui naomayara Nehemiahna Davidwui chikhurbingwui kāroda apam eina tangda, sākāhai ra̱khong, kala Raikapingabingwui shim vāshungda chipho sai. 17Awui thili Levinaobingwui ngachaili Baniwui naomayara Rehumna chipho sai. Awui thili Keilah pam tangkhaiwui khamunga Hashabiahna awui pamwui vang chipho sai. 18Awui thili athumwui achinā ngarā Levinaobingwui ngachaili Keilahwui hakmeikap ngayarpakwui wungva̱ Hanadadwui nao Binnuina chiphokhui. 19Awui ngalemli Mizpahwui wungva̱ Jeshuawui nao Ezerna Angleli khutlaishim ashan kāroda ngayarpak kakhane akha chiphokhui. 20Awui thili Zabbaiwui nao Baruchna Angle eina thuilaga pāngmon kharei Eliashibwui shim khāmong vāshungda ngayarpak khangatei akha khangaraina chiphokhui. 21Awui thili Hakkozwui nao Uriahwui nao Meremothna khāmong eina thuilaga Eliashibwui shim akatang vāshungda ngayarpak khangatei akha chiphokhui. 22Awui thili kuikhamarei tampākli khalei pāngmonbingna chiphokhui. 23Awui thili Benjamin eina Hasshubna athumwui shim kāroda chiphokhui. Awui thili Ananiahwui nao Ma-aseiahwui nao Azariahna kachichāwui shim ngalemli chiphokhui. 24Awui thili Hanadadwui nao Binuina Azariahwui shim eina thuilaga Angle kala achikun vāshungda ngayarpak khangatei akha chiphokhui. 25Uzaiwui nao Palalna Angle kala awungawui ato konung eina sāshana dolan kāroda, khamayonawui kārot ngalemli chiphokhui. Awui thili Paroshwui nao Pedaiahna chiphokhui. 26Ophelli kapama khorum khavai shimwui otram khangatha̱bingna zingshoshong khalei Tara̱ Ngavei kāroda vāshungda, kala sāshana dolan chiphokhui. 27Athumwui thili Tekoinaobingna reikhamatai sāshana dolan kāroda eina thuilaga Ophelwui phākho vāshungda ngayarpak kakhane akha chiphokhui.
28Sigui Ngavei atungli pāngmonbing mi kachiva̱na kachichāwui shim kāroda chiphokhui. 29Awui thili Immerwui nao Zadokna awui shim kāroda chiphokhui. Awui thili zingsho ngavei khamayona Shecaniahwui nao Shemaiahna chiphokhui. 30Awui thili Shelemiahwui nao Hananiah kala Zalaphwui nao katharuka Hanunna ngayarpak khangatei akha chiphokhui. Athumwui thili Berechiahwui nao Meshullamna awui pamkhavai kā kāroda chiphokhui. 31Awui thili sinā sākatheibingwui ngachaili akha Malchijahna khorum khavai shimwui otram khangatha̱bing kala leihkhalonbingwui shim vāshungda, Kayang Ngavei kāroda, kala achikunli khalei khamato kā vāshungda chiphokhui. 32Achikunli khalei khamato kā kala Yao Ngaveiwui ngachaili, sinā sākatheibing kala leihkhalonbingna chiphokhui.
