Nehemiya 3 FHB Father's Heart Bible™

3 ¹Eliyasibi mbuta wa banganga Nzambi yi banganga Nzambi bakwandi bátelama amana bátunga mwelu wa Mikoku. Bánenginawu amana bátelamisa myelu myawu; bánenginawu tii yi kuna Kaleyi kya Nkama, tii yi kuna Kaleyi kya Hananeli. ²Ku lweka lwa bawu, batu ba Yediko bátunga, amana ku lweka lwa bawu, Zakuli mwana wa Imili wátunga.

³Bana ba Hasenaha bátungulula mwelu wa Batsema, bátula mabaya mawu amana bátelamisa myelu myawu, bikangilu yi misinga. ⁴Ku lweka lwa bawu, Meremoti mwana wa Wudiye mwana wa Hakozi wátungulula. Ku lweka lwa bawu, Mesulami mwana wa Belekiya mwana wa Mesezabeli wátungulula. Ku lweka lwa bawu, Satoki mwana wa Bana wátungulula. ⁵Ku lweka lwa bawu, bisi Tekowa bátungulula, kaasi batu ba luzitu ba bawu bázolaku mu kutula singu za bawu mu kisalu kya bapfumu ba bawu.

⁶Yoyata mwana wa Pasea yi Mesulami mwana wa Besodeya bátungulula mwelu wa Kinunu: bátula mabaya mawu, bátelamisa myelu myawu, bikangilu yi misinga. ⁷Ku lweka lwa bawu, Melatiya mwisi Ngibewoni yi Yadoni mwisi Melonoti, batu ba Ngibewoni yi Misipa, bátungulula ndambu yina ya kiti kya pfumu wa kinzunga kya Ku Sambwa dya Nzadi. ^a a v7 Kinzunga kya Ku Sambwa dya Nzadi kyákala kinzunga kya luyalu lwa Pelesiya kina kyákala landila tsi zoosu za ku mazyokidi ma Nzadi Efalati, hakimosi yi Yuta. ⁸Ku lweka lwandi, Uziyeli mwana wa Halahaya, mosi wa basadi ba wolu, wátungulula. Ku lweka lwandi, Hananiya, sadi wa malasi, wátungulula. Bátomisa Yelusalemi tii yi kuna Kibaka Kyayalumuka. ⁹Ku lweka lwa bawu, Refaya mwana wa Huli, pfumu wa kyati kya kinzunga kya Yelusalemi, wátungulula. ¹⁰Ku lweka lwa bawu, Yedaya mwana wa Halumafi wátungulula kuna thwala ya nzu yandi; ku lweka lwandi, Hatushi mwana wa Hashabeneya wátungulula. ¹¹Malukiya mwana wa Halimi yi Hashubi mwana wa Phahati-Mowabi bátungulula ndambu yikwawu yi Kaleyi kya Mafulu. ¹²Ku lweka lwandi, Shalumi mwana wa Haloyeshi, pfumu wa kyati kya kinzunga kya Yelusalemi, wátungulula, yandi yi bana bandi ba bakhetu.

¹³Hanuni yi batu ba Zanowa bátungulula mwelu wa Beti, bátungulula wawu, bátelamisa myelu myawu, bikangilu yi misinga, amana bátungulula kitesu kya mahaku 1.500 ma kibaka tii yi kuna mwelu wa Tuvi.

¹⁴Malukiya mwana wa Lekabi, pfumu wa kinzunga kya Beti-Hakelemi, wátungulula mwelu wa Tuvi, wátungulula wawu amana wátelamisa myelu myawu, bikangilu yi misinga.

¹⁵Shaluni mwana wa Koli-Hoze, pfumu wa kinzunga kya Misipa, wátungulula mwelu wa Thangu-mamba, wátungulula wawu, wátula ludimu lwawu, amana wátelamisa myelu myawu, bikangilu yi misinga. Wátungulula phi kibaka kya Kiziba kya Silowe bela-bela yi Masamba ma Kyamvu, tii yi kuna mapeka mana masi kulumuka tuka ku Mbanza ya Tavidi. ¹⁶Kunima kwandi, Nehemiya mwana wa Azubuki, pfumu wa kyati kya kinzunga kya Beti-Zuli, wátungulula tii yi kuna thwala ya mazyamu ma Tavidi, yi kuna Kiziba kina kyátungama, yi Nzu ya Baphumbulu. ¹⁷Kunima kwandi, balefi bátungulula: Lehumi mwana wa Bani. Ku lweka lwandi, Hashabiya, pfumu wa kyati kya kinzunga kya Keyila, wátungulula kikuma kya kinzunga kyandi. ¹⁸Kunima kwandi, balefi bakwawu bátungulula: Binuwi mwana wa Henadadi, pfumu wa kyati kya kinzunga kya Keyila. ¹⁹Ku lweka lwandi, Ezeli mwana wa Yeshuwa, pfumu wa Misipa, wátungulula ndambu ya zodi kuna thwala ya nzila ya kukwenda ku nzu ya binwaninu, ku Kipheti. ²⁰Kunima kwandi, Baluki mwana wa Zabayi wátungulula yi tsambu ndambu yikwawu, tuka ku Kipheti tii yi kuna mwelu wa nzu ya Eliyasibi mbuta wa banganga Nzambi. ²¹Kunima kwandi, Meremoti mwana wa Wudiye mwana wa Hakozi wátungulula ndambu yikwawu, tuka ku mwelu tii yi kuna tsuka ya nzu ya Eliyasibi. ²²Kunima kwandi, banganga Nzambi bana bátuka mu mahata ma nzunga bátungulula. ²³Kunima kwandi, Benzyame yi Hashubi bátungulula kuna thwala ya nzu ya bawu. Kunima kwandi, Azaliya mwana wa Maaseya mwana wa Ananiya wátungulula bela-bela yi nzu yandi mwene. ²⁴Kunima kwandi, Binuwi mwana wa Henadadi wátungulula ndambu yikwawu, tuka ku nzu ya Azaliya tii yi kuna Kipheti yi kolo. ²⁵Palali mwana wa Uzayi wátungulula kuna thwala ya Kipheti yi kaleyi kina kisi tombuka tuka ku nzu ya kyamvu ya ku zilu, bela-bela yi kyanzala kya batsinzidi. Kunima kwandi, Pedaya mwana wa Paloshi. ²⁶Basadi ba nzu ya Nzambi bana bakala zingila ku Ofeli bátungulula tii yi kuna thwala ya mwelu wa Mamba ku Kola, yi kaleyi kina kisi tombuka. ²⁷Kunima kwa bawu, bisi Tekowa bátungulula ndambu ya zodi, tuka ku thwala ya kaleyi kineni kina kisi tombuka tii yi kuna kibaka kya Ofeli.

²⁸Ku zulu dya mwelu wa Baphunda, banganga Nzambi bátungulula, kosu kosu kuna thwala ya nzu yandi mwene. ²⁹Kunima kwandi, Satoki mwana wa Imeli wátungulula, kuna thwala ya nzu yandi. Kunima kwandi, Shemaya mwana wa Shekaniya, tsinzidi wa mwelu wa Kola, wátungulula. ³⁰Kunima kwandi, Hananiya mwana wa Shelemiya yi Hanuni, mwana wa sambanu wa Zalafi, bátungulula ndambu yikwawu. Kunima kwa bawu, Mesulami mwana wa Belekiya wátungulula kuna thwala ya nzu yandi ya mvwandulu. ³¹Kunima kwandi, Malukiya, mosi wa basadi ba wolu, wátungulula tii yi kuna nzu ya basadi ba nzu ya Nzambi yi batu ba kikhita, kuna thwala ya mwelu wa Mfyongola, tii yi kuna mwanza wa ku zilu ku kolo. ³²Hana kati dya mwanza wa ku zilu ku kolo yi mwelu wa Mikoku, basadi ba wolu yi basumbisi bátungulula.